سانحہ کار ساز جمہوریت کن تروک قربانی تا یات ءِ ترفک‘ نواب ثناء اللہ زہری

کوئٹہ، پاکستان پیپلزپارٹی نا بنجائی راہشون، مسکوہی وزیراعلیٰ بلوچستان و چیف آف جھالاوان نواب ثناء اللہ خان زہری سانحہ کار ساز نا 19می دے آ شہید آتے خراجِ عقیدت پیش کرسا پارینے کہ شہید بینظیر بھٹو نا بخیر کننگ کن بروک آ پاکستان پیپلزپارٹی نا 180 آن زیات جیالہ تینا جان تے ندر کرسا جمہوریت نا بقا و سوگوی کن عظیم ءُ قربانی تسر۔ مسکوہی وزیراعلیٰ نواب ثناء اللہ خان زہری پارے کہ 18 اکتوبر 2007ء آ کراچی ٹی شہید بینظیر بھٹو نا بخیر کننگ نا جلوس ٹی مروک اِرا بمب دھماکہ ہڑتوم آک پاکستان نا سیاسی تاریخ نا اسہ است ہسون ءُ سانحہ اسے ءُ۔ دا دھماکہ غاتیٹی 180 آن زیات افراد شہید وخت اس کہ 500 آن زیات ٹھپی مسر۔ دا سانحہ جمہوری جہد اٹی پیپلزپارٹی نا کارندہ غاتا بے مٹ قربانی تے یات ترفک‘ او پارے کہ پاکستان پیپلزپارٹی جمہوریت نا ریسہ‘ آئین نا بالادستی و الس نا حق آتا رکھ اکن مدام قربانی تسنے پارٹی سرکڑدہ غاتیان ہلسا کارندہ غاتسکان ہر کہول آ جمہوری جہد اکن قربانی تا اسہ مرغن ءُ تاریخ اس ساڑیِءِ مسکوہی وزیراعلیٰ بلوچستان نواب ثناء اللہ زہری پارے کہ شہید بینظیر بھٹو نا جان نثار آک سخت انگا حالیت آتیٹی ہم جمہوریت نا بیرک ءِ بڑز تخار و تینا جان تا پرواہ ءِ کپرسا تینا قائد تون وفاداری و جمہوری اصول آتتون وابستگی نا شاہدی تسر۔