براہوئی ادبی حوال

منہ دے مُست ای و نور خان نوابؔ بلوچستان نا تاریخی آ شار قلات آ ہنان۔ ایڑے قلات نا پنی آ راجی کارندہ موسٰی خان مینگل و خواجہ حسن حسرت تون ملاقات مس۔ اوفک ننے قلات نا شاہی دربار آ دریر۔ دا شاہی دربار یا شاہی محل ماڑی 1935ء انا زمی جمب آن مُست جوڑ کننگانے۔ دا  اسہ زیبدار ءُ ماڑی اسے۔ دادے میر احمد یار خان احمدزئی جوڑ کرفے۔ انتئے کہ داڑان مُست انا ماڑی نا حالیت جوان الّو۔ دا 1935ء انا زمی جمب اٹی دڑنگا۔ دا مُتکُن آ ماڑی قلات نا کوئٹہ کراچی شارع یعنی روڈ انا بغل اٹی ءِ، ہرا کہ مُر آن خننگک۔ مُتکُن آ بادشاہک تینا ماڑی تے مش انا زی آ بُٹ اسے آ جوڑ کریرہ، تاکہ مُر آن جلہو گیر تا جُلہو کروک آ لشکر خننگے۔ قلات نا مُتکُن آ ماڑی پنچ ڈاکہ غا ئسکہ۔ دانا جوڑ کننگ نا تاریخ نا سما اف۔ بھاز آک پارہ کہ دا ماڑی ءِ بخال آتا دور سیوا خاندان جوڑ کرفے ولے دانا پک معلوم اف۔

قلات نا دا ماڑی نا بارو اٹ بھاز آک پارہ کہ قلات نا دا ماڑی داخہ در مُتکُن ءِ کہ ہراخس قلات نا تاریخ۔ داٹی ہنداخہ در پیڑی   (بادشاہی) گِدرینگانو کہ کس اسے یات اف۔ ولے دا ہیت ءِ کُل منرہ کہ اخّس کہ بادشاہ یا خان مسنو، میری ءِ تینا تخت انا جاگہ جوڑکرینو۔ دا بارو اٹ مُست انا بھلا بندغ آتا پاننگ ءِ کہ قلات نا میری ہفت ڈاکہ مسنے۔ یعنی چار ڈاکہ بُڑزا  و مُسہ ڈاکہ شیف ڈغار اٹی مسنو۔ 1935ء نا زمی جُمب آن پد دا تمار، و داسہ دا دمب اس جوڑ مسنے، ہراٹی میری نا پاٹک آک داسہ ہم خننگرہ۔ دا میری نا شیفکو پارہ غا اسہ کُنڈ آ مُتکُن ءُ مسیت اسے، و اونا مون آ مخلوق فصل دسینے۔ داڑے دیر ارے ہندا خاطر آن داڑے کشت و کشار مننگ ءِ۔ ایلو پارہ غا کوئٹہ کراچی روڈ ءِ۔ دا روڈ آن میری تینا مُتکُن انگا شان و شرف تون زیبدار خننگک۔ ہندا روڈ انا زی آ اسہ گیٹ اس جوڑ کننگانے، ہرانا زی آ قلات نا پنی آ آرٹسٹ عبداللہ عادلؔ نا دو انا جوڑ کروک آ ماڑی نا ماڈل فائبر اٹ جوڑ کننگانے، ہراکہ بھاز زیبدار، شاندار خننگک۔ دا ماڑی ٹی قلات نا پنی آ خان مہراب خان ءِ انگریز آک 1839ء اٹی شہید کریر۔ اوڑتون سد اسے نا کچ مخلوق تُد ئس۔ اونا دا سنگت آتے ٹی دہ انا کچ بخال ہم ئسرہ۔ میر مہراب خان بخال آتے پارے کہ نُم انتئے تینے نسخان ترفرے۔ بخال آتا بھلا کھیم چند پارے کہ اگہ نن نے اِلّان تو دا نن کن شغان اس مرو۔

مہراب خان پارے ”نن تو مسلمان اُن نن شہید مرینہ۔ نُم انتئے تینے کسفنگ خوارے؟“

کھیم چند پارے، ”نن دا وطن نا باتیک اُن، نن ہم نے تون شہید مننگ کن تیار اُن۔“

میر مہراب خان اوفتے کلمہ خوانفے و اوفک بہادری ٹی جنگ کرسا شہید مسر۔  

داڑان مُست ای و نور خان نوابؔ قلات نا شاہی دربار آ ہنان ہراکہ کشتی نا دروشم اٹ بھاز زیبدار جوڑ کننگانے۔ شاہی دربار نا مون پہ مون شاہی مسیت ءِ، ہراڑے خان قلات و اونا درباریک نماز خوانارہ۔ شاہی دربار نا بارو اٹ نن شہزادہ محی الدین ہراکہ میر احمد یار خان نا مار ءِ، و ضیاء الحق نا دور اٹ بنجائی وزیر مواصلات ئسکہ، ہمے زمانہ ٹی ای و اثیر عبدالقادر شاہوانی اوڑتون بیست و یک دے چاغی، مکران و خاران نا دورہ ءِ کرین، و اودے بھاز خُڑک آن خنان۔ و ہندن او نور خان محمد حسنی ءِ ہم بھاز جوان درست کیک، ولے او نن تون مِلنگ کِن بتو۔ ہندن ایلو شہزادہ غاک ہم شاہی دربار نا مون آن تینا گاڈی ٹی گدرینگار۔ گاڈی تا مون انگا شیشہ غاتا سوب آن نن اوفتے خننگ کتون۔ ہندن اوفک قلات نا مخلوق آن ہم تینے مُر تخانو، ہندا سوب آن اوفک داسہ تو گچین کاری تیٹی ہم سرسہب مفسہ۔ اوفتا سیٹ ءِ ایلوفک کٹرہ۔ بلوچستان نا مخلوق خان تے بھاز شرف ایتک۔ او خوارہ کہ خانک ننا سرپرستی ءِ کیر۔ ولے افسوز کہ خانک،  ”پدرم سلطان بود“  نا فلسفہ غا عمل کننگ اٹی ءُ۔ دا سوب آن اوفک مخلوق آن مُر ءُ۔ بایدے کہ داسہ اوفک السی جوڑ مریر، الس نا خذمت ءِ کیر ولدا ہُرر کہ مخلوق اوفتے تیناکاٹُم آ تُولفِک یا نہ؟

منہ وخت مُست ای قلات نا پنی آ راجی کارندہ حسن حسرت تون نرمُک جوہان نا مش تیٹی ہناٹ، اے جاگہ نا سادہ انگا مخلوق کہ اوفتے ٹی نود سال نا پیر انگا بندغ آک ہم ئسرہ۔ اوفک کِسہ کرسا پاریر کہ اسہ وخت اس خان معظم الحاج میر احمد یار خان شکار کن نیچارہ گزگ آن داڑے بس، نن تون حال حوال کرے و پارے ”باوہ! سی و پاڷ اس ارے؟“ نن بھاز خوش مسن کہ او بس ننا غریبی آ تڈّا غا تُوس، ننے حال حوال کرے و نن تون اوار سی و پاڷ کُنگ۔ اسٹ اس ہکل کرے، ”نُم خان خان کریرے، خان تو بندغ اسے۔“

ہرا وخت آ کہ نن بلوچستان نا تاریخ ءِ ہُرنہ تو نوری نصیر خان، سخی آ سمندر خان، اعظم جان و میر احمد یار خان مخلوق تون مش و جبل تیٹی توڷ بش کریرہ۔ اینو ہم اوفتا مخلوق تون مہر و مریبت یات کننگک۔

ہندا دورہ ٹی ای و نور خان نوابؔ کہ براہوئی ادبی سوسائٹی نا جنرل سیکرٹری ءِ، براہوئی ادبی سوسائٹی نا کتاب آتا شش سیٹ جوڑ کرین و قلات نا پنی آ علمی و ادبی شخصیت، گورنمنٹ ایلیمنٹری کالج قلات نا پرنسپل شمس پندرانی تون گورنمنٹ ڈگری کالج قلات، گورنمنٹ گزلز کالج قلات، پبلک لائبریری قلات، گورنمنٹ داؤد خان ہائی اسکول قلات، گورنمنٹ گرلز ہائی اسکول قلات نا لائبریری کِن کتاب آتا ٹیکی تِسن تاکہ خوانوک آ مارک، مسنک دا کتاب آتیان فائدہ ہرفِر۔

ہفتئی تلار

15-21 August 2020

تاک: 32

پنہ : 4