معلومداری اسکان رسینگ نا حق شفاف حکمرانی وڑ انا بنداو مریک،حوالکاری سیکرٹری بلوچستان

کوئٹہ، صوبائی سیکرٹری حوالکاری حکومت بلوچستان عمران خان پارینے کہ معلومداری اسکان رسینگ نا حق شفاف حکمرانی وڑ‘ پرسجو و السی پت انا شون اکن بنداوی اہمیت تخک، وخت اس کہ سرکاری ادارہ غاتیٹی معلومداری نا وخت آ و جوان فراوانی آن الس ءِ حکومتی باندات آتیان معلومدار تخنگ و ادارہ ئی کارکڑد ءِ گچین جوڑ کننگ اٹی کمک رسینگک‘ دا خیال آتا درشانی ءِ او ٹرانسپیرنسی انٹرنیشنل پاکستان نا کنڈآن بلوچستان انفارمیشن کمیشن نا کمک اٹ بلوچستان رائٹ ٹو انفارمیشن ایکٹ 2021 نا سیکشن 5، تینٹ معلومداری تے شیئر کننگ (Proactive Disclosure)، نا سرحال آ پبلک انفارمیشن آفیسرز (PIOs) نا ہیلکاری ورکشاپ آن تران کرسا کرے۔ او سرکاری محکمہ غاتیٹی شفافیت‘ کانودی خواست آتیا عملدرآمد و شاری تے درست، پک و وخت آ معلومداری تا فراوانی کن پبلک انفارمیشن افسر آتا کڑدار ءِ اہم گوندا۔ داوخت آ ٹرانسپیرنسی انٹرنیشنل پاکستان نا چیئرمین جسٹس (ر) ضیاء پرویز شریدار آتے بخیر کرے و معلومداری اسکان رسینگ نا حق ءِ جوان انگا حکمرانی و ادارہ ئی شفافیت کن اہم گوندا۔ بلوچستان انفارمیشن کمیشن نا انفارمیشن کمشنر عبدالشکور خان بلوچستان رائٹ ٹو انفارمیشن ایکٹ 2021 نا اہم پہلو خاص وڑ اٹ سیکشن 5 نا رد اٹ تینٹ معلومداری تے شینک کننگ نا اہمیت و فائدہ غا جم پریزنٹیشن تس۔ او پیدوار کرے کہ تینٹ معلومداری نا شینک کننگ نا مسخت المی سرکاری معلومداری تے مستین آن الس کن ساڑی کننگ ءِ تاکہ شاری تے ہر معلومداری نا دوئی کننگ کن جتا جتا درخواست تننگ نا گرج مف و سرکاری باندات آتے ٹی شفافیت ءِ شون رسینگ کے۔ ٹرانسپیرنسی انٹرنیشنل پاکستان نا ایگزیکٹو ڈائریکٹر کاشف علی تینا تران اٹی کانود آ جوان عملدرآمد، تعلقدار افسر آتا کاریمی واکداری کچ اٹ ودکی و سرکاری ادارہ غاتیٹی شفافیت نا اصول آتے عملی وڑ اٹ تینائی کننگ نا اہمیت آ ہیت کرے۔ ترانکار آک دا ہیت آ زور شاغار کہ کانود آ جوان عملدرآمد، معلومداری نا وخت آ فراوانی و ادارہ ئی کمکاری نا کمک اٹ شفافیت و پرسجو ءِ مونی دننگ مننگ کیک۔ ہیلکاری ورکشاپ نا اخیر اٹ شریدار آتے ٹی سَند ہم بشخ وپانٹ کننگا۔