زندان نا ڈائری         (5)    ڈسٹرکٹ جیل نا اسیر آک

علی احمد کرد:۔

علی احمد کُرد کنا خڑک انا سنگت و سینیٹر میر محمود عزیز کرد نا اِلہ نا مار ءِ۔ سیاست اودے میرات اٹ رسینگانے۔ اونا اِلہ میر عبدالعزیز کُرد بلوچستان اٹی اولیکو وار 1920ء نا نیامی تُو تیٹی سیاسی و جمہوری جہد انا بنداو ءِ تخاسس۔

ایہن تو علی احمد کرد انا مچ آ خاہوت انگریز آتا دور آن بلوچستان نا سیاست اٹی مون مستی ئسکہ ولے علی احمد کرد ءِ سیاست نا چس 14 و 15 جولائی نا نیامی شام لگا۔ علی احمد کرد ہمو دے تیٹی اسپیشل ہائی سکول نا طالبعلم اس ئسکہ۔ سیاست نا الف بے آن ہم ناواقف ئس۔ حالانکہ علی احمد کرد نا اُرا نا رہی آ اونا اِلہ مار عبدالواحد کرد نا اُرا ئس۔ ہراڑے ہر وخت سیاسی راہشون تا میٹنگ آک مسرہ۔ ولے ہموز دے و ولدا ننکان عبدالواحد کرد و علی احمد کرد نا اُرا ٹی قرآن خوانی مننگ ئس، نیاڑیک قرآن خوانارہ و خڑینک خلکرہ۔ نفل خوانارہ۔ انتئے کہ ہمو نن نا سہب تمنگ تون نواب نوروز خان نا تینائی تے سکھر و حیدرآباد نا زندان تیٹی پاہو تروئی ئسکہ۔

علی احمد کرد نا اسہ اِلہ مار اس، میر محمود عزیز کرد و آغا سلطان ابراہیم خان نا مار آغا عبدالظاہر شہید آتا میت آتا ہلنگ کن منہ دے مست سکھر و حیدرآباد آ راہی مسوسر۔ ہراتم میت آتے تالپور برادر آتا اواری اٹ ہلسا کوئٹہ غا اتنگا تو سریاب مل انا ہند آ کوئٹہ نا الس شہید آتا آخری دیدار کن یلہ مس۔ تو چنک سن آ علی احمد کرد ہم تینا باوہ و ایلو تینائی تتون اوار شہید آتا آخری دیدار کن سریاب مل آ راہی مس۔ داکان علی احمد کرد نا مزغ اٹی ظلم و بے انصافی نا برخلاف نظریہ غاک تینا روتہ غاتے سخت کریر،و وخت و دور اتون اوار اوار تالان مرسا کریر۔

علی احمد کرد ہرا کہ ورنائی آن حق گو، چُست و شرارتی ءُ مارکو اس ئسکہ۔ ہندا سوب آن اودے دا وصف آتا سوب آن اسکول آن کشار۔ اسپیشل اسکول آن او سرٹیفکیٹ ہلسا سنڈیمن ہائی اسکول اٹی داخلہ ہلک، اوڑے ہم منہ تُو آن پد اونا دوٹی سرٹیفکیٹ ءِ ترسا اسکول آن کشار۔ ولدا کوئٹہ نا اسہ اسکول اسے ٹی ہم اودے داخلہ ملتو۔ اخیر اودے اونا باوہ پیرہ ئی آ شار مستونگ نا اسکول اسے ٹی داخل کننگا۔ ہراڑے اِرا سال آن پد سیاسی خیال تخوک و ورنا وانندہ گل نا کارندہ مننگ نا سوب آن و شار انا دیوال آتیا پوسٹر خلنگ نا سوب آن اودے اونا اِلہ مار نادر عزیز کرد و ایلو سنگت آغا سرور احمد زئی و آغا سلیمان احمد زئی تون اوار دزگیر کننگا۔ تھانہ ٹی دزگیر علی احمد کرد آن سوج کننگا کہ شار اٹی پوسٹر آتے نی خلکنس؟ تو علی احمد کرد پارے ”اؤ۔“ ولے امنا کننگ آن پد ہم اوڑا بھاز بیداد کننگا۔ دا کیس اٹی علی احمد کرد و اونا سنگت آک شش تُو سنٹرل جیل مستونگ اٹی بند مسر۔ ہمو دے تیٹی مستونگ جیل اٹی میر گل خان نصیر نا بھلا ایلم میر لال بخش مینگل و اونا مار علی اکبر مینگل اسک ہم بندی ئسر۔ ہرا جیل انا دے تیٹی علی احمد کرد و اونا سنگت آتا ذہن سازی ءِ کرے۔

علی احمد کرد اونا سیاسی ہیت و گپ آتیان بھاز زہم ہلک۔ یلہ مننگ آن پد لال بخش مینگل نا خیال آتے تینا کسر نا ڈیوا جوڑ کرے و شعوری وڑ اٹ سیاسی پڑ آ مون آ بس۔

علی احمد کرد بھاز چابک و پرجوش ءُ ورنا اس ئسکہ۔ او بھاز زُوت پرجوش آ تران نا ماہر، با غان خاخر دسوک آ ترانکار نا وڑ اٹ پنی مس۔ ایوبی آمریت نا دور آن طالب علم تحریک آتیٹی راہشون نا کڑد ادا کرسا ہنا۔ گورنمنٹ لاء کالج کوئٹہ نا اسٹوڈنٹ یونین نا صدر ئس۔ بنائی دے تیٹی بلوچ اسٹوڈنٹس آرگنائزیشن اٹ ئس۔ نیپ اقتدار نا دے تیٹی بلوچ ورنا کارندہ غاتیان ئس۔ او اسہ بے چین ءُ ہروہ سے آنبار ئس۔ او مسکوہی دور تیٹی حزب اقتدار نا جاگہ غا حزب اختلاب نا بادوی مرسا اقتدار نا ایوان آتا چھت آتے کاٹم آ ہرفیسس۔ او اسہ پرجوش ءُ ترانکار اس ئس۔ ترانکاری نا کمک اٹ جوزہ غاتا چاگڑد اس ودی کننگ نا ماہر ئسکہ۔ کوکار اٹ حکومت وقت آ گروک آنبار یلہ مسکہ۔ شاری برانز آتیٹی اسُل ترندئس۔ جلسہ و برانز آتے بیدس پیش بندی آن اناگت کریکہ۔ گیشتری مچی تیٹی اناگت پاش کریکہ، تران نا بناءِ کریکہ۔ و پولیس اودے ہلککہ و زندان اٹی بند کریکہ۔ وخت وخت اس علی احمد کرد زندان آن یلہ مننگ آن پد اُرا غا ہننگ نا جاگہ غا اناگت منان چوک آ جک سلسا تران نا بناءِ کریکہ۔ مخلوق علی احمد کرد انا داپار ایپار آن مچ مسکہ، و جلسہ اس جوڑ مسکہ۔ علی احمد کرد ہمو وخت انا حکومت ءِ ہکل تسکہ۔ بنائی دے تیٹی علی احمد کرد پولیس کن ویل اس جوڑ ئس۔ اوکان پد ہراتم کہ علی احمد کُرد یلہ مسکہ، ہموزدے پولیس چوک آتیا ہشار سلیسکہ۔

علی احمد کُرد نت تیان کاٹم اسکان جہد انا بُت اس ئس۔ اونا دتر اٹ میر ٹلن خان نا دتر اوار ئس۔ اونا رغ تیٹی ظلم و بیداد نا برخلاف سلنگ، حق اکن توار چست کننگ، تینا مسخت آ سلنگ اوار ئس۔ او گوڈ خلنگ نا جاگہ غا بُک لگنگ ءِ اولیت تسکہ۔ بریبری کن بے بریبری آ تالان کانود تون ڈوک لگاکہ۔ برانز کریکہ۔ خاچوک آ ضمیر تے ٹوہاکہ۔ ہرانا پد دا مسکہ کہ اودے جیل مروئی تماکہ۔ علی احمد کُرد برانز نا پیش بندی ءِ تینٹ کریکہ، کس اسے تون سلاہ کتوکہ۔ دزگیری نا وخت آ چپ چپانی اٹ دوٹی بتوکہ، بلکن تینے کشنگ کن نت دُو خلککہ۔ علی احمد کرد آزاد منش، بے خلیس، بے داغ، بے خوف، جوشیلا ءُ ورنا اسے۔ اونا جلسہ، جلوس آتیٹی اسہ چنکو ورکر اسے نا حیثیت اٹ ای ایوب خان نا دور آن اوار مرسا ہنانٹ۔

ہفتئی تلار

15-21 August 2020

تاک: 32

پنہ : 3