6 ستمبر آ شہید و غازیک وطن نا سلامتی و وتواجہی نا رکھ ءِ پک کریر،وزیراعلیٰ بلوچستان

کوئٹہ، وزیراعلیٰ بلوچستان میر سرفراز بگٹی یوم دفاع پاکستان نا وخت آ تینا کلہو اٹی پارینے کہ 6 ستمبر ننا قومی تاریخ نا ہمو دے ءِ ہرا ننے سلہہ بند فوج و قوم انا بہادر آ سرکڑدہ غاتا بے مٹ آ قربانی تا یات ءِ ترفک ہرافک وطن نا رکھ اکن تینا جان تے ندر کریر۔ وزیراعلیٰ پارے کہ 1965ء نا جنگ اٹی پاک فوج انا افسر و ورناک غیر معمولی بہادری و ارادگی نا درشانی کرسا دشمن نا ناپاک آ ارادہ غا تے بے سہب کریر۔ قوم اینو ہم شہید و غازی تے خراجِ عقیدت پیش کیک ہرافک وطن نا سلامتی و وتواجہی نا رکھ اکن تاریخ اس پک کریر۔ میر سرفراز بگٹی پارے کہ پاکستان نا دفاعی تاریخ قربانی، بہادری و قومی یکجہتی نا روشنا درور آتیا تالان ءِ۔ ملک انا رکھ اکن تینا جان تا نذرانہ پیش کروک آک ننا قومی ہیرو ءُ و مچ آ قوم اوفتا خلق خاہوت ءِ قدر و شرف اٹ ہرک۔ او پارے کہ اینو نا دور اٹی دفاعِ وطن نا خواست بیرہ سیم آتا رکھ اسکان اف بلکہ قومی یکجتہی، زرگزرانی آسوگوی، تعلیم، ترقی و امن نا شونداری تون ہم گنڈوک ءِ۔ سوگو و شاد آباد پاکستان ننا بروک آ نسل آتا رکھوک آ آخبت نا اسٹ انگا ضمانت ءِ۔ وزیراعلیٰ بلوچستان پارے کہ بلوچستان نا الس ہم مدام پاکستان نا سلامتی و سوگوی کن قربانی تسنے۔ صوبہ نا شہید آک ملک انا رکھ و امن ایمنی کن تینا جان تے ندر کریر و اوفتا قربانیک قومی تاریخ نا اسہ گیرام مفروک ءُ بشخ اسے ءُ۔ میر سرفراز بگٹی پارے کہ دہشت گردی نا برخلاف جنگ اٹی ہم ننا سکیورٹی فورس آک و کانود نافذ کروک آ ادارہ غاک بے مٹ قربانیک تسنو۔ قوم تینا شہید آتا قربانی تے زیان مننگ کن الیپک و امن و سوگوی کن سیوت کرسا مونی گام کیک۔ او پارے کہ یومِ دفاع ننے دا عہد کننگ نا وارخواہی فراوان کیک کہ نن قومی یکجہتی ءِ سوگو کین، پاکستان نا وتواجہی و سلامتی نا امر کہ مرے رکھ ءِ کین و ملک ءِ شونداری، شونہالی و امن نا مزل نا کنڈ آ دننگ کن تینا کڑد ءِ ادا کین۔ وزیراعلیٰ شہید آتا درجہ غاتا بڑزی، غازی تا سلامتی و پاکستان نا شونداری، سوگوی و شونہالی کن دعا ہم کرے۔