الجبار جل جلالہٗ

خراب مروک آ کاریم، حالیت آتے جوڑ کروک آ۔

امام طبریؒ فرمائفک ”الجبار جل جلالہٗ“ ہمو ذات ہرا مخلوق نا کل کاریم تے و ہمو کاریم تے شون ایتے، ہرا مخلوق نا حق اٹ بہتر ءُ۔

امام شوکانیؒ فرمائفک کہ جبروت آن مراد اللہ رب العزت نا عظمت ءِ، و ہندن عرب آک تینا بادشاہ تے ”جبار“ پاریرہ۔

عالم دینک نوشتہ کرینو کہ اللہ تعالیٰ نا سِفت آتیان اسہ سِفت اس ”الجبار“ ارے و دا ”جبر“ اونا اوصاف آتیٹ اِرا وڑ اٹ اوار ءِ۔

.iاسٹ دا کہ نزور آتا نزوری ءِ مُر کروک آ و پنوک آ است آتے اوار شاغوک آ ذات انا پن الجبار جل جلالہٗ ءِ۔

.ii الجبار نا ارٹمیکو معنہ ہمو قہر و غلبہ والا کہ کل مخلوق آتیا غالب مرے۔

.iii و بھاز آ عالم آک ”الجبار“ نا مسٹمیکو مطلب ءِ دا وڑ نوشتہ کرینو:

ہمو بڑز و بالا انگا ذات ہراتسکان انسان آتا رسینگ مننگ کپ، دا معنہ عربی نا اسہ مقولہ ”الجبارَةُ النَخلَةِ“ آن ہلوک ءِ۔ اونا مطلب ءِ مچ (الار نا درخت) نا مرغن آ بڑز انگا درخت کہ اونا اخیر اسکان بندغ سر مف۔

عربی زبان اٹ جابر نا او معنہ اف، ہرا معنہ کہ اردو زبان اٹی ءِ۔ اردو زبان اٹی جابر ظالم ءِ پارہ۔ ولے عربی ٹی پنوک آ گڑا نا تفوک آ ءِ جابر پارہ۔ دنکہ ہڈ انا پننگ آن گڈ ساٹ کننگے تے، ’جبر‘ و ہڈ آتا ساٹ کروک آئے جابر پارہ۔ اللہ تعالیٰ ہم پنوک آ و تینے آن مُر مروک آ است آتے اوار شاغک و تینے آن خڑک کیک، ہندا سوب آن اونا اسہ سِفت اس ”الجبارجل جلالہٗ“ ارے۔

ہفتئی تلار

تاک: 30

01-08 August 2020

پنہ : 01