وزیراعلیٰ بلوچستان ڈھابہ غا کاریم کروک آ چوری آ چناءِ سنبھالا

کوئٹہ، بلوچستان نا وزیراعلیٰ میر سرفراز بگٹی سوشل میڈیا غا وائرل مروک ویڈیو نا کمک اٹ نوٹس ہلسا ڈھابہ غا کاریم کروک چوری آ چنامنیر احمد تون اوار پنچ ایلم و ایڑھ و اوفتا لمہ نا پورو ولفنگ نا زمواری ءِ ہرفینے۔ وزیراعلیٰ بلوچستان تون منیر احمد اوڑدہی کرے ہراٹی میر سرفراز بگٹی چناتا مشکل و زند انا حالیت آتا بارواٹ معلومداری ہلک و اوفتا گچین تعلیم و ہیلکاری و رکھوک آ آخبت کن المی گام گیج آتا پارت کرے۔ وزیراعلیٰ سیکرٹریٹ آن جاری بیان نا رداٹ وزیراعلیٰ بلوچستان منیر احمد، اونا چنکا ایلم و ہرمسٹ آ ایڑھ تے تعلیمی ادارہ غاتیٹی داخل کننگ نا پرمان کرسا پارت کرے کہ چناتے تعلیم تون اوار گچین ہنکین و ایلو المی آسراتی ہم فراوان کننگے تانکہ او اُرائی ویل و زرگزرانی مشکل آتیان آجو مرسا تینا تعلیم ءِ برجا تخنگ کیر۔ میر سرفراز بگٹی ہر پنچ آ چنا و اوفتا لمہ نا ولفنگ نا زمواری ءِ تینٹ ہرفساتعلقدار کارندہ غاتے پارت کرے کہ خاہوت نا گرج آتا خیال ءِ تخنگے و چناتا تعلیم، ہنکین و راجی آسودہی کن گچین گام گیج آتے پک کننگے۔ دا وخت آ وزیراعلیٰ بلوچستان تینا کارندہ غاتا کمک اٹ تینا خڑچ آتیان چناتے یخ انا موسم کن باسن ءُ پُچ و ایلو المی آ گڑاتا خریداری ہم کرفے۔ دا گام گیج نا مسخت چناتے یخ انا موسم اٹی درکار بنداوی آسراتی فراوان کننگ ئس۔ وزیراعلیٰ میر سرفراز بگٹی چناتا روشنا آخبت کن نیک است خواہی نا درشانی ءِ کرسا دا ارادگی نا درشانی ءِ کرے کہ راج انا بے سیبو و ضرورت مند چناتا تعلیم، ہیلکاری و گچین زند انا وارخواہی تا فراوانی کن ہر وڑ انا گام گیج کننگک۔