بے رحم دہشت گرد آک بلوچ چناتے تعلیم آن مُر تخنگ خوارہ،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی نوشکے ٹی فتنۃ الہندوستان نا جلہو اٹی اِرا مسڑ طالب علم نا شہادت نا سخت انگا لوز آتے ٹی مذمت ءِ کرسا پارینے کہ لغور دہشتگرد آک بلوچ چناتے تعلیم آن مُر تخنگ خوارہ۔ اوفک تینا پراگندہ غا مسخت آتیٹی ہچ گہس سرسہب مفسہ۔ تینا سلہہ بند فوج اتون اوار مرسا اوفتے پورو چٹفنہ و صوبہ ءِ امن نا چاگڑد اس جوڑ کینہ‘ میڈیا تون ہیت وگپ کرسا او پارے کہ نوشکے ٹی دہشت گرد آتا جلہو اٹی بی ایل اے نا جلہو اٹ اِرا مسڑ طالب علم آتے شہید کننگا۔ دہشت گرد آک کودک آ چناتے شست کرسا ہرا مسخت آتے دوئی کننگ خوارہ؟ دا اوفتا ہرا بلوچیت ءِ؟ بلوچ الس تو عظیم روایت آتا امین ءِ‘ او پارے کہ اوفتا مسخت بلوچ چناتے تعلیم آن مُر تخنگ ءِ۔ مچ آ دنیا ٹی اینو نا دور اٹی مار و مسڑ چناتے پوسکنوڑ ٹیکنالوجی، لیپ ٹاپ و اسکالرشپ تننگک و دا بندغ آک یا تو مسڑ چناتے ریفساپن انا جہاد نا پن آ خودکش جیکٹ بیرفرہ یا اوفتے خودکش دھماکہ کننگ آبیوس کیرہ۔ دا بلوچستان کن بھلو سوجی ٹک اسے۔ اوفک تینا دنگ آتے کراس کرینو۔ نن دا لغور آ خونی تے تُد تمسا اوفتا ایسر اسکان سر کینہ۔ او پارے کہ اوفتا پراگندہ غا کاریم تے بیان کننگ ہم شرمناک ءِ۔ او چاہے انت کیر نن اسکول و کالج آتے اسُل بند کپنہ‘ نن تینا چناتا آخبت ءِ ہچ وڑ اٹ دا دہشتگرد آتا دوتیا الیپنہ‘ تینا سلہہ بند فوج اتون اوار مرسا اوفتے مش و غار تیان پیشن کشسا اوفتے سخت ءُ مرک اسے ناگواچی کینہ‘ او پارے کہ دہشتگرد آتے پورو وڑ اٹ چٹفسا صوبہ ءِ امن نا ہند جوڑ کننگک۔ او شہید مروک مسڑ طالب علم تا پن آ اسپورٹس گالا و اسپورٹس فیسٹیول اڈ تننگ نا ہم پڑو کرے۔