بلوچستان نازرک ءُ دور اسے آن تدینگ ءِ، ورناک سگ و جیرت نشان ایتر،گورنر بلوچستان جعفرخان مندوخیل

کوئٹہ، گورنر بلوچستان جعفرخان مندوخیل مسلم اسٹوڈنٹس فیڈریشن (MSF) نا کنڈآن اڈ تروک دود انا شریدار آتیان تران کرسا پارینے کہ ورناک ننا کل آن بھلا واک ءُ، و نن اوفتا لائخی تے پین گچین جوڑ کننگ و اوفتے واکدار جوڑ کننگ کن پبی گام گیج کننگ اٹی اُن۔ ورنا تا زمواری ءِ کہ او ایلو ورنا تے ہم قومی دنگ اٹی اتنگ کن تینا گچین کڑد ءِ ادا کیر۔ وخت انا خواست ءِ کہ نن کل پاکستانیت ءِ تینائی کین و تینا لائخی تے ملک و قوم انا فائدہ ٹی کاریم اٹ اتین۔ بلوچستان دا وخت آ اسہ نازرک ءُ دور اسے آن گدرینگ انگ ءِ ہندا سوب آن ورنا تے سگ و جیرت نشان ترسا تینا خواننگ آ خصوصی چکار کروئی تمک۔ دا وخت آ سردار عبدالرحمن کھیتران، سینیٹر سعید الحسن مندوخیل، پارلیمانی سیکرٹری نوابزادہ زرین خان مگسی، ایم پی اے زرک خان مندوخیل، خلیل جارج‘ میر نوراللہ لہڑی، ایم ایس ایف ڈسٹرکٹ صدر ہمایوں کاکڑ ہم ساڑی ئس۔ دا وخت آ گورنر بلوچستان جعفرخان مندوخیل پارے کہ پارلیمانی سیکرٹری نوابزادہ زرین مگسی و ایم پی اے زرک مندوخیل ننا پارٹی نا بھاز فعال و متحرک پارلیمانی باسک ءُ وخت اس کہ سردار عبدالرحمن کھیتران ہم ورنا تے مون تروک ویل آتا ایسری کن کڑد ادا کننگ اٹی ءِ۔ او مستی پارے کہ اینو کیہی پارلیمانی باسک آک ایم ایس ایف نا دا پروگرام اٹی ورنا تا است بڈی کننگ کن ساڑی ءُ ہرا دا ہیت انا شاہدی ءِ کہ ورنا تا تعلیم، شونداری و آخبت ننا اولیت آتیٹی اوار ءِ۔ او باور کرفے کہ لیپ ٹاپ آتا بشخ و پانٹ و اسکالرشپ آتا فراوانی ٹی ہم نما خاص خیال تخنگک۔ گورنر مندوخیل پارے کہ صوبہ نا کل پبلک سیکٹر یونیورسٹی تا تعلیمی کارکڑد ءِ گچین جوڑ کننگ کن کوشست کننگانے ہرانا سوب آن مچ آ صوبہ نا کل سرکاری یونیورسٹی تا رینکنگ اینڈ اسکورنگ 80 درسَد اسکان سرمسنے‘ ہرا نن کل اکن شرف انا ہیت اسے۔