زندان نا ڈائری                        4

اولیکو دزگیری:۔ 

ای و ولی محمد لہڑی، ہرا داسکان خت بروت اَلونہ، پوسکن بلوغت نا وئی ءِ سر مسوسن، و ورنائی ٹی گام تخنگ کن سنبرینگوک ئسن۔ نیشنل عوامی پارٹی نا سالار آغا مجید شاہ تون اوار اسہ تنہائی سے ٹی شفٹ مسن۔ نن تون اوار دا تنہائی ٹی مارکر فیکٹری نا مزور ورکر عبدالرحمن رند، بی ایس او پولی ٹیکنک یونٹ نا سنگت قاسم بلوچ (پندرانی)، ہندا دے ٹی زندان اٹی بروک آ ننا سنگت سکندر کرد، ہرادے اسمبلی نا دیوان نا نیام اٹ مﺅن ءُ پٹی اس دُو آ تفنگ آ اسمبلی نا درگہ غا نعرہ خلنگ نا وخت آ دزگیر کننگاسس، اودے ہم ننا تنہائی ٹی شفٹ کننگا۔

دا دَنگ انا درگہ دیکی نا کنڈ آن ئس۔ ہراڑتون مون پہ مون چکر نا پد اٹ لنگر خانہ ئسکہ۔ دا دنگ انا چارماکنڈ آن دیوال ئسر۔ جہاندمی دیوال نا پد اٹ زندان نا بند انگا وارڈ ئسکہ۔ سویل دے ٹِک نا کنڈ آن زندان نا بھلا دیوال تون اوار اسہ برج واج اس ئسکہ، ہراڑا زندان نا اسہ توفکی سنتری اس مدام ساڑی ئسکہ۔ ہرا زندان نا رہی انا دیوال و دنگ آتیٹی بند بندی تا سرجز آتے ہُننگ کن سلفنگاسس۔ دا دنگ اٹی دے ٹِک، سویل، و قطب نا کنڈ آن کھولی تا چر اَس جوڑ ئسر، دا دنگ اٹی اسہ چنکو بیرک اس ہم ئس۔ ہر کھولی نا مریس 12 فٹ و پتنی 10 فٹ ئسکہ۔ ہر کھولی نا تہٹی اسہ 3x6 فٹ انا جوڑ کروک اسہ تھڑہ اس ئسکہ۔ ہرادے بندی تا اصطلاح ٹی ہوٹل پارہ۔ ہر کھولی نا سیخ تیان جوڑ کروک جتا ءُ آہنی ءُ درگہ اس ئس۔ کھولی نا ہر درگہ دیوال نا تہٹی کڑی کننگ کن اسہ جاگہ اس ئس، ہرانا تہٹی اسہ بھلو کلف اس درنجوک ئس، ہرادے سہب اتون روشنائی تالان مننگ تون ملارہ و تارمئی تمنگ آن مست (پیشیم آن پد و شام آن مست) بند کریرہ۔ ہر کھولی نا درگہ نا زی آ دیوال نا تہٹی سیخ تیان جوڑ کروک اسہ دریچہ اس ئسکہ۔ ہر کھولی نا درگہ نا رہی آ پیشن برانڈہ ٹی اسہ دِلا اس تخوک ئسکہ، ہرادے بندیک پر کریرہ و اوڑان دیر کنگرہ۔ دا دنگ اٹی دیکی کنڈ آ چرخی تا اسہ چر اس ئسکہ، دا چرخی تیا سہب اتون مہالو درگہ غاتا ملنگ تون بندی تا چر اس تفیکہ۔ دافتا درگہ غاک سما اف ہراتم نا جوڑ ئسرہ، ہرا پنوک و بے کڑی ئسرہ۔ کڑی کننگ نا جاگہ غا چٹ یا تار اسے ٹی درگہ ءِ چکوئی توروئی تماکہ۔ یا چٹ و تار ءِ دیوال اٹ خلوک ہُک اٹ تفنگاکہ۔ دا چرخی و غسل خانہ غاتا چرک چار یا پنچ پنچ آ جوڑ ئسر۔ ہرافتا مون آ شش فٹ انا اسہ دیوال اس ئس، دا چرخی تا پد ملوک ئسکہ۔ دافتے کاریم اٹ اتنگ کن چرو و دیر اٹ لوتڑینگوک کسر ءِ کاریم اٹ اتوئی تماکہ۔ ہرا اسہ ڈکھیائی سے آن کم اَلو۔ و دا چرخی تا درگہ غاک پڑدہ کننگ ہم کتوسہ۔ دافتیٹی تولنگ نا وخت آ مدام بندغ نا خن درگہ غاک خلوک مسکہ کہ کس اس پترینگپ۔ یخین اٹ دا بھلو خواری نا کاریم اس ئسکہ۔

چرخی ٹی کاریم اٹ اتنگ کن دیر انا اسہ نلکہ اس پیشن آ خلوک ئسکہ، ہرانا رہی آ منہ بدنی و منہ سی انا خورک ءُ ڈبو تموک ئسرہ، ہرافتیٹی بندیک دیر دریرہ۔ کھولی تیٹی چرو کن اسہ ٹین تننگاکہ، ہراٹی بھاز تنکی نا وخت آ بندیک چرو کریرہ۔ و سہب اتون تینا چرو تے چرخی نا نالی تیٹی شولارہ۔ پڈ خراب مروسس تو بیوسی ئس و ہندا ٹین ءِ کاریم اٹ اتوئی تماکہ۔ داڑے بیرک آتیٹی چرخی جوڑ کروک ئسکہ، ہرافتا درگہ غاک نیمہ اسکان ئسرہ، تاکہ چرخی آ ہنوک بندی نمبردار نا خن تیان اودیم مف۔ دا درگہ نیمہ دا سوب آن ئسکہ، کہ بندی چرخی نا دریچہ نا دیوال ءِ ڈکوئی اٹ پرغنگ کپ۔

ہفتئی تلار

تاک: 30

01-08 August 2020

پنہ : 02