اصطلاحات نثر 28
غفور جان ساسولی
Get real time updates directly on you device, subscribe now.
تذکرہ نگاری:۔
(Memoir biography, Collection of biographical notes)
تذکرہ عربی زبان نا لوز اسے، ہرانا لغوی معنہ یات، یادداشت، بیان، یادگار، تاریخ نا واقعہ و سرگزت نا ء ِ۔
اصطلاحی ڈول اٹ تذکرہ ہمو کتاب ء ِ پارہ ہراٹی شاعر آتا حوال نوشتہ کننگے۔
تذکرہ نا رواج فارسی آن بنا مس، و داٹی شاعر آتا درستی راستی و اوفتا کلام نا وڑک اس حرف تہجی نا رد اٹ نوشتہ کننگاکہ۔
”لس وڑ اٹ اسہ عہد اسے نا شاعر آتا زند و بود، حالیت و واقعہ غاتیا ساڑی نوشت ء ِ تذکرہ پارہ۔“
بنداوی وڑ اٹ تذکرہ فنِ تاریخ نا بشخ اسے۔ عربی و فارسی نا متکن آ نوشت آتیٹی دن کہ ”غوفی 718 ہجری ٹی لباب الالباب“ نا پن اٹ کتاب اس نوشتہ کرے۔ دا کتاب ء ِ فارسی نا بھاز متکن آ تذکرہ تکنگک۔“ (صدیقی، 2012ء، 322)
فارسی ٹی نوشتہ مروک اردو شاعر آتا تذکرہ ہم بھاز ساڑی اریر، دن کہ میر تقی میر انا تذکرہ نکات الشعراء ہرا 1165ھ (752ء) اٹی شینک مس۔
”اردو ٹی مرزا علی لطف اولیکو اردو شاعر ء ِ ہرانا ”تذکرہ گلشنِ ہند“ 1215ھ (1801ء) اٹی مون آ بسک۔“ (صدیقی، 2012ء، 322)
تذکرہ نا اصطلاح اسہ بشخ اسے نا زند اتون تعلقداری تخوک بندغ آتے اسہ ڈَول انا سوانحی نا درستی راستی نا مجموعہ کن ہم کاریم اٹ بریک۔ دن کہ:
تذکرۃ العلماء، تذکرۃ الشعراء، تذکرۃ الاولیاء والصوفیا۔ ہندن وخت اس اسہ بندغ اسے نا پورو سوانح کن ہم ”تذکرہ“ نالوز کاریم اٹ اتنگانے، دن کہ تذکرہ جگر مراد آبادی۔
بھاز وخت تذکرہ کن سوانح یا حیات کون آ اصطلاح ہم بکار بسنو۔ دن کہ سوانح مولانا روم، حیات، سعدی۔
براہوئی ٹی ”تذکرہ“ نا رد اٹ گلدستہ غاتا پن اٹ براہوئی اکیڈمی نا پارہ غان شینک کننگانو۔ ذوق براہوئی نا ”راجدار“ پنی آ تذکرہ 2008ء، ایم صلاح الدین مینگل نا کتاب ”یاد رفتگان“ 1989ء و علامہ جوہر براہوئی نا ”تخلیقکار“ 2000ء اٹی نوشتہ کننگا۔
کتاب:۔
صدیقی، ابوالاعجاز حفیظ، ”اصناف ادب“، سنگت پبلی کیشن، لاہور، 2012ء