کتاب 

دنیا ٹی امر ءُ راج اس مرے اونا شونداری تعلیم و علم انا منتوار مریک۔ تعلیم و شونداری و شعور نا مزل اسکان انسان ءِ کتاب آک سر کیرہ۔ کتاب آتیان بیدس دنیا ٹی مون مستی ہننگ بھاز مشکل ءِ۔ بلکن ہچ وڑ اٹ ممکن اف۔ اللہ رب العزت ہم تینا کلہو ءِ کتاب آتا کمک اٹ انسانیت اسکان سر کرفینے۔ ہراڑکن اللہ پاک تینا نبی تے گچین کرے۔ اوفتے دنیا ٹی مون تس۔ و واحدانیت و حق انا سبخ ءِ مخلوق اسکان سر کننگ کن آسمانی کتاب آتے اوفتا دوٹی تس۔ اسلام آن مست ہم اللہ پاک نا مون تروک آ کتاب آک انسانیت نا راہشونی ءِ کرینو۔ ہندن نبی کریمؐ ءِ قرآن پاک نا عظیم انگا ٹیکی تون اوار انسانیت نا ہدایت کن مون تننگا۔ قرآن کریم پورو ءُ ضابطہ اخلاق و ضابطہ حیات اسے۔ انسان نا زند اٹ سرسہبی نا کسر قرآن پاک نا پاروک آ تعلیم آتا رد اٹ دوئی مننگ کیک۔ ہندن آخرت اٹ ہم سرسہبی و آسراتی قرآن نا پاروک آ ہیت آتیا عمل کننگ اٹ رسینگک۔ دن کہ آسمانی کتاب آک انسان نا زند ءِ علم و شعور نا کسر ءِ نشان تسر۔ تو ہندن دا دنیا ٹی ہم دنیا نا پنی آ دانشور و پولکار و نوشتکار آتا کتاب آک ہم دنیا ٹی مخلوق ءِ علم و شعور نا کسر آ شاغار۔

اسلام آن ہزار آتیا سال مست و اسلام آن پد دا دنیا ٹی ہندن ءُ کتاب ہم نوشتہ مسنو کہ ہرافتا سبخ آتیا عمل کننگ آن دنیا مون مستی شون ہلسا ہنانے و مونی ہننگ ءِ۔ 

سقراط زیار انا پیالہ ءِ کش کرے، ولے دنیا ٹی اینو اسکان اونا پن زندہ ارے۔ تو او تینا نوشت آتا سوب آن زندہ ءِ۔ ہندن دنیا نا پنی آ بندغ آک تینا نوشت آتا سوب آن اینو اسکان زندہ اریر۔ ابن خلدون، ارشمیدس، البیرونی، ابن رشد، ابن الہیثم مرے یا بابائے تاریخ ہیروڈوٹس، دافتا پن دافتا کتاب آتا سوب آن، و اوفتا علم انا سوب آن اینو اسکان زندہ ارے۔ اوفتا علم کتاب آتا وڑ اٹ ننے ا سکان سر مس۔

بیست و یکمیکو کرن اٹی کہ ہراڑے دنیا ٹیکنالوجی نا پڑ آ بھاز مونی ہنانے تو داڑکن ہم دنیا کتاب آتا منتوار ءِ۔ ٹیکنالوجی و سائنس نا شونداری آن پد ہم دنیا ٹی کتاب آتا اہمیت کم متنے۔ بلکن داسکان مخلوق کتاب آتیان فائدہ ہرفنگ ءِ۔ اینو نا وخت اٹ کہ ہراڑے یوٹیوب، وٹس ایپ، فیس بک و گوگل، و ٹویٹر نا آسراتی ساڑی ارے۔ ہراڑے بس اسہ بٹن اسے نا کلک آن دنیا بندغ نا مون آ تالان مریک۔ داخس آسراتی آن گڈ ہم یورپ و امریکہ یا ایلو شون ہلوک آ ملک آتیٹی کتاب تون مہر و مریبت کم متنے۔ بلکن اوڑے تو راج اکن لائبریری تا مننگ المی ءِ۔ انتئے کہ اگہ راج انا غریب انگا بندغ آک بہا اٹ کتاب ہلنگ کپسہ تو اوفک لائبریری ٹی بریر و کتاب خوانر۔ ننا ہمسائے ملک چین اٹ بھاز بھلو لائبریری ارے۔ ہراڑے کہ ہزار آ بندغ آک بریرہ تینا علم انا ملاسی ءِ چٹفرہ۔ و کتاب تون تینا مہر ءِ نشان ایترہ۔

سوشل میڈیا غا گیشتری نن خنانن کہ جاپانی قوم اگہ ریل و بس اٹ سفر کننگ ءِ تو سفر نا وخت آ ہم کتب اوفتا دوٹی ءِ۔ اوفک بیکار انگا وخت اٹ کتاب تون سنگتی کیرہ۔ اوفتا شونداری نا ویدن ہم ہندادے کہ اوفک کتاب خوانرہ۔ کتاب آتیان پٹ و پول کیرہ۔ 

ولے بدبختی دادے کہ ننا ملک یورپ و چین آن بھاز پدی ءِ۔ بلکن نن اوفتا گو اٹ چَپ انگا کسر اٹ روان ارین۔ 

اسہ تو مسلمان اسے نا حیثیت اٹ نن اللہ پاک نا مون تروک آ کتاب قرآن پاک ءِ ہم گیرام کرینن۔ حالانکہ قرآن پاک تو دنیا و آخرت نا سرسہبی نا ضمانت ءِ۔ اللہ پاک تو انسان ءِ اشرف المخلوقات جوڑ کرینے۔ اللہ پاک قرآن اٹ انسان ءِ کائنات ءِ تسخیر کننگ نا ویدن ءِ پارینے۔ دا ویدن آتے کس ہمو خت آ پہہ مریک کہ او قرآن ءِ خوانے۔

ولے افسوز کہ نن بحیثیت مسلمان و بحیثیت پاکستانی قوم قرآن نا پاروک آ ہیت آتیا عمل کتون۔ اگہ نن قرآن پاک ءِ جوانی اٹ خوانوسن تو نن اینو تینا دا دنیا ءِ امر آسرات کرینہ و آخرت نا آسراتی ہم ننا نصیب مسکہ۔

ننا اینو نا ورناک کتاب نا شوق آن بھاز مر اریر۔ ننا راج اٹ کتاب خواننگ و کتاب خوانفنگ کالج و یونیورسٹی اسکان ءِ۔ اینو نا ورنا بس نصابی کتاب آتسکان خوانک۔ کلاس اٹ و کلاس آن پیشن نصابی کتاب آتیا زور خلنگ آن گڈ اوفتا سوچ بس سرکاری نوکری اسکان ءِ۔ ہرا وخت آ اوفتے نوکری رسینگا تو نئے کتاب است آتا بریک نئے خواننگ۔

غیر نصابی کتاب آک کہ انسان ءِ شعور و عقل انا مزل اسکان سر کیرہ۔ اینو غیر نصابی کتاب آتا مطالعہ نا شوق برجا سلتنے۔ اینو بازار تیٹی تو بوٹ آتا دکانک اریر، ولے کتاب آتا دکانک افس۔ بوٹ و چپل آک شیشہ نا زیبدار آ الماری تیٹی تخوک اریر، ولے انسان ءِ انسانیت نا سبخ تروک آ کتاب آک سڑک نا تڑہ غا بہا مریرہ۔ یا تو ملک انا منہ بھلا شار تیٹی اسہ کنج اسے ٹی اردو بازار نا پن اٹ منہ متکن ءُ دکان اریر۔

اینو ننا راج اٹ اسہ کتاب خوانوک ءُ بندغ اسے عزت اف۔ ولے اخس نا خواندہ ءُ بندغ اس کہ جوان ءُ پچ و جوان ءُ بوٹ بینانے اونا بھاز عزت مریک۔

اینو ننا ورناک بھاز فخر اٹ بوٹ والا دکان اٹ کارہ، و دکاندار ءِ پارہ کہ اسہ جوان و کبین ءُ بوٹ نا جوڑہ اس نشان ایتے۔ اینو مسہ ہزار آن کم انا بوٹ تو ورناک ہلپسہ۔ کنا اسہ سنگت اسے نا پاننگ ئس کہ او گدرینگوک آ عئید آ نہہ ہزار روپئی آ اسہ جوڑہ اس بوٹ انا ہلکنے۔ ولدا بھاز فخر اٹ پاہک کہ فلانی مارکیٹ نا فلانی دکان نا جوان ءُ بوٹ ءُ۔ ای اوڑان ارفیٹ کہ نی شار اٹ کتاب بہا کروک آ دکان تے خنانس کہ ہراڑے علم و شعور رسینگک۔ ای پاریٹ تے کہ نی بوٹ انا کمپنی تا پن تے تو چاسہ، سینٹ و عطرآتا پن تے چاسہ، کاٹن نا پچ و ایلو پچ آتے چاسہ، دا پا کہ سبط حسن، ارشد محمود، علی عباس جلالپوری، سگمنڈ فرائیڈ، دوستوئے فسکی، رابندر ناتھ ٹیگور، ابن خلدون، و چندی پین پن تے ہلکٹ کہ دافتیان کس ءِ چاسہ؟ تو او پارے کہ دا دیر ءُ؟ ای تپرہ تا۔ خواجہ اگہ کتاب نا شوق تخوسس تو اونا معلومداری زیات مسکہ۔ ولے داڑے تو کتاب آن مخلوق بھاز مُر ارے۔ کتاب ءِ اگہ کس خواننگ نا خواہشمند مریک تو اول تو اوڑتون پیسہ مفک، انتئے کہ ای آزموندہ کرینٹ کہ کتاب خوانوک آ بندغ آک گیشتری غریب تپہ غان اریر۔ امیر ءِ تو کتاب تون ہچ ءُ کاریم اس اف۔ امر ءُ اسہ امیر اس اگہ کتاب خوانے، تو او ہم کتاب نا نہاد اگہ سَے سد ءِ تو نیمہ نہاد آ خواہک تے۔ دن کہ او بوٹ و چوٹ ءِ پورو نہاد آ ہلیرہ، کتاب کن پورو نہاد اسُل تفسہ۔

انٹرنیٹ ہم ننا مخلوق ءِ کتاب آتیان مر کرینے۔ حالانکہ انٹرنیٹ یورپ و امریکہ جاپان والا تا ودی کروک اسے، ولے اوڑے اینو ہم انٹرنیٹ تون اوار کتاب نا قدر و قیمت برجا ءِ۔ ننا طالب علم آتے سوشل میڈیا کتاب آتیان مر کرینے۔ فیس بک، انسٹا گرام، و ٹک ٹاک نا دو تیان ننا طالب علم آک خواننگ آن تمانو۔

انگریز تو دافتے تینا وخت تیری کن جوڑ کرے، اوفک ہم فیس بک و ٹک ٹاک ایلو بلا بتر تے گوازی کیرہ، ولے نن کن تو دا وخت تیری آن چَپ اسہ ناجوڑی اس جوڑ مسنو۔ ورناک ہندا ناجوڑی نا گواچی مسنو۔ سوشل میڈیا ننے اسہ ایلو آن بھاز مر شاغانے۔ اسہ اُراٹی ایلم تینا ایلم تون، مار تینا باوہ تون ہچ گپ خلپک۔ بس موبائل مرے و سوشل میڈیا مرے۔ نئے دنیا داری نا گپ آک نئے کتابی آ گپ آک مریرہ۔ اسہ طالب علم اس سی ہزار و چل ہزار نا موبائل اس تو ہلیک، ولے تینا علم و شعور نا خاطر آن اسہ کتاب اسے آ چار سد خڑچ کپک۔ نصابی کتاب آک تو ننے روزگار کن کمک ایترہ، ولے غیر نصابی کتاب آک تو ننا عقل و شعور نا درگہ غاتے ملرہ۔ دنیا ءِ ننا مون آ تالان کیرہ۔ غیر نصابی کتاب آک ننا مزغ اکن کن خور نا کاریم ءِ کیرہ۔ کتاب خواننگ و کتاب نوشتہ کننگ بیرہ ادیب آتا کاریم اف، بلکن کتاب خواننگ ہم نن کل آ فرض ءِ۔ انتئے کہ علم و عقل شعور کس انا میرات اف۔ ہراڑا کل انا حق ءِ، ولے دا حق خواننگ اٹ دو بریک۔ نن کل کتاب خوانن تینا راج اکن تینا ملک اکن اسہ مثبت و جوان ءُ کڑد اس ادا کین۔ ہر اُراٹی اسہ لائبریری اس مرے۔ ہرا کہ نن کن و ننا بروک آ نسل آتے کن فائدہ نا سوب مرے۔

کتاب تو تنیائی نا اسہ جوان ءُ سنگت اس ارے، و بایدے کہ ہرا وخت تنیا مرین تو سٹی انگا سوچ آتیان جوان ءِ کہ کتاب نا مطالعہ ءِ کین۔ 

ورناک کتاب آتا مطالعہ غا زور شار و تینا کسر ءِ او تینا بروک آ نسل آتا کسر نا روشنائی کیر۔

ہفتئی تلار 

تاک: 37

26 Sep-02 Oct, 2020

پنہ: 02