پاکستان ناشونداری نا ویدن آرٹیفیشل انٹیلی جنس و ڈیجیٹائیزیشن تون گنڈوک ءِ،وزیراعظم محمد شہباز شریف

اسلام آباد، وزیراعظم محمد شہباز شریف پارینے کہ آرٹیفیشل انٹیلی جنس (اے آئی)، ڈیجیٹلائزیشن و پوسکنوڑ ٹیکنالوجی نا جوان کاریم اٹ اتنگ پاکستان اٹی واپار‘ برآمد، کشاری پیداوار، کاروباری آسراتی و سرکاری خذمت آتا آب ءِ گچین جوڑ کننگ اٹی اہم کڑد ادا کننگ کیک۔ ملکی شونداری کن کشاری بشخ ءِ پوسکنوڑ دنگ آتیا کننگ و ٹیکنالوجی آ تالان زرگزران ءِ شون تننگ المی ءِ۔ وزیرِاعظم نا کماشی ٹی اسلام آباد اٹی زرگزران و گورننس اٹی آرٹیفیشل انٹیلی جنس و ڈیجیٹلائزیشن نا کاریم اٹ اتنگ تون اوار حکومت پاکستان و علی بابا گروپ نا نیام اٹی کمکاری آ پیشرفت نا جاچ ءِ ہلنگ کن دیوان اس اڈ ہلک۔ دیوان اٹی تعلقدار وزارت و ادارہ غاتا برجا ڈٹ آتیا بریفنگ تننگا و اوفتیا عملدرآمد ءِ ترند کننگ نا بابت پارت کننگا۔ وزیرِاعظم پارے کہ علی بابا گروپ تون اسٹریٹجک شریداری آن پبی فائدہ ہرفسا چنکا و نیامی درجہ نا کاروبار تیکن جہانی منڈی تسکان رسینگ گیگ ءِ آسان کننگ و پاکستان اٹی ٹیکنالوجی آ تالان شونداری نا پوسکن آ وارخواہی تے ودی کننگ حکومت نا اولیت آتیٹی اوار ءِ۔ او چینی منڈی تیٹی پاکستانی کشاری گڑاتا برآمد آتیکن علی بابا نا کمکاری ءِ ستا کرسا پارے کہ کشت وکشار اٹ آٹومیشن و پوسکنوڑ ٹیکنالوجی نا کاریم اٹ اتنگ پیداوار و برآمدی واکداری ٹی ودکی کن اہم ءِ۔ وزیراعظم تعلقدار ادارہ غاتے پارت کرے کہ علی بابا تون برجا ڈٹ آتے پیدوار ہدف‘ پک وخت و گچین چاروکی نا رد اٹ پورو کننگے۔ دیوان ءِ پاننگا کہ حکومت پاکستان و علی بابا گروپ نا نیام اٹی اسٹریٹجک کمکاری نا رد اٹ کشت وکشار اٹ آرٹیفیشل انٹیلی جنس آ تالان ماڈل، تمباکو نا بشخ اٹی ٹریک اینڈ ٹریس ٹیکنالوجی و ترشاوہ میوہ و زیتون نا برآمد آتیکن ڈیجیٹل پلیٹ فارم آ کاریم برجا ءِ۔ بریفنگ نا رِد اٹ علی بابا نا آن لائن واپاری پلیٹ فارم آ پاکستانی گڑاتا برآمد آتا شون تننگ کن خصوصی پاکستان پویلین ہم جوڑ کننگانے۔ دا گام گیج نا مسخت پاکستانی گڑاتے جہانی خریدار آتسکان رسیفنگ و ہندی کاروبار تیکن پوسکن آ منڈی تا وارخواہی تے ودی کننگ اٹی کمک تننگ ءِ۔ وزیراعظم ایکسپورٹ پروموشن بورڈ ءِ پارت کرے کہ او علی بابا تون اوار مرسا ملکی برآمد آتے ٹی ودکی کن گچین کمکاری ءِ پک کیر۔ او پارے کہ چین نا شار ہانگژو اٹی علی بابا نا ہیڈ کوارٹر نا دورہ نا وخت آ مفاہمتی یادداشت آ دستخط کننگاسس، داسہ دا کمکاری ءِ عملی و قابلِ پیمائش بھرم تیٹی بدل کننگ المی ءِ۔ دیوان اٹی پاننگا کہ ایس ایم ایز ڈویلپمنٹ اتھارٹی و علی بابا نا اسیجائی کمکاری اٹ چنکا و نیامی درجہ نا کاروبار تیکن اِرا سال انا پروگرام اس بنا کننگ انگ ءِ۔