سیکرٹری میری ٹائم افیئرز کیپٹن (ر) محمد خرم آغا اِرا دے ئی دورہ غا گوادر پورٹ آ سر مس

گوادر، سیکرٹری میری ٹائم افیئرز کیپٹن (ر) محمد خرم آغا اِرا دے ئی دورہ غا گوادر پورٹ آ سر مس، ہراڑے چیئرمین گوادر پورٹ نورالحق بلوچ، جی پی اے نا بڑزکو افسر آک اودے بخیر کریر۔ دورہ نا مسخت گوادر پورٹ اتھارٹی نا چندی باندات‘ برجا سرجز و شونداری ڈٹ آتتون تعلقدار جم تا جاچ ءِ ہلنگ ءِ‘ گوادر پورٹ اتھارٹی نا ہیڈ آفس اٹی سیکرٹری میری ٹائم افیئرز کیپٹن (ر) محمد خرم آغا نا کماشی ٹی بڑزکو کہولی دیوان اڈ ہلک، ہراٹی چیئرمین گوادر بندرگاہ نورالحق بلوچ گوادر پورٹ نا جم پیشرفت، 1.2 ملین گیلن ہڑدے ئی واکداری والا واٹر ڈی سیلینیشن پلانٹ، گوادر فری زون نا سرجز، گوادر انٹرنیشنل ٹرمینل لمیٹڈ نا باندات و جی پی اے نا ماسٹر پلان نا بابت جم بریفنگ تس۔ بریفنگ اٹ گوادر پورٹ انا اہمیت، واپاری سرجز تا شون تننگ، فری زون نا شونداری و بندرگاہ تون تعلقدار ڈٹ بندی نا جتا پہلو تیا ہیت کننگا‘ گوادر پورٹ ءِ ڈیہہ اٹی واپاری‘ ٹرانزٹ ٹریڈ و بحری زرگزران نا شون تننگ کن اسہ اہم واپاری ہند اسے نا وڑ دوئی ءِ وخت اس کہ فری زون نا شونداری و بندرگاہ تون گنڈوک کاروباری سرجز آتیٹی ودکی ہندی و جہانی واپاری کن اہمیت تخک۔ دیوان اٹی جی پی اے نا ماسٹر پلان تون تعلقدار باندات آتیا ہم شرہ مس‘ ہرافک گوادر پورٹ و اوڑتون گنڈوک واپاری و صنعتی سرجز تا آخبت نا ڈٹ بندی نا رد اٹ بھاز اہم ءُ۔ گوادر پورٹ نا بنداوی پنجر، ٹرمینل نا سرجز و فری زون نا شونداری ءِ گچین وڑ اٹ مونی دننگ بندرگاہ نا واپاری لائخی آن پبی فائدہ ہرفنگ کن اہم گوندنگک۔ سیکرٹری میری ٹائم افیئرزنا دا دورہ گوادر پورٹ اتھارٹی نا انتظامی و شونداری باندات آتا جاچ ءِ ہلنگ و بندرگاہ تون تعلقدار اہم باندات آتے ٹی تعلقدار کمامدار آتیان دمدستی آگاہی دوئی کننگ نا رد اٹ بھاز اہم ءِ۔