زندان نا ڈائری(سال 1973ء) 10

دا سم کاری نا بنا ٹی علی احمد کرد سلہہ ہلنگ کن اسہ رکشہ سے ٹی سوار مس و سردار عطاء اللہ مینگل نا اُرا غا ہنا، اوڑے درنجوک توفک آتے ہرفنگ کن ہراتم علی احمد کرد دُو ءِ مریفے تو سردار صاحب ہموڑے سلوک باڈی گارڈ ءِ پارے کہ الیپیس تے۔ علی احمد کرد توفک ءِ خواہسکہ۔ سردار عطاء اللہ مینگل اودے توفک ءِ ہرفنگ آن توننگ نا متا ماری کریکہ۔ علی احمد اخیر دم درینگا خالی دو پدی ہمو رکشہ ٹی جناح روڈ آ بس۔ سم کاری برجا ئس۔ علی احمد کرد خالی دُو کوکار اٹ قطب خان لہڑی ءِ ہکل تننگ ئس۔ ہراتم او قندھاری بازار والا گیٹ آ مون کرے تو ننا باسک آک اودے ہلکر، و گیٹ انا تہٹی دریر۔ ہراتم او جناح روڈ فتح خان مارکیٹ نا مون پہ مون والا گیٹ انا کنڈ آن دُو ءِ سینہ غا خلسا و کوک کرسا پارے ”خلبو خلبو۔“ اسلم کرد و قیوم ساسولی اودے ہلکر، و گیٹ آ دریر۔ آنسو گیس انا شیلنگ و لٹکاری اسکان علی احمد کرد ءِ اسلم کرد توریسس۔ لٹ کاری نا بنا مننگ تون اودے اسہ رکشہ سے ٹی تین تون اوار تولفسا اونا اُرا غا درے۔ اسلم کرد اوکان پد پارے کہ علی احمد کرد جوزہ غان مچ آ کسر اُرا اسکان کوکار اٹ میر قطب خان و اونا سنگت آتے ہکل ترسا ئس۔ دا واقعہ غان پد اسلم کرد، علی احمد کرد، امان اللہ شادیزئی، امان اللہ بازئی، وہاب شاہ دلسوز، قیوم ساسولی، خورشید جمالدینی تون اوار کیہی طالب علم راہشون تا دزگیری وارنٹ جاری مس۔

بھاز ہُرے اسکان برانزی و جلہو گیر آتا نیام اٹ سم کاری، ڈوکاری مرسا ہنا۔ دا جنگ بھاز ہُرے اسکان برجا سلیس۔ اخیر میر قطب خان لہڑی ہرا ہر کنڈ آن برانزی تا پلویڑ اٹ بسوسس، ءِ کپڑا مارکیٹ آن کشنگ کن جت پت نا بنا مس۔ پولیس و فیڈل سیکورٹی فورس نا سپاہیک ہرا قندھاری بازار، کیف بلدیہ و جناح روڈ نا دیکی روڈ آ سنبرینگوک سلوک ئسر، تینا افسر آتا پرمان نا چاری ئسر۔ شام انا نماز آن مست آنسو گیس و لٹکاری نا پرمان بننگ تون شیلنگ نا بنا مس۔ ننا کنڈ آن اولیکو ڈوکاری کپڑا مارکیٹ نا کنڈ آ کننگاکہ۔ و داسہ ڈوکاری کپڑا مارکیٹ ءِ اِلسا F.S.F پولیس پارٹی آ کننگ نا بنا مس، وار رسینگ تون پولیس افسر آک میر قطب خان لہڑی و اونا ناؤچہ کروک سنگت آتے ہلکر، مارکیٹ آن پولیس لائن والا گیٹ آن کشار ریگل چوک انا کسر اٹ گورنر ہاؤس آ سر مسر۔

دا جنگ اٹی قطب خان لہڑی نا اسہ باڈی گارڈ اس، حاجی حمید کرد ءِ سم اس لگاسس، ہرا بھاز ٹھپی مسوسس۔ سم اونا سینہ ٹی لگاسس، ہرا کیہی دے اسکان ملٹری ہسپتال اٹ درمان مس۔

ننا کنڈ آن بی ایس او نا راہشون خورشید جمالدینی نت اٹ سم اس لگنگ آن ٹھپی مسوسس، ہرادے سعید ساجدی ہرفیسس، عدالت روڈ آ سلوک عبدالحکیم لہڑی نا ایلم مجید لہڑی خورشید جمالدینی ءِ ٹھپی خنا تو تینا کار ءِ ایس۔ خورشید و سعید ساجدی ءِ تینا کار اٹی تولفے درے۔ دا جھیڑہ ٹی ننا اسکول نا یونٹ سیکرٹری عبدالقیوم شاہوانی نا سرہ ٹی شیل اس لگاسس، و ڈگری کالج نا فیض اللہ مینگل ہم ٹھپی مسوسس۔ بی ایس او پولی ٹیکنیک نا اِرا سنگت بی ایس نا بنجائی وائس چیئرمین اختر بلوچ و پولی ٹیکنیک انسٹی ٹیوٹ نا امان اللہ منہ دے آن پد دزگیر مروک بلوچ اسٹوڈنٹس آرگنائزیشن نا بنجائی وائس چیئرمین اختر بلوچ و بی ایس او پولی ٹیکنیک نا راہشون امان اللہ یلہ مسر۔ اوفتا یلہ مننگ آ اسہ دود اس کیف بلدیہ عدالت روڈ نا لان اٹی اڈ ہلک۔ دود انا ایسری آن پد ہراتم بی ایس او نا باسک آک پیش تمارہ، تو اسہ پولیس آفیسر اس اسلم کرد ءِ پارے کہ نے دزگیر کننگ کن بسنن۔ اسلم کرد وارنٹ شو کننگ نا پارے تو پولیس آفیسر ایلو پولیس کارندہ غاتے اودے ہلنگ نا پارے۔ پولیس نا سپاہیک اسلم ءِ ہراتم ہلنگ کن مونی مسر، تو طالب علم آک مزاحمت کریر۔ ہنداڑتون اسہ ہڑدڑ اس بنا کرے، لٹ دوٹی پولیس آک بلوچ اسٹوڈنٹس آرگنائزیشن نا باسک آتیا جلہو کریر، لٹ کاری نا بنا مس۔ اسلم کرد تون اوار بی ایس او نا بنجائی پبلسٹی سیکرٹری سعید ساجدی و حشمت قمبرانی ہلنگار، لٹ کاری آن سعید ساجدی و حشمت قمبرانی ٹھپی مسر۔ سعید ساجدی نا نت لٹ اس لگنگ آن ہسون مس، و حشمت قمبرانی نا جون لٹ آتیان بور بور ئسکہ۔ دا دزگیر مروک آتے اول سٹی پولیس اسٹیشن آ دریر، ہمو دور اٹی سٹی ڈپٹی سپرنٹنڈنٹ پولیس (D.S.P) چوہدی شریف ئس۔ ہرانا نیپ گورنمنٹ اٹی پولیس ہڑتال اٹ اہم ءُ کڑد اس ئسکہ۔ D.S.P چوہدری شریف نیپ انا مخ تف بی ایس او آن تعلقدار دزگیر مروک آتے ہُرسا تھانہ ٹی دوبہ دار آتیا بیداد کن جوڑ ڈرائنگ روم اٹی ”بغض نیپ“ انا سوب آن بھاز بیداد کرے۔ بیداد آن پد اوفتیا ایف آئی آر درج کرفے۔ و ہر مسٹ آتے پک اپ اٹ تولفسا بجلی گھر پولیس اسٹیشن اٹی درے و مسہ ہفتہ کن بند کرے۔ اسلم کرد آ مقدمہ غاتا بری اس تخنگاسس۔ ہراٹی مون نا کل طالب علم ریلی و ریلی تا وخت آ مروک ہڑدڑ، پرغ بٹ، امن ایمنی ٹی اڑانگ ودی کننگ تون اوار طالب علم و الس ءِ بغاوت آ وگائفنگ نا مقدمہ غاک اوار ئسر۔ سعید ساجدی و حشمت قمبرانی پولیس زمواری ٹی نیام تمنگ، امن و ایمنی ٹی اڑنگ شاغنگ نا مقدمہ غاتتون اوار منہ پین مقدمہ اسے ٹی ہم زموار گوندنگار۔ کم و وَد بجلی گھر پولیس اسٹیشن اٹی بی ایس او نا دا سرکڑدہ غاک 21 دے اسکان بند ئسر۔ بجلی گھر پولیس اسٹیشن نا انچارج S.H.O عبدالحمید ئس، ہرا اخلاقی رویہ نا رد اٹ شریف ءُ پولیس آفیسر اس ئسکہ، اونا رویہ دا طالب علم راہشون تتون بھاز جوان ئس۔ اوفتے تینا آفس اٹ بٹنگاکہ، وخت وخت چا ہم کنفیکہ۔ اوفتتون گپ ہم کریکہ۔ و تینا ماتحت پولیس کارندہ غاتے پاریکہ کہ اسٹوڈنٹس ءُ، دا ننا آخبت نا افسر آک ءُ، دا اخلاقی وڑ اٹ ڈوہدار افس، دافتتون جوان پیش ببو۔ اوفتتون جوانی کبو۔ دا ننا آخبت آک اریر، ملک انا آخبت ہندافتتون گنڈوک ءِ۔

ہفتئی تلار 

تاک: 37

26 Sep-02 Oct, 2020

پنہ: 03