سلاہکارک سلاہکار سلتوس

ہنار اے وخت آک کہ سلاہکار سرسہبی، ڈکھ و ویل آتیان کشنگ نا علامت تکنگاکہ۔ ہر بھلا بندغ تین تون سلاہکار تخاکہ، سردار و سرکار نا سلاہکار مسرہ۔ بیربل و مُلا دوپیازہ غانبار مخلوق اوفتے بے چیٹ خیال کریکہ، ولے اوفک ہم ملنڈ و مسخرہ اٹ عقل و دانش نا ہیت ء ِ کریرہ۔ تینا کماش آتے ہڑ و جنجال آتیان کشارہ۔ چندی غانڈ ہلوک معاملہ غاتیان بندغ آتے کشارہ۔ اوفتا جاگہ ء ِ خوانندہ و زوراور آ سلاہکار آک ہلکر۔ ہرافتا پن تو سلاہکار نا ء ِ، ولے او چاپلوسی ٹی بیرہ کماش نا ہر فیصلہ غا اؤ کیرہ۔ او خواجہ نا بے کاٹم آ ہیت آتیا ہم واہ واہ کیرہ۔ و بھاز انگاک تو سلاہ نا وخت آ پارہ ”خواجہ کنا ہم ہندا خیال ء ِ۔“ مجال ء ِ اوفتے ٹی داخہ در وس مرے کہ او خواجہ نا بے ڈول آ فیصلہ غان اودے تورر۔ یا راستی ء ِ پاش کننگ نا جیرت ء ِ کیر۔ ہندا سوب ء ِ کہ اینو ننا دامون ایمون بڈ اس سلاہکار آتا مننگ آن گڈ ہم جوان ء ُ فیصلہ مفننگ اٹی ء ِ۔ بلکن ہرا بندغ، ادارہ، کمپنی سلاہکار تخک ہمو ڈبینگک۔ ہندا سوب آن انگریز سلاہکار نا پن ء ِ بدل کرسا تھنک ٹینک تخا، و پدا ہرا بندغ ہرا بشخ اٹی لائخی اس تخک، اودے ہمو بشخ انا تھنک ٹینک اٹی اوار کیک۔ سیاست، زرگزران، تعلیم، کشت و کشار، مالداری، سائنس و ٹیکنالوجی، مطلب ہر بشخ انا لائخ آ بندغ تینا لائخی نا کچ اٹ زمواری تے ہرفک۔ ننا دا حال ء ِ ہرا سائنس و ٹیکنالوجی نا الف بے آن واخب اف، او سائنس و ٹیکنالوجی نا سلاہکار ء ِ۔ ہرا جانجوڑی نا اصول و قاعدہ غاتے تپک، او جانجوڑی نا سلاہکار ء ِ۔ ہندن ہرا بشخ آ دُو تخس، اوڑے ناولد آ سلاہکار آک تولوک ء ُ۔ ننا تو کماش آک ہم کم افس۔ او ہم ہرا بشخ انا کماشی ء ِ کیرہ، اوفک ہم نِلا نا خوانندہ ء ُ۔ اگہ کس دا پاہک کہ کماش نا ہچ ء ُ قصور اس اف۔ ہر گڑا نا قصور سلاہکار مریک۔ کماش تو دا ملک انا مجبوری ء ِ، دن کہ وزیرک بیرہ تینا زوراوری یا پارٹی نا ٹکٹ آ وزیر جوڑ مریرہ۔ اوفتے کن خوانندہ یا تروک آ محکمہ نا زمواری نا رد اٹ ہنر تخنگ المی اف۔ گڑا نن ہُرن کہ اونا شیف آن تولوک آ سیکرٹری ہمو محکمہ نا رد اٹ ہرا ہنرمندی ء ِ تخک۔ سیکرٹری سے اودے ہرا محکمہ ء ِ ایتس، اونا کاریم ء ِ کہ شیف انا تیا بھروسہ کے۔ گڑاس خراب مس، گڑا پارہ کہ او تو بیرہ انتظامی کماش ئسکہ۔ اگہ دادے کش ایتس گڑا محکمہ سے نا بڑز آن ہلیس شیف اسکان کل انا ہندا حال مریک۔ ہندا سوب آن محکمہ غاک بے سہب ء ُ۔ لس مخلوق نا کاریمک مفننگ اٹی ء ُ کہ بندغ اسے نا کاریم سلاہکار در سلاہکار آتا دوٹی تمک۔ کل اسہ فائل اسے دا کاٹم آن ایلو کاٹم اسکان مریفسا دیرہ۔ بھرتیک نما مون آٹو۔ پیسہ اٹ منصب ہلوک آک مش کاریم کرور۔ وزیر پیسہ نا زور اٹ گچین کاری تیان گڈ او منصب اسکان سر مریک۔ بھاز انگا بھرتی مروک آک پیسہ و سفارش اٹ بریرہ۔ وزیر تا محکمہ غاتیٹی سیاسی بنداو آ سلاہکار آک منصب اسے نا خواجہ مریرہ۔ دا حساب اٹ ننا دیک ننا وخت پوک اف، تو پین انت مرے؟ سیاست آن اعتبار مُر مف پین انت مرے؟  لس بندغ حکومت آتیان نااومیت مف پین انت مرے؟ ملک آک مخلص و ایماندار آ کماش آتا ثواب اٹ شون ہلیرہ۔ ادارہ غاک لائخ آ بندغ آتا خواری و ایمانداری اٹ سوگو مریرہ۔ ملک انا پی آئی اے تباہ، اسٹیل مل تباہ، ٹی وی و ریڈیو تباہ، تعلیمی ادارہ غاک تباہ، او ہرا زند انا بشخ ء ِ کہ بندغ اوڑا دو تخے و شاباسی ایتے تے۔ ادارہ غاتا کماش آک نابود ء ُ، کانود نا مہار کانود پرغوک آتا دوٹی ء ِ۔ میڈیکل اسٹور و کلینک آتے نا خوانندہ و پیسہ کن نت و دو خلوک آک چلیفنگ اٹی ء ُ۔ ہرافک انتظامی معاملہ غاتے کن گچین کننگانو، ہموفتا بامس نا کیرغ آن کبینی بڑینک تننگ اٹی ء ِ۔ مطلب نرخ آک بال کننگ اٹی ء ُ۔ بیدس افسوز آن انت مننگ کیک؟ ہوغنگ و دو تے خوشکنگ آن بیدس پین کسر سلتنے۔ بلوچستان دا باندات اِرا چار گام مون آٹے۔ انتئے کہ داڑے است ہشوک ء ُ منہ بندغ ہم افس، ہرا کہ گڑا سے آ واکداری نا خواجہ مریر۔ داڑا راہشون آتے ٹک خلوئی ء ِ۔ اسلام تون سوگو تعلقداری نا دعویٰ کروک آتے تینا آخرت ء ِ مون آ تخوئی ء ِ۔ بلوچستان نا لس بندغ آتے انسان تکوئی ء ِ۔ اگہ کس خواہک جوان ء ُ راجی زند اسے نا کماشی آ شاباسی خنے تو او نابود آ سلاہکار آتیان جان خلاسی کے۔