جامعہ گوادر نا کنڈ آن بریسٹ کینسر نا آگاہی نا سرحال آ سیمینار

گوادر، جامعہ گوادر نا کنڈآن انڈس ہسپتال گوادر و پنک ربن پاکستان نا اسیجائی کمکاری اٹ بریسٹ کینسر آن آگاہی و جینیٹکس نا سرحال آ اسہ سیمینار اس اڈ ہلک، ہرانا مسخت نیاڑی تیٹی بریسٹ کینسر تون تعلقدار شعور بیدار کننگ و خطرہ تا وخت آ پجار وبنجائی تشخیص نا اہمیت ءِ پاش کننگ ئس۔ سیمینار اٹی جانجوڑی نا چاہندار آک کینسر نا علامت، جینیاتی وڑ‘ احتیاطی تدبیر و وخت آ طبی جاچ انا اہمیت آ ہیت کریر‘ ترانکار آک دا ہیت آ زور شاغار کہ ناچوڑ نا بنائی ریسہ ٹی تشخیص جوان درمان و گچین جانجوڑی نا بھرم تیکن بھاز اہم ءِ۔ سیمینار نا ترانکار ڈاکٹر شازیہ، گائنکالوجسٹ انڈس ہسپتال گوادر بریسٹ کینسر تون تعلقدار آگاہی و نیاڑی تا جانجوڑی نا بابت گپ و تران کرے۔ دا وخت آ یونیورسٹی نا استاد و طالب علم آک بھلو کچ اسے ٹی بشخ ہلکر۔