خواجہ حبیبو تون لوامز اٹ ادبی دیوان

لسبیلہ یونیورسٹی اوتھل نا برہوائی ادبی کچاری کاروان اسے نا وڑ اٹ سال اس مست انا سے کاریم کننگ اٹی ءُ، اوفک تینا زبان کن مجلس اڈ ترسا بسنو، دا رد اٹ اوفک وخت ویل آ تولنگ، کچاری، شاعری و نثر انا زی آ ہیت و گپ کرینو۔ ابرار برکت کون انگا سنگت آتا جہد و خواری تیان اینو چندی شاعر و ادیب آک اسیجا مسنو، تانکہ لوامز اٹ براہوئی ادب نا پن اٹ تینا زبان کن تینا کاریم تے مون آ درسا کیر۔

ہندا نہادی و یادگار انگا کچاری و مشاعرہ غاتیان اسٹ 12 جنوری 2022ء نا شام نہہ بجہ غا ہم اڈ تننگ نا ہیت ہیت مننگ ئس، کہ دا کچاری و مشاعرہ ءِ ہنین و گچین انگا سنگت آک تینا بننگ و ساڑی مننگ آن گچین و زیبدار کریر۔

مشاعرہ دیگر تون سے 3 بجہ نا وخت ہنگول ہاسٹل اٹی اڈ تننگا، ہرانا خاص انگا مہمان ملک حبیب اللہ حبیب، عرف حبیبو ئس، کہ تینا اناگت انگا بننگ تون دا مجلس نا زیبداری و روشنائی ٹی ودکی کرے۔

مجلس نا اعزازی مہمان ابرار برکت بلوچ ئس، ہراکہ بھاز وخت آن پد لوامز ادبی دیوان ءِ تینا ہنین انگا ہیت آتیٹ زیبداری و بِشخندہ نا اسہ کچاری اس تس۔

دا محفل اٹ ایلو بشخ ہلوک انگا سنگت آک کل لوامز یونیورسٹی نا لسانیات و ادب نا اسٹوڈنٹ آک ئسر، اوفتیٹی احسان اللہ بلوچ، شاہ رخ بلوچ، نجیب یسین بلوچ، نثار قمبرانی، عرفان بلوچ، ماجد بلوچ، قدوس بلوچ و محمد خان قمبرانی اسک اوار ئسر۔

کم و وَد گیشتری سنگت آتا ننا خواجہ حبیبو تون اولیکو دیوان ئس، ہراٹی بھاز است خواہی و مہر اٹ بشخ ہلنگا و دیوان نا بنا سنگت آتا درستی راستی و تعلیمی بیک گراؤنڈ آن مس۔ مننگ کیک ہندا سوب ئس کہ درستی راستی آن پد زو خاص انگا مہمان خواجہ حبیب محفل ءِ لسانیات و ادب نا اسٹوڈنٹ آتیان سوج اٹ زیبائی بشخا، کہ نما ڈگری ننا زبان کن اخس فائدہ مند مرو؟ نم دا وخت اسکان تینا زبان کن اخس کاریم کرینرے؟ ہندا و ہندن انگا پین چندی سوج آتے چست کرسا دیوان براہوئی زبان نا ادب، بھلنی و امیر انگا زبان تیٹی بننگ و بفننگ نا زی آ شرہ غا سر مس، ولے مننگ کیک وخت انا کمتی نا سوب آن دا سرحال آ سنگت آک زبان کن تینا خذمت آتیا ہیت کننگ آن پد بھاز زوت شاعری مشاعرہ و سنگت آتے بِننگ نا کنڈ آ بسر۔

مشاعرہ نا بنا لوامز براہوئی ادب نا سنگت آتیان مس و شین اٹ ہر کس تینا خیال، شاعری شاعری تے بنفسا دیوان اٹ اسہ جوش اس ودی کرے۔ گڈ سر اٹ اعزازی مہمان ابرابر برکت و اوکان پد خواجہ حبیبو تینا گچین و پنی آ شعر تیان منٹ پارسا محفل ءِ جان بشخار۔ ہمو منہ منٹ روشنائی، علم و نور و قوم اکن کلہو آن شُپ ئسر۔ یخین اٹ ہمو روشنائی، است خواہی و سنگت آتا بے مٹ انگا لوز آک گیرام مفرور۔ ہر گڑا است آن ہنو ولے اُست اٹ سلور تو مدام دا دیوان نا لوز آتا چاشنی، بشخندہ و سنگت آتا ہنین و علم آن پر انگا لوز آک ہراکہ بے مٹ ئسر۔

محفل وخت انا پورو مننگ آ پرغنگا، و سنگت آتے یا تولوک آ ادیب و شاعر آتے اسہ وار پدا وخت انا دا بے رحمی آ خار بس کہ دن جوان انگا کچاری ءِ ہم وخت ہنا تین تون درے۔ سنگت آتا است یخین اٹ ہمو محفل نا خمار آتے ٹی گوہنگوک، ٹَنگ و لڑونج ئس کہ ہر کس او محفل نا ختم مننگ آ وخت و گھڑی ءِ پد پِٹسا موکل کرے۔

بروک آ مہمان تے کن استاد عالم نا پنی آ شئیر اس است آ برسا کرے کہ:

است اواری ہیل کرینے

است آ مرے بس ہمرائی

سختی نن تا دے تو ہنوءِ

توبہ خلق آن تنیائی۔۔۔۔۔

ہفتئی تلار

تاک:04

28-22 جنوری 2022ء

پنہ: 05