”اینو ہم خدا خوشے“ شاہین بارانزئی نا تنقید نا جاچ                           5

افسانہ ”ٹیپو“ اسہ وفادار و زموار ءُ کچک اسے نا کِسہ ءِ… افسانہ نگار کچک نا ہرا جوانی خوبی ءِ داڑے نشان تسنے او کچک نا احساس آتے بھاز زیبائی اٹ بیان کرینے…. عمران فریق افسانہ نا بارو اٹ بھاز معلومداری تخک و افسانہ نا درزن اسے آن زیات قسم آتا بارو اٹ تائک… ہراکہ عام افسانہ نگار ءِ معلوم ہم افس…. ولے عام افسانہ خوانوک آ یا عام نوشتکار افسانہ نا بارو اٹ داخہ ضرور سرپند مریک… کہ افسانہ سے کن منظرنگاری پلاٹ کڑدار کِسہ کلائمکس یا واقعہ و ایسر بے کچ المی ءُ.. فاضل افسانہ نگار نا داخہ سرپندی تیان پد ننے شاہکار افسانہ نا اومیت ئسکہ… ولے دن اف…. ٹیپو افسانہ بےجا مرغنی نا گواچی خننگک.. افسانہ نگار ٹیپو نا خوبی تا پاہک کہ سوداگر و پخیر تے ہچ پاتوکہ… دا ہیت ہضم مفک… کچک نا کاریم غوکنگ ءِ، ولدا او پخیر تا تو ازل آن دشمن ءِ… ایلو افسانہ نگار پاہک کہ نم باور کیرے کہ ٹیپو ننا خلق اٹی ہفت سال مس دا ہفت سال اٹی خلق اٹی نئے پشی اس خننگا نئے شوک اس… ولدا داخہ وخت آن پد اسہ پشی اس خننگاکہ سو اس دزی کرے، ہمو نا ہلنگ کن ٹیپو دیوال آن تما آخبتی منڈ مس… کہانی ٹی جان اف…. ٹیپو نا لمہ ءِ شارٹ گن کیرہ خلیرہ، اونا ہم ہچ ءُ وضاحت اس یا سوب اس بیان اف… ننا پاوال یا خلقی زند اٹی پیرانگا کچک آتے ہچ وخت خلنگتنے تانکہ اوفک فطری موت کستنو… اگہ خلنگانو تو اوفتا سوب اس مسنے… گنوک ہڑی مسنو یا گر ہرفینے تا اُرا تے ٹی دیوال تےٹی خوشکانو تینے…. ہراڑے ٹیپو نا چنکا بھلا خوبیک یا احساس آک سرجم اٹی بیان مسر ہموڑے اونا لمہ نا خلنگ نا بابت ہچ ءُ سوب اس مفننگ افسانہ ءِ کہانی پن آن چٹ خورک کرینے…. افسانہ ٹی کلائمکس ہچ خننگپک… ایسر ہموڑے مروئی ئس کہ ہراتم ٹیپو لخ ءِ شیف کرے، خڑینک خلسا شار اکن ہنا… عمران نا جوزہ غاتیکن اِرا جملہ کافی ئسر…. افسانہ نا ایسر اٹی خوانوک کن ہم کنکلوژن اس اِلنگ المی ءِ، ولے گڈسر پیرہ اسکان افسانہ نگار تینا خیال و جوزہ غاتے اتسا خوانوک ءِ دیخ اس سوچنگ نا ہم وار تتنے…. دیخ اس فکر آن ہم آجو کرینے…

افسانہ ”ایلم نا ہشاری“ تینا مسخت و کلہو نا رد اٹی بھاز گچین ءُ افسانہ اسے… پشتو نا اسہ متل اسے ننا براہوئی مخلوق اٹی ہم پنی ءِ کہ ”ہشاری ڈیر خواری..“ حاجی درمحمد بھاز ہشاری آن تینا مچ آ زند ءِ بے گڈری بے پازواری ٹی گدریفے، ولے دن تتو کہ ”میر آتے اُرا غان لگک“ دا ڈکوک آ میر ءِ ہم اُرا غان لگا… اینو ایلم ایلم نا دشمن بدخواہ جوڑ مسنے… بھروسہ یقین اعتماد بالی ءُ چُک اس ئس بال کرے ہنا…. دا فریق نا ایلو افسانہ غاتا نسبت گچین ءُ افسانہ اسے… دا افسانہ نا ایسر گچین ءِ… دن انگا بے گت گمان آ ایسر خوانوک ءِ سرفک…

افسانہ ”سردارنا شار“ نا اول اٹی ہرا وڑ منظرنگاری کننگانے بھاز گچین…. ریک آتا بج آ ہتم نا ڈیک.. ریک آن پٹ آتیکن دیر انا سرگڑدانی ٹی مخلوق آتا امپ و بٹ نا خواریک… افسانہ نا اول نا زیبائی ءِ خنسا کنے گچین ءُ کلائمکس و ایسر اسے نا گمان ئس… ولے آخا… افسانہ مونی ہنسا تینا افسانوی دروشم آن چٹ پیش تمانے… اسہ خلق اسینا خیدخواری و بدحالی تیان پد شار اسینا جوڑ مننگ نا پلو آ اسہ بیانیہ اسے…. سولائزیشن نا دا سفر اٹی ہر شار انا وڑ گام خلسا شون ہلکنے… سردار ٹکری میر آتا تینا مخلوق تون رویہ و کڑدار ہرجاگہ ہندا وڑ مسنے… گڑا دادے افسانوی رنگ اٹ اتنگ نا مسخت انت مس..؟ بایدے ہرا زیبائی ٹی افسانہ نا بنداو ءِ تخنگا… ہمووڑ اوڑکن اسہ گچین ءُ کہانی اس واقعہ اسے تون اوار پراثر و سبق آموز ءُ ایسر اسے تون اتنگوسس تو دا افسانہ تینا مٹ تینٹ ئس.. ولے داڑے کس کِسہ شاغے یا حوال اس ایتے، ہندا وڑ ءِ …. راجی شونداری یا راج انا تہٹی زوراکی تا زی آ اگہ خواننگے یا لکھنگے تو اوڑکن پین صنف پین سرحال بھاز ءِ… اگہ داڑکن افسانہ ءِ غرز کروئی مریک تو پلاٹ و کڑدار تون اوار سوگو ءُ واقعہ اسینا رنداٹ کڑدار نا احساس آتے خلسا اسہ پر چس و نتیجہ خیز ءُ کلائمکس و انتہا اسینا گرج آتے پورو کروئی تمک… آخا تو افسانہ تینا ٹریک آن دڑک…. دنکہ ننا پیرانگاک پارہ کہ کوئٹہ مست بھاز چُنک ئس… ننا اُرا تیان برمہ ہوٹل خننگاکہ.. ہشت آنہ غا ڈغار نا فٹ ئس.. یا میڷ پنچ روپئی آ سودا مسکہ… داسہ شار بھلن مس برمہ ہوٹل نا خننگ تو مُر اوڑسکان سر مننگ کن چار چوک نا رش تیان گدرینگوئی تمک…. ڈغار نا فٹ مسہ ہزار و میڷ داسہ سی ہزار آ سودا مریک… محمدامین مست سائیکل آ بارّن ءُ اِرغ ہلککہ داسہ پلازہ غاتا خواجہ ءِ…. دا کل زند اتون اوار مخلوق نا اجتماعی سفر نا کِسہ ءُ…. داٹی افسانہ ہمو وخت مریک ہرا وخت اسہ کڑدار اسینا انفرادی وڑاٹ زند یا واقعہ بیان مرے… لس کڑدار آتے اوار شاغنگ و مرغن ءُ بیانیہ و چندی واقعہ غاتا مجموعہ ناول نا گرج آتے پورو کیک.. افسانہ نا آخا….

ہفتئی تلار

تاک: 30

01-08 August 2020

پنہ : 08