او لاڈی آ احمد نعیم……!۔

بھلو وخت اس مس، نوشت آن پاناد مسنٹ، زندگی نا مسہ بھلو ڈکھ کنے ہندن جوڑ کریر کہ ہر شوق بے لذت جوڑ مس۔ منہ دے مست اسہ ڈکھ اس ملا، کنا دوٹی قلم ءِ تس۔ دا وار دا ڈکھ لاڈی آسنگت احمد نعیم نا مچ زند اکن مر مننگ نا غم ئس۔ زیبا انگا بربانک، مخوک آ خنک، معصوم آدروشم، پامدار آ ہیت آتتون احمد نعیم ءِ قدرت ہندن جوڑ کریسس کہ لکھ آتیٹی اسٹ ئس۔ 2006ء ٹی گدان ادبی دیوان سوراب نا مجلس اٹی اوڑتون اولی وار مِلنگ اس ئس۔ اوکان پد احمد نعیم ہمو بندغ آتیٹی ئس کہ ہرافک مدام ننا است اٹی ئسر۔ مدام اوڑتون حال حوال مرسا کریکہ۔ احمد نعیم بوگ شوگ شاعر اس ئس، و گڑاس بوگ شوگ نثر ہم نوشتہ کریسس۔ کنا جند ءِ بوگ شوگ نثرانا شوق احمد نعیم نا نوشت آتیان لگا۔ دن تو اردو ادب اٹی ایم اے کرسا بھاز انگا نوشتکار آک ہم کنا طب ءِ متاثر کریر، اوفتیٹی پطرس بخاری کل آن زیات متاثر کرے۔ احمد نعیم نوشتکار ادیب و انسان دوست ءُ بندغ اسے تون اوار اوار صحافی اس ہم ئس۔ مخلوق نا استحصال و غریبی نا دڑد مدام اوڑا باریم ئس۔ ہراتم احمد نعیم نا کزیت نا بنگٹ، اوڑتون اواری و کچاری نا ہڑدے خن تا مون اٹ برسا کرے۔ نجی ٹی وی نا دفتر اٹی اوڑتون پیشیم آن شام اسکان نا کچاری مرے، یا عدالت روڈ انا خڑک آ خرسی ٹی اوڑتون مزہ دار آ چا انا ہنین آ کچاری مرے، 2018ء ٹی کوئٹہ پریس کلب اٹی گدان ادبی دیوان نا مجلس اٹی احمد نعیم ءِ خناٹ، تینا رنگ ءِ گوہاسس۔ کتابی آ چہرہ مَون ئس۔ اونا خن تا گروشک تننگ کم مسوسس۔ ہراتم اِرغ نا وخت مس، ہرکس اِرغ کننگ اٹی اختہ ئس۔ ای احمد نعیم آن اونا طب انا ارفیٹ، کنے ہندن لگا، اللہ رَد کپ کہ احمد نعیم ءِ نشہ اس تننگانے، یا او تغ والو گولی استعمال کننگ ءِ۔ ہندا ہیت ءِ اودے ہم پاریٹ۔ اللہ اونا مغفرت ءِ کے، کنے انکار کتو۔ سوال کرسا پارے ”اگہ نشہ اس کس ءِ تننگانے، تو گڑا اونا درمان انت مریک؟“ ای اودے اسہ اِرا دوا اس نوشتہ کریٹ تسٹ، زندگی نا باسنی، خرینیک برسا ہنار۔ احمد نعیم تون سوشل میڈیا غا حال احوال مرسا کریکہ۔ اوکان پد انا حال احوال مدام اونا بیماری و علاج نا مسکہ۔

منہ وخت مست ہم اوڑتون حال احوال مس، تینا تکلیف نا بیماری نا گلہ تسکہ۔ ولے خبر اَلو کہ دا تکلیف دے اس نن کل اکن مچ عمر انا تکلیف اس مریک۔ مدام اسہ ڈکھ اس مریک۔ مرک حقءِ۔ کل انا کسر ہندادے، ولے گڑاس بندغ نا جتائی دن زُو گیرام مفک۔ خاص وڑ اٹ احمد نعیم نا مون انگا پژہ غاتتون جتائی، اونا زیبا انگا بشخندہ غاک، اونا گروشک تروک آ خنک، دن زُو مش تا گواچی مننگ کن جوڑ اَلوس۔

کنا افسانہ غاتا کتاب ”نازین“ نا ٹائٹل نا جوڑ کروک احمد نعیم ءِ۔ دا کتاب ہر وخت کن تون مرو۔ احمد نعیم نا یات آک ہر وخت مرور۔ جاگہ نا بہشت مرے سنگت۔