خذمت نا جوزہ غان شُپ راجی کارندہ غاتا کوشست آک ستا کڑزرہ،گورنربلوچستان جعفرخان مندوخیل

کوئٹہ، گورنربلوچستان جعفرخان مندوخیل جہانی چیریٹی دے نا وخت آ پارینے کہ صوبہ نا کل خیرکار، آسودہی ادارہ غاک، رضاکار و السی خذمت نا جوزہ غان شُپ راجی کارندہ غاتا کوشست آک ستا کڑزرہ۔ بے سیبو چنا، غریب و جنوزان تا زند آتیٹی آسانی ودی کننگ اٹی اوفتا کڑد بنداوی ءِ۔ ایہن تو الس نا آسودہی و آسراتی، اوفتا عزت و شرف نا رکھ حکومت نا اولیکو زمواری ءِ و دا رد اٹ حکومت تینا آئینی و اخلاقی زمواری تے پورو کرسا تعلیم، جانجوڑی، راجی آسراتی و الس نا آسودہی نا بشخ آتے سوگو جوڑ کننگ کن کوشست کننگ ءِ، ولے بلوچستان نا بھلا و تالان آ آبادی و ساڑی زرگزرانی سختی تا رد اٹ جم کوشست آک ہم المی ءُ۔ گورنر بلوچستان کل ہزگار خواجہ، پوریا گر برادری و آسودہی ادارہ غاتتون تعلقدار بندغ آتیا زور شاغا کہ او حکومت تون اوار مرسا تعلیمی ادارہ، چوری آ چنا، جنوزان نیاڑیک، درمان نا گرج آتے کن ناجوڑ و ہڑدے ئی ضرورت مند آتا کمک ءِ کیر۔ کس انا کمک ءِ کننگ نا وخت آ اونا عزتِ نفس نا خاص خیال تخنگ المی ءِ۔ نیام اٹی ننا اسہ چنکے چنکا کوشست و جوان انگا کاریم ہم زرگزرانی تنگدستی نا گواچی مروک آ بندغ آتا زند ءِ بدل کننگ کیک۔ ننا شانی آ قومی ربیدگی و قدر آک ننے دا درس ایترہ کہ سخت انگا وخت اٹی اسہ ایلو نا سیبو مرین و ڈکھ درد اٹی یکجہتی نا درشانی ءِ کین۔ اگہ نن خذمتِ خلق و سخاوت نا جوزہ ءِ شون ایتن تو بھلا غریبی ٹی کمتی اتنگ مریک، کبین آ فیس تا آباریم ءِ کم کرسا تعلیمی وارخواہی تے ودفنگ مریک۔ بشخنگ و خیرات نا کاریم یعنی جوان و باقاعدہ وڑ اٹ گدریفنگ الس کن گچین ءِ۔ ہزار آ ورنا تے چنکا کاروبار بنا کننگ اٹی کمک فراوان کرسا اوتے کن اومیت نا روشنائی اس جوڑ مننگ کینہ۔ کنا خواست و کوشست دادے کہ ہچ ءُ مسڑ یا چنا اس تعلیم آن محروم سلپ، ہچ ءُ چوری اس در در آ دھکہ ہلپ و ہچ ءُ ضرورت مند اس مایوس مف۔ گڈسر اٹی دا دعا ءِ کہ ننا اسیجائی سخاوت و خذمت خلق نا جوزہ ہر شاری نا خاطر اومیت، وقار و شونداری نا سوب جوڑ مرے۔