بلوچ کلچر ڈے انا رد اٹ گدان ادبی دیوان ناپروگرام

گدان ادبی دیوان بلوچستان نا کنڈ آن 2 مارچ بلوچ کلچر ڈے انا رد اٹ سوراب اٹی اسہ زیبدار ءُ پروگرام اس مس۔ ہراٹی پیر ورنا چنا و بھلا، پیہن آ پوشاک، زیبا غا دستار نت اٹی مریبُر بلوچی چوٹ، گڑاس ربیدگی ازباب و سلہہ دوٹی کرسا دیوان نا مجلس اٹ ساڑی ئسر۔ دا وخت آ اسہ ریلی اس ہم ٹاﺅن کمیٹی آن کشنگا۔ و سوراب نا بازار ءِ مچ آ پیری کرسا شہید سکندر فٹبال اسٹیڈیم اٹی سر مس، ہراڑے مہالو آن بلوچی گدانک، ربیدگی آ گڑاک ساڑی ئسر۔ و براہوئی زبان نا پنی آ شئیر پاروک آک ہم ساڑی ئسر۔ ہرافتے ٹی عصمت ثاقب، ڈاکٹر ثنا ءاللہ چنال، استاد اسماعیل خنجری، سکندر پروانہ اوار ئسر۔ بلوچی نا پنی آ سازگر آک، سرونز نواز استاد نوردین، دمبورہ نواز عبدالقادر، ڈھولک نواز غلام حسین اسک ہم دا دیوان ءِ زیبائی بشخار۔ پروگرام نا شونکار منیر آزاد، حمید میروانی و عنایت ساغر (حوالکار) اسک ئسر۔ پروگرام اٹی پنی آ بندغ آک ساڑی ئسر۔ گڑا سے نا پنک دا وڑ اٹ ءُ: حاجی عبدالواحد ہارونی، میر علی اکبر گرگناڑی ضلعی صدر بی این پی (عوامی)، میر خدائے رحیم رودینی، ماما حضور بخش نیچاری، ماما غلام رسول تحصیلدار سوراب، شہزاد زہری، نوراحمد مینگل،میر مقبول گرگناڑی، ڈاکٹر اسلم بلوچ، ماسٹر عبدالرحیم میروانی، کوچ نعیم بلوچ چیئرمین، عبدالرزاق زہری، حاجی میر احمد رودینی،محبوب زہری، عبدالصمد حسنی، ڈاکٹر عمران سرور، انجینئر امین میروانی، پروفیسر سہیل میروانی، پروفیسر جیئند زہری، پروفیسر اختر بلوچ، میر رفیق ہارونی، میر علی محمد گرگناڑی، پروفیسر اسحاق میروانی، میر اسرار سمالانی، بابو نصیر ملازئی، حاجی محمد عالم، انجینئر مقصود انور، انجینئر جاوید زہری، ماما خدابخش ٹکری محمد گل ریکی، ایوب بلسم، قاضی عبدالغنی، بابل ریاض مینگل، حاجی فرید ریکی، حاجی نثار مینگل، بابل افغان زئی، شبیر افغانزئی، میر مبارک میروانی، ملک آفتاب مینگل، ماسٹر محمد یاسین، ڈاکٹر اکبر کھیازئی، طفیل نیچاری، صبور لہڑی، نیک جان، بابو عیسی۔ و داکان بیدس ایلو پنی آبندغ آتتون اوار سوراب نا الس نا بھلو کچ اس ہم دیوان اٹ اوار ئس۔

دا وخت آ گدان نا کتاب آتا اسٹال لگوک ئس۔ دا اسہ پین زیبا ءُ ندارہ اس تسکہ۔

دا وخت آ گدان ادبی دیوان نا بانی شکیل زہری، چیئرمین سلام الفت،منیر آزاد،ڈ اکٹر لونگ خان بلوچ و انجینئر حبیب زہری اسک بلوچ کلچر ڈے نا بابت گپ و تران کرسا پاریر کہ پنی آ تاریخدان تا پٹ و پول نا رد اٹ بلوچ قوم انا تاریخ نا نشانیک ہفت ہزار سال متکن آ تہذیب مہر گڑھ آن دوئی مسنو۔ دا بابت بلوچ قوم انا حساب بھا زمتکن آ قوم آتیٹی مریک، ہرا کرار کرار ردوم نا مزل آتینا گام کرسا اینو نا دا پوسکن آ دور اٹی ہم تیان روایت و قدر آتا امین ءِ۔ و نرزور و دلیر ءُ قوم اسے نا وڑ اٹ درست کننگک۔ اوفک پاریر کہ بلوچ قوم اسہ پر امن ءُ قوم اس مسنے، ولے اوفک پیشن نا جارحیت آتے اسہ دور اسے ٹی ہم امنا کتنو۔ گرج دا ہیت انا ءِ کہ بلوچستان اسمبلی ٹی تولوک السی نمائندہ غاک آئین نا آرٹیکل 251 نا شق 3 انا رد اٹ لمئی بولی تا بقاءشونداری و شونہالی و دود ربیدہ غاتا رکھنگ کن جوان ءُ کانود اس جوڑ کرسا تدریسی نصاب نا کمک اٹ اینو نا ورنا چین ءِ بلوچ قوم انا باوہ پیرہ، اوفتا تاریخ و کارنامہ غاتیان درستی راستی کرفنگ اٹ تینا قومی کڑد ءِ ادا کیر۔ دن مف کہ ورنا چین پوسکن آ ٹیکنالوجی و پیشن نا ربیدگی جلہو آتا مون اٹ تینا تاریخ، تہذیب ربیدہ غاتے گیرام کے۔

ترانکار آک گدان ادبی دیوان نا کنڈ آن بلوچ کلچر ءِ درستی راستی کرفنگ و ورنا تے تینا دود ربیدہ غاتیان درستی راستی کرفنگ کن ہرفوک گام گیج آتا ستا ءِ کریر، اوفتا قومی جوزہ ءِ سلام کریر۔ دود اٹی حاجی فرید ریکی بلوچی حال حوال کرے، و میر علی اکبر گرگناڑی اودے حوال تِس۔ ہرا ساڑی بندغ آتے بھاز وڑا۔ اسٹیڈیم اٹی ورناک بلوچی چاپ کریر۔ و پنی آ ازمکار استاد اسماعیل خنجری، استاد عصمت ثاقب و ڈاکٹر ثناءچنال اسک زیبا ءُ شئیر و باگل بنفسا دود ءِ ٹِک و نگار کریر۔ دا وخت آ گدان ادبی دیوان نا کنڈ آن بلوچ ربیدگی گڑا و ادبی کتاب آتا اسٹال ہم خلنگاسس، ہراٹی بشخ ہلوک آک بھاز است خواہی نشان تسر۔ دا وخت آ مشاعرہ اس ہم اڈ تننگاسس، ہراٹی سوراب نا پنی آ شاعر آک تینا کلام آتے پیش کریر، وخت اس کہ بیگہ تون حمل و جیئند کلب و نوری نصیر خان کلب نا نیام اٹ فٹبال میچ اس ہم کرفنگا۔

ہفتئی تلار کوئٹہ، تاک 12، سال 17، پنہ 3

21-27 March 2020