غریبی و نیزگاری صوبہ نا زرگزرانی و راجی شونداری کن بھلو چیلنج ءُ،جعفر خان مندوخیل

کوئٹہ، گورنر بلوچستان جعفر خان مندوخیل پارینے کہ غریبی و بے روزگاری صوبہ نا زرگزرانی شونداری، راجی آسودہی و ورنا تا آخبت کن بھلو چیلنج ءُ۔ وخت اناخواست دادے کہ ورناتے بیرہ ملازمت نا پٹ و پول کروک جوڑ کننگ نا جاگہ غا اوفتے روزگار فراوان کننگ و کاروبار نا کمک اٹ ایلوفتیکن ہم روزگار نا وارخواہی تا ودی کننگ نا لائخ جوڑ کننگے۔ دا مسخت نا دوئی کننگ کن ہر ڈسٹرکٹ نا کہول آ پوسکنوڑ چاہنداری تا شونداری و میرٹ آ عملدرآمد و نظام نا شفافیت ءِ پک کننگ آن پیدوار آسانی ودی مریک۔ تینا اسہ بیان اسے ٹی گورنر بلوچستان بے روزگاری نا چٹفنگ کن زرگزرانی اولیت آتے اولسر پک کننگ آ زور شاغسا پارے کہ کشت وکشار‘ لائیو اسٹاک، صنعت، واپاری و ایلو زرگزرانی بشخ آتے پوسکنوڑ ٹیکنالوجی، زرکاری و گچین ڈٹ بندی نا کمک اٹ شون تننگ المی ءِ تاکہ قومی و ہندی زرگزران ءِ سوگو کننگ مرے۔ او پارے کہ مون تروک زرگزرانی چیلنج آتتون مون تننگ کن بیرہ مالی کمک و راشن نا فراوانی آ سیبو کننگ نا جاگہ غا زرگزرانی سوگوی و مدامگی گام گیج آتیا چکار کروئی تمک۔ ساڑی وخت اٹ بندغ آتے زرگزرانی وڑ اٹ تینے آ سیبو کننگ نا لائخ جوڑ کننگ‘ واپاری تجارتی سرجز آتے شون تننگ و روزگار نا پوسکن آ وارخواہی تا ودی کننگ نا گرج ءِ تاکہ لس بندغ تینا لائخی‘ ہنر و خواری نا کمک اٹ شرف اٹ روزگار دوئی کننگ کے۔ گورنر جعفر خان پارے کہ دا رد اٹ سرکاری و پرائیویٹ بشخ نا نیام اٹی شریداری یعنی پبلک پرائیویٹ پارٹنرشپ ءِ سوگو کننگ وخت انا اہم ءُ گرج اسے۔ بلوچستان اٹی دا ماڈل نا رد اٹ فنی ہیلکاری ہند، صنعتی یونٹ، کشت وکشار و لائیو اسٹاک اٹی ویلیو ایڈیشن، کولڈ اسٹوریج، فوڈ پروسیسنگ و پوسکنوڑ واپاری ڈٹ آتے شون ترسا زرگزرانی سرجز آتیٹی ودکی و روزگار نا بھاز وارخواہی ودی کننگ مننگ کیک۔ گورنر مندوخیل مستی پارے کہ تعلیمی ادارہ غاتے ہندی گرج و روزگار نا منڈی نا خواست آتتون ہم گرنچ کننگ المی ءِ۔ ہر ضلع نا زرگزرانی گمان تا جاچ ءِ ہلسا ہمو فنی و کسبی ہیلکاری پروگرام تے درستی راستی کرفنگے ہرافک ورنا تے عملی زند انا خواست آتتون ہم گرنچ و زرگزرانی وڑ اٹ تینے آ سیبو کننگ اٹ کمک فراوان کیر۔