کورونا ……انت انت مریک مون آ؟

اسہ دے تینا پسند نا کالم نگار خلیل احمد شہی نا کالم اس خواناٹ، باسنی نا چھٹی تے گدریفنگ کن او کینیڈا کن پلاننگ کرے۔ او نوشتہ کیک کہ اونا پانزدہ دے نا چھٹی کورنٹائن، قبر، تنیائی، مایوسی نا گواچی مسر۔ او نوشتہ کیک کہ جہاز اٹی سوار مننگ تون پڑو مس کہ کس ءِ کس اتون ہیت کننگ نا موکل اف۔ ہرکس تینا ماسک ءِ جوان وڑ اٹ بینے۔ ہندن دبئی ایئرپورٹ و مستی کینیڈا ٹی ہوٹل اٹی یکہ یکہ تینے کورنٹائن کرسا جوڑ کریر۔ ہوٹل نا درگہ غا کنوئی آ گڑا تے تخارہ۔ نن ہموکان اوفتے ہرفینہ، ہر سہب اتون ننے ای میل اس بسکہ، نم امر جوڑ خیر اٹ اُرے؟ نمے اِڷ زکام تو اف؟

اِرا سال مننگ ءِ کورونا نا ڈینڈ و پھڈا ختم مفک؟ داسہ تو ویکسین ہم بسنے، سر مسنے۔ ولے حالیت دادے کہ مخلوق ءِ زور اٹ حکومت ویکسین خلفک۔ مخلوق ہندن نرک، دن کہ ہیٹ چاخو آن۔ ننا 90 درسد آن زیات مخلوق داسکان منپک کہ کورونا اسہ ناجوڑی اس ارے۔ ہندا سوب آن ویکسین نا بابت وڑ وڑ انا ہیت آک ءُ، سوشل میڈیا غا ہُر کہ اسہ بابا اسے نا ویکسین کروک دُو چکمک لچک۔ اسٹ نا دُو آ بلف اس روشنا مریک۔ دا اخس غیر سائنسی و کامن سینس نا برخلاف ہیت اریر۔

ولے زیات مخلوق ہندافتیا بھروسہ کیک۔ کنا شار اٹی حالیت دادے کہ ویکسین سینٹر ءِ اول سرکار ہسپتال اٹی تخا، ولدا ہندا پرمان جاری مس کہ ہرکس تینے رجسٹریشن کے گڑا اودے ٹُکہ خلیرہ۔ کس اس دانگ مون کتو۔ ہراٹی چِل سال آن رعایت کرسا سی سال کریر، حکومت نا خیال ئس کہ دا اِرا سال ءِ ہرا وڑ کورونا نا خلیس تالان مسنے، ٹُکہ خلفنگ کن مخلوق شولنگو۔ ولے حالیت دادے کہ اینو ویکسین سنٹر آک بازار نا نیام اٹ چوک آ کیمپ آنبار لگوک ءُ۔ اے سی صاحب ایلو افسر آک زور اٹ مخلوق ءِ پارہ کہ تینے ویکسین کبو، مخلوق دو تفک۔

کنا تینا تعلقداری طب اتون ءِ، ولے ای ”ماہر وبائی امراض“ اس افٹ۔ اگہ دَین انا ہیت مرے تو بھاز آ دینک دنیا ٹی بسنو، ہرا شار اٹی بسنو، شار اٹی مرک انا چاپ ءِ ایسنو۔ یا تو فریشانی تے ہر اُرا اسکان ایسنو۔ منہ تو مست ہنداڑے سورک (خسرہ) نا دین تما۔ دن ءُ اُرا اس اَلو کہ اوڑے چنا سے دا ہلتو۔ کنا جند انا اُراٹی کیس مون آ بس، ولے کورونا اگہ دَین اس ارے، ہم ای دادے نئے تینا پریکٹس اٹی خناٹ، نئے شار انا ہمسائے سے آن بنگٹ، نئے دوست، عزیز، سنگت، رشتہ دار اس (مننگ کیک کہ کنا اندازہ غلط مرے) ارٹمیکو دا دین انا وڑ وڑ انا وڑ و ڈَول، و ہر ملک انا جتا ءُ وائرس اس، اخبار آتیٹی بریک۔ فلانی جاگہ غا افریقی کورونا نا وڑ ءِ خنار، فلانی جاگہ برطانوی وڑ انا، فلانی جاگہ ہندوستانی وڑ، دا گڑاک بتّر مخلوق ءِ فریشان کرینو۔ طبی چاہندار آتا و حکومت نا زمواری ءِ کہ اگہ اوفتتون جائی نا راستکی اس ارے تو مخلوق نا مون آ اودے تالان کیر۔ انتئے کہ ننا طبی چاہندار آتا دا کاریم اف کہ اوفک اسہ ریسرچ ورک اس اڈ ترسا دا معلوم کیر کہ اگہ دا وائرس جائی ارے تو ننا علاقہ، ننا مخلوق، ننا ملک انا آب و ہوا، ننا مخلوق نا ’مخصوص قوت مدافعت‘ دانا مون اٹی اڑاند اسے۔ یا داڑکن موقع اسے؟ طبی چاہندار آتا بیرہ کاریم ہندادے کہ فیس مچ کروک ءُ مشین جوڑ مریرہ۔ تینا کمیشن کن مخلوق ءِ اسُل کہ باچکو اس دارو لکھر ایتر، و عیاشی اٹ زند ءِ تیر کیر۔ اسہ تعلیم یافتہ ءُ راج اسے نا چاہندار بندغ نازند انا خواریک بیرہ ہندا اریر ہرا کہ دنیا ٹی دا وائرس نا زی آ کاریم کریر۔ ویکسین آ کاریم کریر، اگہ اوفک ہم بیرہ فیس، کمیشن اسکان سلوک مسرہ، تو دنیا ٹی اینو نئے بیرہ کورونا بلکن ہر دین تینا زور اٹی مسکہ۔

ہفتئی تلار
تاک: 28
30-24 جولائی 2021ء
پنہ: 05