براہوئی زبان متکنءِ نوشت آک تے انتئے متکن افس؟                           8

 ریاست قلات نا حاکم آک براہوئی یا بلوچی ءِ انتئے سرکاری زبان جوڑ کتوس:۔

بھازآ زبانک وخت وخت، بھلا بنڈ آنبار ہندن ءُ روتہ خلیرہ کہ او بنڈ ءِ کشنگ بھاز آتا وس آن پیشن مریک، دن کہ غزنی، غوری، مغل حاکم آک، اوفتا جند انا زبانک تو پین مسنو، ولے او طاقت نا خواجہ غاک ہم فارسی زبان نا سوگو آ بُنڈ  ءِ کشنگ کتنو، مجبور مسنو، تینا زبان تا جاگہ غا اودے تینا ریاست آتا زبان جوڑ کرینو۔

عرب آتیان مست داڑے ایرانی تا بادشاہی نا دم دمامہ مسنے، دا علاقہ غاتے ٹی انت کہ حکم، کلہو یا ہدایت آک بسنو، پاش ءِ کہ او ایرانی زبان اٹ مسنو، او زمانہ غاتے ٹی رابطہ، درس و تدریس و منڈی نا زبان پہلوی یا اونا بدل فارسی زبان مسنے۔ اوکان گڈ عربی مچے بھاز اوفتا جاگہ ءِ ہلکنے، عربی آن گڈ پدا فارسی بسنے۔ فارسی ہندُن ءُ زوراور و سوگو ءُ زبان اس جوڑ مسنے، کہ غزنی، غوری و مغل آتیانبار پد انا بروک آ حاکم آتے ہم کسر متنے کہ او دا علاقہ غاتے ٹی تینا جند انا زبان ءِ مونی اتیر، انتئے کہ او زمانہ ٹی ہمسائے ملک آتتون اوار اوار ہندوستان اسکان فارسی زبان نا بُنڈ انا روتہ غاک سوگوی اٹ تالان مسنو، او علاقہ غاتے ٹی ہم علاقائی زبان تا جاگہ غا فارسی زبان دفتر نا و نوشت نا زبان اس جوڑ مسوسس۔

نن اگہ دا پان کہ دا جاگہ نا حاکم آک دن کہ ریاست قلات نا احمد زئی خاہوت انتئے براہوئی یا بلوچی زبان ءِ ریاست نا زبان گوندتنے، کہ دا زبانک متکن ہم اریر۔ و خاص وڑ اٹ براہوئی تو دا جاگہ نا اولیکو زبان پاننگک، تو اودے انتئے اولیت تننگتنے۔

دا بارو اٹ، ریاست قلات نا تاریخ ءِ اگہ ہرن تو او وخت آ قلات نا حاکم و پین بھاز آ سیاستدان و خوانندہ انگا نوشتکار آک، خاص وڑ اٹ خان اعظم جان نا دور اٹی دانا کوشست ءِ تو بھاز کرینو، ولے فارسی زبان نا سوگوی اوفتے دُن کننگ کن الیتنے، بیرہ ریاست قلات آخا بلکن ہمسائے ملک اوغانستان نا بادشاہک کہ اوفتا زبان اوغانی، سندھ انا حاکم آک کہ اوفتا زبان بھاز مالو آن سندھی ءِ، ہندوستان نابادشاہک کہ اوڑے اوفتا بھازآ علاقائی زبانک بھاز متکن ءُ دور اسے آن اریر۔ اوکل ریاست قلات نا حاکم آتیانبار تینا علاقہ غاتے ٹی تینا زبان تے سرکاری زبان جوڑ کننگ نا کوشست تو بھاز کرینو، ولے ریاست قلات آنبار او کل بے سہب مسنو، نن ڈوہدار بیرہ حاکمان قلات ءِ کپن، اگہ ڈوہداری اسے توسندھ اٹی سندھی، اوغانستا ن اٹی اوغانی و ہندوستان اٹی ہندی و علاقہ والا بادشاہک ہم ڈوہدار اریر۔

اسہ بھلو سوب اس داہم ارے کہ او زمانہ ٹی ایران، اوغانستان و ایلو ہمسائے تا نوشتئی آ زبان فارسی مسنے، و ہرا معاہدہ یا خط و کتاب آتے کروئی مسنے اوفتے ہم المی فارسی زبان اٹ نوشتہ کروئی تمانے۔

دافتیان بیدس ریاست قلات نا تہٹی ہم مخلوق تینا ہر وڑ انا لکھ و پڑھ آتے فارسی زبان اٹ کرینے، دُن کہ اینو پگہ نن تینا نوشت آتے براہوئی یا بلوچی نوشتہ کننگ چاہنگ آن پد ہم اردو ٹی لکھنہ۔

نن پاننگ کینہ کہ دا علاقہ غاتا بھلا زبان فارسی مسنے ہرانا سوگو آ بُنڈ ءِ دا بھلابھلا علاقہ غاتیان کشنگ اونا جاگہ غا پین زبان اسے اتنگ کس انا وس اٹی متنے۔

 ہفتئی تلار

22-28 August 2020

تاک: 33

پنہ : 2