زیبا غا مکران ……سیل و چکر……(10)۔

ماڈل شار تربت:۔

مکران بیلٹ آ 2008ء آن ہِن و بر اَرے۔ کنا اولیکو نوکری ہم (Telecom) نا بشخ اٹی پرائیویٹ ئس۔ Eriesonibe اسہ بھلو جہانی کمپنی اسے، ہراڑتون مچ آ دنیا نا اسہ بھلو کاروبار اس ئس۔ پاکستان اٹی ”وارد“ و ”زونگ“ نیٹ ورک ءِ ایکیوپمنٹ (Equipment) (گڑا) فراوانی و اوفتا نیٹ ورک نا برجائی و گچین آ آب ہندا کمپنی نا زمواری ئس۔ ای بلوچستان اٹی این جی او (NGO) سائٹ ورک پرفارمنس آپٹائیمائزیشن Network Performance Optimization بشخ اٹی اوفتا اسٹ انگا بندغ ئسٹ۔ و کنا زمواری صوبہ بلوچستان اٹی ”وارد“ نا ہراڑے ہراڑے ٹاور آک ئسر، ہمو جاگہ نا نیٹ ورک نا باقاعدہ سروے کننگ، و دا سروے نا رپورٹ آتے مچ کننگ ئس۔ ”وارد“ نا ہمو وخت اٹی مکران بیلٹ اٹی مچ آ صوبہ نا مون اٹی زیات ٹاور ئسر، ہرا مند شار آن مرسا تربت شار و ولدا گوادر شار آن ہلیس پسنی شار و گوادر آن پسنی قومی سڑک نا ہڑتوم آ پارہ غا دا ٹاور آک لگوک ئسر۔ کنے کم و وَد ہر مسہ تُو اٹی اسہ وار مکران نا دورہ ءِ کروئی تماکہ۔ ہندا سوب آن تربت آ ہِن و بر ہر وخت نا کاریم ئس۔ ہمو وخت انا تربت شار و داسہ نا پوسکن آ تربت شار اٹی ڈغار و آسمان نا پرخ ءِ۔ ہمو وخت اٹی بے ایمنی ہم بھاز ئس، تربت شار یا دانا دارہ ایرہ اٹ سفر کننگ بھاز سخت ئس۔

تربت شار اسہ بھلو خلق اسے آن زیات ہچ اَلو۔ بھلا شار اٹی ہچ ءُ جوان ءُ ماڑی و زیبا ءُ چوک اَلو، نئے سڑک آک بھلن ئسر۔ بھلا شار اٹی اوغان تا جھگ آتا دکانک ئسر۔ ہرافک اسہ قطار اسیٹی جوڑ ئسر۔ و اوڑے میوہ، سوزی، دال و پرچون نا اسٹور نا دکان تیٹی گڑاک سودا مسرہ و دا جُھگ آنبار آ دکان تا پد اٹی ”ایلم“ تا جاگہ ئس، داڑان بیدس تربت آن مند انا سڑک آ ہنوئی مس۔ تربت آن ہوشاب آ و تربت آن بلیدہ و الندور، کوشک آ ہنوئی مسکہ۔ پنوک آ سڑک آتیان بیدس ہچ اس ہم الو۔

ولے داسہ دا شار انا نشخہ اسُل بدل مسنے۔ تربت شار اٹی بریس تو نمے اسہ خوشی اس مریک۔ اگہ ای دا پاو کہ تربت شار انا دا زیبائی و شونداری کوئٹہ شار ءِ ہم پدی الانے تو غلط مفرو۔ تربت نا خلق آک ہمون مرور، امر کہ مُست ئسر، انتئے کہ دا وڑ انا شونداری مننگ کیک کہ بروک آ کرن اٹی ہم مف۔ ولے شار انا ترند آ شونداری مچ آ بلوچستان ءِ حیران کرینے۔ و دا مچ آ شونداری ٹی ہمو وخت انا وزیراعلیٰ ڈاکٹر عبدالمالک بلوچ نا بھلو دُو اسے ہرانا کوشست، خواری و تربت شار اتون مہر و ہمو جاگہ نا بندغ آتا گچین آ زند انا است خواہی دا پوسکن آ شار انا دروشم اٹی مون آ بسنے۔

ببو داسہ مچے تربت شار انا دا زیبائی تا نم تون ہیت ءِ کین۔ تربت شار 7.5کلومیٹر نا علاقہ ٹی ئس۔ ولے ڈاکٹر عبدالمالک بلوچ نا وخت اٹی دا شار اکن اسہ بھلو منصوبہ اسیٹ دادے 7.5 کلو میٹر آن ودفسا 450 کلو میٹر آ تالان کننگا، و دا وڑ اٹ منصوبہ جوڑ کننگا کہ بروک آ چندی سال آتسکان ہمو جاگہ نا آباتی کن گنج اسے۔ دا پوسکن آ شار انا ڈٹ بندی کرسا دادے پنچ شونداری ہند اٹی بشخنگا، و صوبائی بجٹ اٹی فنڈ سالی بنداو آ تخنگا۔ دا مچ آ ڈٹ اکن 5000ملین روپئی آن زیات پیسہ تخنگا، کہ دا شار دا بھلا ڈٹ سرجم مرے۔ اولیکو بشخ اٹی شار انا ہمو متکن آ بنجائی بشخ اوار کننگا، ہرا 7.5 کلومیٹر آ تالان ئس۔ داڑان بیدس M-8 ہرا سوراب گوادر سی پیک سڑک ہم پاننگک۔ داڑتون اوار راستیکو پارہ غا ارا بشخ انا ڈٹ ہم اوار کننگا۔ داڑے سڑک، اڈہ، سوزی مارکیٹ، کولڈ اسٹوریج و اُرا تا جوڑ کننگ اوار ئس۔ وخت اس کہ زون 3 اٹی ہرا کہ M-8 آٹے، ہمو ایجوکیشن سٹی و ہاؤسنگ اسکیم نا رد اٹ جوڑ کننگا۔ زون 2 و زون 3 داسہ نا شار انا قطب ءِ۔ وخت اس کہ دانا سویل اٹی زون 4 و زون 5 ارے۔ ہرافتیٹی بس اڈہ و ہاؤسنگ اسکیم وخت اس کہ زون 5 اٹی ہاؤسنگ اسکیم و واپاری ہند آک جوڑ کننگانو۔

ڈاکٹر عبدالمالک بلوچ نا حکومت اسہ عہد نامہ اسے نا رد اٹ جوڑ مس، ہرانا وخت و پاس دو نیم سال ئس۔ ہرا کہ 7 جون 2013ء آن بنا کرسا 23 دسمبر 2015ء آ ایسر مس۔ کنا نظر اٹی ہرا شونداری کاریمک جوان وڑ اٹ دا پوسکن آ شار اٹی اسہ درزن آن زیات سڑک ہرافتا کشادئی، پھل آتا جاگہ، اسٹریٹ لائٹ داکان بیدس مچ آ شار اٹی زیباءُ چوک آک دن کہ تعلیم چوک، ایئر پورٹ چوک و پین اوار ءُ۔ داکان بیدس بھلا شار اٹی متکن آ دکان تے دڑفسا پوسکن دکان و ماڑی تفنگانے، ہرافتے خننگ تون بندغ اوفتا ستا ءِ کننگ آ بیوس مریک۔ دا بھلا بشخ اٹی گوازی تا میدان و پارک ہم جوڑ کننگانے کہ مخلوق داڑے برسا تینا دم درینگ انگ ءِ مُر کے۔

اسہ ہیت اس ہرا داسہ ہم دا بھلا بشخ اٹی جوڑ کننگتنے او دا جاگہ نا تنک انگا گلی، و مُتکن آ دکانک ءُ۔ وخ کہ دافتیا ہم خیالداری کننگاکہ، تو شار انا دا بشخ اٹی ہچ ءُ کمبوتی اس سلتوکہ۔ سول ہسپتال تربت آن پیش تمنگ آ نن تینا گاڈی ٹی بھلا شار انا ہمو جاگہ ءِ ہُننگ کن ہنان و کسر اٹی جوان ءُ گپ خلسا کرین۔ کنا کوئٹہ غان راہی مننگ آ دا است خواہی ئس، ای ہموڑے میڈیکل کالج و یونیورسٹی نا ہم دورہ ءِ کیو۔ ہندا سوب آن کنا دا است خواہی تے خواجہ یاسین بلوچ ہڑتوم آ ادارہ غاتیٹی رابطہ کرسا پورو کرے۔ ہرا وخت ننے ”مکران میڈیکل کالج تربت“ آ سر مننگ کن تننگاسُس، ہمو وخت آ نن ہموڑے سر مسن۔

مکران میڈیکل کالج تربت:۔

کم و وَد 12 بجہ نا وخت آن زرہ اس مست نن M-8 سڑک آن گدرینگسا میڈیکل کالج نا بھلا درگہ غا ئسن۔ بھلا درگہ غان دا گچین آ میڈیکل کالج نا تہہ زیبدار خننگاکہ۔ خواجہ یاسین کالج نا وائس پرنسپل خواجہ ڈاکٹر اسلم بلوچ تون رابطہ کرے تو بھلا درگہ غا سیکورٹی آسلوک آتے ننا بننگ نا کلہو ءِ تسوسُس ہندا سوب آن ننے تہٹی ہننگ نا موکل ملا۔ نن کالج نا تہٹی پیہان تو مون مقابل اسہ گچین ءُ Monument اس خلوک ئس، ہراڑا میڈیکل اخلاقیات Medical Ethics نا رد اٹ قول آک نوشتہ ئسر۔ ای خڑک آ ہنسا دافتے کل ءِ جوان خواناٹ اوفتا جوان ءُ اثر اس تما، و اُست اٹی دعا ہم کریٹ کہ اللہ کے دا کالج نا اولیکوطالب علم آن ہلیس بروک آ وخت انا مچ آ خوانوک آک دا جوان انگا ہیت آتے خوانر و دافتیا عمل ہم کیر و مچ آ زند پیسہ کٹنگ نا جاگہ غا انسان تا خذمت ءِ ہم کیر۔

دا میڈیکل کالج اسہ جوان ءُ کاریم اسے، دانا تہٹی ہننگ تون و مچ آ بشخ آتا جاچ ءِ ہلنگ آن دا اندازہ مریک کہ اسہ گچین ءُ وڑ اسیٹ ماڑی جوڑ کروک ءِ۔ خبر اف کہ دا ہرا جاگہ نا انجینئرنگ نانمونہ اسے۔ ولے تینا مٹ تینٹ ئس۔ نن کل گاڈی آن دڑنگاسُن گاڈی ءِ ہم اسہ کشادہ ءُ پارکنگ اٹی سلفیسن۔ ڈاکٹر اسلم بلوچ صاحب ننا انتظاری ئس۔ ہندا سوب آن ایڈمن بلاک اٹی اوڑتون ملان۔ و کالج نا پرنسپل نا کمرہ ٹی کرسی آ تولوک ئس۔ انتئے کہ ہندن بنگن کہ پرنسپل خواجہ ڈاکٹر عبدالرؤف شاہ صاحب منہ وخت آن بننگ اٹی اف۔ ہرانا سوب آن مچ آ کالج نا بست و بند آک ڈاکٹر اسلم بلوچ صاحب نا زمواری ٹی ئسر۔ پرنسپل صاحب نا کمرہ ٹی پیہان، او بش مس ننے بخیر کرے۔ و ننے تولفے و حوال کرے۔ ننا چاہنداری کرفنگا دا مچ آ مجلس اٹی اونا مون ملوک ئس، و وخت وخت اس ٹاکو ہم خلککہ۔ ہیت و گپ انا وخت آ دا خبر تما کہ مچ آ بلوچستان اٹی اولیکو میڈیکل کالج 1972ء اٹی جوڑ کننگا۔ داڑان مُست داڑے ہچ ءُ میڈیل کالج اس الو۔ دا ہیت آ حیرانی تون اوار افسوز ہم مس کہ اگہ بلوچ آتے پاکستان نا بشخ خیال کننگک تو آجوئی آن پد بیست سال اسکان داڑے انتئے دن ءُ ادارہ جوڑ کننگتو۔ مچ آ صوبہ ٹی بیرہ اسہ میڈیکل کالج اسے، او ہم 1972ء اٹی۔ خیر دا میڈیکل کالج نا زیبائی ءِ خننگ تون اُست جم مس۔ دا میڈیکل کالج ءِ ہم قوم پرست جماعت اس جوڑ کرے، سردار عطاء اللہ خان مینگل ہموتم وزیر اعلیٰ و گل خان نصیر وزیر تعلیم ئسکہ، ڈاکٹر عبدالمالک بلوچ ہراتم نواب بگٹی نا کابینہ ٹی تعلیم نا وزارت ءِ دوئی کرے تو ہمو زمانہ ٹی ہم او تعلیمی بدلی تیا بھاز کاریم کرے۔ ہندا سوب آن ہراتم او صوبہ نا وزیراعلیٰ جوڑ مس تو ہم مچ آ صوبہ ٹی میڈیکل کالج، گڑاس کالج آتے یونیورسٹی نا درجہ تس و منہ ضلع ٹی بلوچستان یونیورسٹی نا چندی کیمپس آتے جوڑ کرے۔ مکران میڈیکل کالج تربت ہم ہندا کالج آتیان اسٹ ءِ کہ ہرانا بست و بند داسہ ڈاکٹر عبدالرؤف شاہ صاحب و ڈاکٹر اسلم بلوچ صاحب نا زمواری ٹیءِ۔

(برجا ءِ)

ہفتئی تلار

تاک:04

07-01 جنوری 2022ء

پنہ: 03