بر کہ ایمان ءِ پختہ کین

ارتغل غازی سلطنت عثمانیہ نا بنداو ءِ تخوک آ اولی بندغ ئس، و دا اسلام نا ہمو چندی سلطنت آتیان اسٹ ءِ ہرافتا ذکر ننے کیہی جاگہ غا ملک۔ دا مچ آ دنیا و پاکستان اٹی تو بھاز زیادہ ہُننگوک انگا ڈرامہ سیریز ءِ ہرانا ہننگ کن مخلوق تینا کاریم زمانہ تے خل آن خلکن مِش آن ہنین کرسا بے سہب کرینے۔ کس شام آن سہب اسکان تولوک دادے ہننگ اٹی ءِ، تو کس نن درست و دے درست مسلمان تا عظیم انگا راہشون تا کڑد آ حیران مرسا جوک خلکنے ہرک۔ ہننگ تو ہننگ ءِ ولے ہندا ہننگ نا سوب آن تینے بے سہب کننگ بے پایان ہننگ اٹ تینا وخت ءِ برباد کننگ، تینا فرض، زمواری، نوکری، مطالعہ غان مون ءِ ہڑسنگ سمجھ اٹ بفک۔ پین ہم ہیت اس کنا حیرانگی نا سوب جوڑ مرسا کنے خرین مننگ آ بیوس کرے کہ ہرا وخت ای مخالفت کرسا تینا خڑک و مر انا سنگت درستی تے دانا ہننگ آن توننگ یا بھاز بے کچ ہننگ آن جلسا ہناٹ کہ تینا وخت انا ہم سوچبو دادے کم ہربو، حیرانگی ہمو وخت مس کہ ہروک آک تے ایمان تازہ مننگ نا دعویٰ ءِ کریر کہ اسلامی ءُ سیریز اسے، و دانا ہننگ آن ایمان ننا تازہ مریک، ہمو بندغ آک کنے ہم ہننگ نا تے سلاہ ترسا پاریر کہ یار نی تینٹ خدا غان خوف کر و ننے ہم الے کہ ایمان تے تینا پختہ کین۔

خیر کنے ایمان تازگی نا شرف اینو اسکان ملتو کہ ای او سیریز ءِ ہننگ کتوٹ ولے ایمان تازہ مروک آتا ایمان آ خڑینکی مسٹ کہ ہراتم اوفتا مست انا زند ءِ داسہ تون بیت تسٹ، اسہ بندغ اس روچئی نا برکتی انگا تو مسہ قرآن ختم کننگ نا شرف دوئی کریکہ دا روچہ لوز اس ہم تلاوت کننگ نصیب متو تے، انتئے کہ ارتغل نا ڈرامہ ءِ ہرانے، اسہ بندغ نا نماز آک قضا مرسا اودے سد لگپ، روچہ ٹی بیرہ میڷ آنبار با ڈک مرے ولے اسلامی سیریز ہُرے دا ایمان نا تازہ مننگ نا پن ءِ؟ ای سوج کیوہ کہ قرآن ہرا کہ تینٹ ایمان نا پختہ مننگ نا کل آن بھلا سوب ءِ، اوڑان مر مننگ ایمان نا زیات مننگ اسے؟ ہرا قوم کہ قرآن وحدیث آتا ساڑی گری ٹی ظلم، زنا، دروغ گوئی، فتنہ فساد آن پاناد مننگ کتو۔ اودے دا سیریز آک اسہ مخلص پکا ءُ مسلمان اس جوڑ کرور؟ حیرانی مریک کہ ارتغل ءِ نن و دے ہروک آتا موبائل سکرین، وٹس ایپ ڈی پی و اسٹیٹس آتیا بیرہ حلیمہ سلطان نا تصویر آک خلوک ءُ، ولے جند انا تا کڑد و عمل تیٹی ہچ ءُ بدلی خنتوٹ۔ ہندن لگک نن اوفتا ہیت آتے بننگ آن بیدس ہچ کننگ نا بود تخپنہ۔ ہندن محسوس مریک کہ ہُروک آک ڈرامہ نا تہٹی رومینس نا ہیت (چاہے او ارغ زہیفہ نا نیام اٹ مریرہ)، حسن و زیبائی پٹرہ، نہ تو حلیمہ سلطان پرستی نا جاگہ غا خدا پرست جوڑ مسرہ، و ہر عمل آن نیک پارسا مننگ نا گند بسکہ۔ ولے داڑے تو چَپی مس! بھلو پژہ اِلنگ نا رواج تما اوفتے سفا دیر کیک؟ ڈرامہ ءِ ہژدہ گھنٹہ ہننگک ولے دہ منٹ نماز کن دیر وخت کشک؟

اسہ بندغ اس کہ مطالعہ کروک کتاب نا شوقی ئس کتاب آتتون تِلفی نا سنگتی ءِ پرغسا ارتغل ءِ ہرک، نئے امتحان نا غم نئے کہ آخبت نا، بیرہ ارتغل نا سیریز آتیان ایمان ءِ پختہ کننگ نا پن آ تینے، لمہ باوہ وکل ءِ ریفنگ ءِ تو دا تباہی اف تو انت اسے؟ سوج ودی مریک کہ اگہ اینو نا ورنا بیدس خواری آن ہژدہ گھنٹہ اسہ کش آ ڈرامہ ہننگ ءِ تو داڑان انت راہشونی، سرسہبی و جانبڈ مفننگ نا اومیت تخن؟

عجب اف کہ ننا راج انا ہمو بندغ آک کہ ٹی وی ہننگ و اُراتیٹی تخنگ ءِ حرام تکارہ، اینو او ہم نن و دے ارتغل غازی ءِ ہننگ اٹی ءُ۔ اینو دا راج انا ہر بندغ دادے فائدہ تکسا بے کچ ہننگ اٹی ءِ ولے دانا نسخان آتیا ہم خن ملر تو گچین مرو۔

بلے ترکی مسلمان ملک اسے و اونا پروڈکٹ ءِ ہرن، اوفتا زرگزران ءِ جوان کننگ کن اوفتا است بڈی ءِ کین ولے دن ہم مف کہ اوفتا است بڈی ٹی تینا زند ءِ خاخر جوڑ کین۔ ہر گڑا ءِ وڑ موجب و اسہ مقرر ءُ وخت اسے آن زیات کننگ انسان کن زیار جوڑ مریک و یخین اٹ ہمو زیار اینو ننا وخت، خواری، نماز، مطالعہ و ایمان نا مرک جوڑ مسنے انتئے کہ خدا کہ ننا ودی کروک ءِ، قرآن مجید و کتاب آک کہ ننا راہشونی کروک آک ءُ اوفتے دہ گھنٹہ غان زیات تننگ نا جاگہ غا اسہ گھنٹہ ہم مشکل اسے ٹی ایتنہ و ارتغل کہ سیریز اسے، اودے اسہ گھنٹہ تننگ نا جاگہ غا نن ہژدہ (18) گھنٹہ ایتنہ، ای سوج کیوہ کہ دا تین تون تینٹ ظلم اف؟ دا تینا جند انا آخبت تون گوازی اس اف؟ دا اسہ بہانہ اسے ٹی قرآن و نماز آن مری نا بہانہ اس اف؟ عجب اف کہ قرآن و نماز آن شیطان پدی دھکہ ترسا کیک ننے و ڈرامہ سیریز آ ننے ہژدہ گھنٹہ ہننگ آ ہم ارمان ہرفک؟ لگک دا سیریز شیطان نا ہم ایمان کن بھلو دَک اس خلو۔ ولے ننا آخبت نا انت؟ دا قوم انا انت مرو ہراٹی کہ آخبت اٹ کتاب دوست ءُ بندغ نا جاگہ غا سیریز ہروک ءُ نسل اس کاٹم ہرفو؟

ہفتئی تلار
تاک: 28
30-24 جولائی 2021ء
پنہ: 08