براہوئی ادبی سوسائٹی بلوچستان نا عئید مجلس
Get real time updates directly on you device, subscribe now.
براہوئی ادبی سوسائٹی بلوچستان نا عئید مجلس تدوک آ دے تیٹی سوسائٹی نا بنجائی دفتر مبارک چوک اسپنی روڈ آ اڈ ہلک۔ دا کچاری ٹی عہدیدار و باسک آتا بھلو کچ اس بشخ ہلک۔ ہرافتیٹی ڈاکٹر رزاق صابر، وحید زہیر، حنیف مزاج، نور خان نواب، رازق ابابکی، پروفیسر حسین بخش ساجد، افضل مراد، عارف ضیاء، حسن ناصر، عزیز بیدار اسک اوار ئسر۔ دا کچاری ٹی سوسائٹی نا چیئرمین قیوم بیدار سنگت آتے بخیر کرسا اوفتا منت ءِ ہرفے و پارے کہ عیئد مجلس سوسائٹی نا روایت آتا بشخ مسنے کہ سنگت آتے عئید آن گڈ اسہ ہند آ تولنگ و کچاری نا وارخواہی ایتک۔ سوسائٹی نا جنرل سیکرٹری نور خان نواب سوسائٹی نا بروک آ کتاب و سوسائٹی نا لائخی تا اسہ جاچ اس پیش کرے کہ سوسائٹی گونڈ انگا وسیلہ غاتے ٹی زبان ادب نا خذمت کن ساندہ عمل اٹی ءِ۔ ہندن دا جار نا دنیا ٹی کورونا نا ڈاکی نا سوب آن سوسائٹی نا سالگرہ نا پروگرام ہم مننگ کتو۔ ہندن ڈاکٹر رازاق صابر صاحب ڈاکی نا رد اٹ ادب و دنیا نا راج آتیا تموک آ زہم آتیا ہیت انا بابت سوج اس تخا، ہراڑا مجلس اٹ ساڑی کل سنگت آک سرجمی اٹ گپ و تران کریر۔ دا وخت آ رازق ابابکی، براہوئی ادب اٹ کورونا نا بابت یا اوڑتون تعلقدار سرحال آتیا مروک تخلیق آتا حوال ءِ تس۔ کچاری ٹی ادب ادبی رویہ و ادب نا چندی بشخ آتیا سنگت آک گپ و تران کریر۔ و غیر رسمی آ دا کچاری دیگر آن خفتن خڑک اسکان برجا سلیس۔
ہفتئی تلار
15-21 August 2020
تاک: 32
پنہ : 6