بلوچستان، سیکورٹی فورس آتا اِرا کارروائی ٹی 9 دہشت گرد آتے خلنگار،آئی ایس پی آر
وڈھ و کچھی ٹی انٹیلی جنس بیسڈ آپریشن نا وخت آسیکورٹی فورس آک دہشت گرد آتا ہند آتے بھس کریر،بیان
Get real time updates directly on you device, subscribe now.
راولپنڈی‘اسلام آباد، سکیورٹی فورس آک بلوچستان نا ضلع کچھی و وڈھ اٹ بھارتی پراکسی ’فتنہ الہندوستان‘ تون تعلقدار دہشتگرد آتا ساڑی مننگ نا اودیم حوال آتیا اِرا کارروائی کریر، ہرافتے ٹی 9 دہشت گرد خلنگار۔ آئی ایس پی آر نا رداٹ ضلع کچھی ٹی انٹیلی جنس بیسڈ آپریشن نا وخت آسیکورٹی فورس آک دہشت گرد آتا ہند آتے بھس کریر۔ اسہ ایلو آ بھاز سم کاری آن پد بھارت نا کاٹم خواجہی ٹی کاریم کروک 7 دہشتگرد ءِ دوزخی کننگا۔ کارروائی نا وخت آسلہہ و منچر ہم دوئی کننگا۔ ضلع وڈھ اٹ کروک اسہ پین اودیم کارروائی اسے ٹی سیکورٹی فورس آک دہشت گرد آتا ہن وبرءِ خنار و اوفتے گھیڑ کریر۔ اسہ ایلو آ بھاز سم کاری آن پد بھارت نا کاٹم خواجہی ٹی کاریم کروک پین 2 دہشتگرد خلنگار۔ واقعہ نا جاگہ غان سلہہ و منچر ہم دوئی کننگا۔ علاقہ ٹی ساڑی ایلو بھارتی مخ تف دہشت گرد آتا چٹفنگ کن سینیٹائزیشن آپریشن برجا ءِ۔ نیشنل ایکشن پلان نا فیڈرل ایپکس کمیٹی نا منظور کروک آ وژن ”عزمِ استحکام“ نا رداٹ سیکورٹی فورس و کانود نافذ کروک ادارہ غاتا دہشت گردی تور انا نزور مفروک مہم پورو واک اٹ برجاسلک تانکہ ملک آن پیشن نا کاٹم خواجہی و مخ تف دہشت گردی نا ناچوڑ ءِ پورو وڑٹ چٹفنگ مرے۔وزیراعظم محمد شہباز شریف بلوچستان نا ضلع کچھی و وڈھ اٹی فتنۃ الہندوستان نا دہشتگرد آتا برخلاف سرسہب کارروائی تیا سیکورٹی فورس آتے خراجِ تحسین پیش کرینے۔ پی ایم آفس میڈیا ونگ انا کنڈآن جاری بیان نا رداٹ وزیراعظم بھارتی کاٹم خواجہی ٹی کاریم کروک 9 دہشتگرد ءِ خلنگ آ سیکورٹی فورس آتا افسر و کارندہ غاتاکسبی لائخی تا ستاءِ کرسا پارے کہ دہشت گردی نا سیخا نا ملک آن پورو چٹفنگ اسکان دانا برخلاف جنگ ءِ برجا تخنہ، دہشت گردی نا پورو چٹفنگ و ملک اٹی مدامگی امن کن سیکورٹی فورس و کانود نافذ کروک ادارہ غاتا کوشست آک ستا کڑزرہ۔ وزیراعظم پارے کہ پاکستان نا سلامتی و امن ءِ نسخان رسیفوک دہشتگرد آک تینا پراگندہ مسخت آتے ٹی اسُل سرسہب مفسہ، کنتون اوار مچ آ قوم دہشت گردی نا چٹفنگ کن سیکورٹی فورس آتا نزور مفروک ارادگی ٹی اوفتتون ہم کوپہ سلوک ءِ۔ صدرِمملکت آصف علی زرداری بلوچستان ضلع کچھی و وڈھ اٹی بھارتی کاٹم خواجہی ٹی کاریم کروک دہشتگرد آتے خلنگ آ سیکورتی فورس آتے خراجِ تحسین پیش کرسا پارینے کہ دہشت گرد آتا پیشن نا کاٹم خواجہ و اوفتا ہندی کمکار آتا سازش آتے بے سہب کننگک۔ چارشنبے نادے آایوانِ صدر نا پریس ونگ آن جاری بیان نا رداٹ صدرِ مملکت دہشت گرد آتا ہند آتے بھس کننگ و اوفتے خلنگ آ سیکورٹی فورس آتا کسبی لائخی تا ستاءِ کرے۔ صدرِ مملکت پارے کہ دہشتگرد آتا پیشن نا کاٹم خواجہ و اوفتا ہندی کمکار آتا سازش آتے بے سہب کننگک، قوم تینا سیکورٹی فورس و کانود نافذ کروک ادارہ غاتتون ہم کوپہ سلوک ءِ۔