ڈپٹی کمشنر اُستا محمد محمد رمضان پلال نا گورنمنٹ بوائز ہائی اسکول اُستا محمد نا دورہ

استا محمد، ڈپٹی کمشنر اُستا محمد محمد رمضان پلال گورنمنٹ بوائز ہائی اسکول اُستا محمد نا دورہ ءِ کرے، ہراڑے او اسکول نا جتسجتا کلاس روم تا دورہ ءِ کرسا تدریسی سرجز، تعلیمی چاگڑد، استاد و ایلو کارندہ غاتا حاضری و طالب علم آتے فراوان کروک تعلیمی آسراتی تا جاچ ءِ ہلک۔ داوخت آ او کلاس روم تیٹی برجا تدریسی عمل نا جاچ ئع ہلک و تعلیمی سرجز تتون تعلقدارباندات آتا جاچ ءِ ہلسا اسکول نا جم کارکڑد نا بابت معلومداری دوئی کرے۔ دورہ نا وخت آ ڈپٹی کمشنر محمد رمضان پلال طالب علم آتتون ہیت وگپ کرے و اوفتیان نصابی سرجز، تعلیمی کارکڑد و تعلیم نا دوئی کننگ اٹی مون تروک مشکل آتا بابت سوج کرے۔ او طالب علم آتا است بڈی ءِ کرسا پارے کہ تعلیم راج اسے نا شونداری، شونہالی و روشنا آخبت نا بنداو مریک‘ طالب علم آک بایدے او تینا مچ آ چکار ءِ تعلیم آ کیر‘ وخت انا پابندی ءِ کیر و خواری، جوزہ و مستقل مزاجی ءِ تینا شعار جوڑ کیر تاکہ او آخبت اٹی ملک و قوم انا شونداری ٹی گچین کڑد ادا کننگ کیر۔ ڈپٹی کمشنر استاد آتیا زور شاغا کہ او تینا کسبی زمواری تے پورو زمواری، ایمانداری و سِکت اٹ سر ایتر و اسکول اٹی تینا وخت آ حاضری ءِ امر کہ مرے پک کیر۔ او پارے کہ استاد آک پوسکن آ نسل نا کڑدار سازی و تعلیمی ہیلکاری ٹی بنداوی کڑد ادا کیرہ، ہندا سوب آن المی ءِ کہ او طالب علم آتا تعلیمی کچ ءِ گچین جوڑ کننگ، نصاب نا گچین تدریس و جندی تعلیمی گرج آتیا خصوصی چکار کیر۔ او دا ہیت آ ہم زور شاغا کہ طالب علم آتے اسہ ہندن ءُ گچین و مثبت تعلیمی چاگڑد اس فراوان کننگے ہراڑے او بیدس اڑاند آن سوج کننگ کیر و تینا لائخی تے گچین وڑ اٹ شون تننگ کیر۔ او مستی پارے کہ سرکاری تعلیمی ادارہ غاتا باقاعدہ چاروکی و جاچ تعلیمی نظام اٹی گچینی اتنگ، تدریسی عمل ءِ گچین کننگ و استاد و کارندہ غاتا کارکڑدءِ پین گچین جوڑ کننگ کن بھاز اہم ءِ‘ ضلعی انتظامیہ نا کنڈ آن تعلیمی ادارہ غاتا کارکڑد نا جاچ ہلنگ نا مسخت طالب علم آتے آب اٹنگا تعلیم نا فراوانی ءِ پک کننگ، تعلیمی آب ءِ بڑز کننگ و سرکاری اسکول آتیٹی نظم و ضبط و زمواری نا احساس ءِ شون تننگ ءِ‘ ڈپٹی کمشنر محمد رمضان پلال دا عزم انا درشانی ءِ کرے کہ ضلعی انتظامیہ تعلیم نا شون تننگ و سرکاری اسکول آتیٹی تعلیمی آسراتی تا گچینی کن تینا کوشست آتے برجا تخک تاکہ طالب علم آتے گچین تعلیمی چاگڑد دوئی مرے و او تینا لائخی تا وڑ اٹ تعلیمی پڑ آ نمان سرسہبی دوئی کننگ کیر۔