ویل اس برے تو انت کروئی ءِ (گپ و تران)

انسان نا زند اٹی چنکو بھلو ویل و امتحان بریرہ، دا رد اٹ ہر علم بندغ ءِ سدھ و سنبھال، سگ و صبر انا سبخ ایتک۔ تاریخ مون انا وخت آتیٹی دن ءُ مشکل ودی مننگ وخت آ بندغ آتا کڑد ءِ نشان تسنے۔ نفسیات حالیت آتا جاچ ءِ ہلنگ نا پاہک۔ راجی علم نزوری تے پاش کننگ یا اوفتیا ٹک خلنگ نا رماغک۔ مذہب بندغ ءِ بج آن تولوک آ مصیبت آتا دنیاوی نزوری تتون عقل اٹ مون تننگ آن معلومدار کیک۔ تینا دود و ربیدہ غاک ایلمی و اخلاقی زمواری تے سوگو تخنگ نا درشانی ءِ کیرہ۔ دا نیام اٹی ہر بندغ مشکل آتے تینا چشمک اٹ ہرک۔ خڑک و مر انا دشمنک کس انا ویل آ خوش مریرہ، ہندن ہَد و اویل نا بندغ آک ہرافک پش اس ہم انسانیت یا دیخ ءُ احساس اس ہم تخرہ، اوفک ایلو نا ویل ءِ تینا ویل تکرہ۔ تینا وس اٹ ایلو نا مشکل آتے کم کننگ کن نت و دُو خلیرہ۔ بھاز انگا بے وس آ بندغ آک پین ہچ کننگ کتوس، دعا کن دو تے بڑزا کیرہ۔ یا کنج اسے ٹی تولوک خڑینک شولرہ۔ ہرا بندغ آ ویل اس بریک، المی ءِ کہ او دا کل ءِ گڑا تے پہہ مرے۔ تینا دامون ایمون تولوک آ بندغ آتا مگرمچھ نا خڑینک شولوک آتے ہم پہہ مرے۔ یا ہرافک اسہ مشکل آن زیات پین مشکل ودی کننگ نا نیت اٹ تولوک آتیا نظر تخرہ، مننگ کیک کہ اسہ بندغ اس دن انگا وخت آ با ءِ بند تورے، ہمو بھلو خیر خواہ اس مرو ءِ۔ بس سیانڑاک پارینو کہ بندغ آ اسہ ویل اس برے تو اودے او وخت آ نئے کل ءِ دشمن سرپند مروئی ءِ، و نئے کل ءِ تینا ہم خیال و ہمدرد تکوئی ءِ۔ بس دا ہروئی ءِ کہ ویل امر و ہراکان بسنے۔ انت دا ویل پین ویل اسے تون گنڈوک تو اف؟ و ساڑی آ ویل انا نسخان اخہ در ءِ۔ بروک آ ویل انا نسخان اخہ در مرو ءِ۔ اگہ او ویل امتحان اسے تو اودے امتحان پہہ مرسا اوڑان پیش تمنگ کن نت دو خلوئی ءِ، و اگہ ویل نسخان ایسنے تو او نسخان آتا پورواری کن ہرا کسر ءِ ہلوئی ءِ۔ ویل کاریم اسے نا بنا غان ہم بنا مننگ کیک۔ ویل نیام کسر اٹی ہم بننگ کیک۔ ویل کاریم اسے نا ایسر مننگ آن گڈ ہم پاش مننگ کیک۔ بندغ زند اٹی دا کل اکن مدام تیار مرے۔ و ویل آک اگہ زند اٹی ودی مفس تو زند اٹی خیر و شر انا فلسفہ چٹک۔ جوان و گندہ نا فرق پاش مفک۔ ہندا سوب آن ہر علم انا بنداو ہندا گڑا تیا تخوک ءِ۔ ویل آتیان گدرینگ انگ ویل آتے پہہ مننگ ویل آتتون مون تننگ نا اسٹ آ سلہہ علم ءِ۔ علم متبر مس بندغ متبر ءِ، بندغ متبر مس، قوم و خاہوت متبر مرور۔ ہندا سوب آن اینو نا ہر دانشور، سیانڑا غا بندغ تینا بروک آ نسل ءِ زیات آن زیات علم انا کسر آ شاغنگ کن پاہک۔ علم تینٹ بیدس مشکل اسے آن گدرینگ انگ آن دو بفک۔ علم جن آن پُر کپی آ است آتیٹی جاگہ کپک۔ علم ہمو است آتیٹی جاگہ کیک ہرا سفا ءُ نیت اس تخرہ۔ سفا غا است اٹی مزل اس مریک۔ اسہ گچین ءُ پروگرام اس مریک۔ زند و آخبت ءِ جوان کننگ نا اومیت اسیٹ ولشت ہلیک۔ بندغ تون اصل گڑا فکر ءِ۔ بے فکر آ ہیروئن کشوک آ بندغ آنبار ءِ۔ ہرا مشکل آتیان نروک آ بندغ ءِ، ہرا تینا نشہ ءِ آسودہی خیال کیک، ولے ہراتم اونا نشہ کٹک، اونا خواریک اودے چونڈک ہلیرہ۔ و ہڑدے نا ویل آن پیش تمنگ کن ہڑدے نشہ کیک۔ دا ہمو ویل ءِ ہرادے بندغ بہا اٹ ہلیک۔ زند ءِ بیرہ ویل آتیٹ گدریفک۔ ساہدار اسے آن پراگندہ ءُ زند اس گدریفک۔ تو زند انا ویل آتے علم اٹ پہہ مننگ علم اٹ چٹنگ، علم اٹ کھڈ کننگ اسٹ آ وسیلہ ءِ۔ ہرادے ننے دوئی کروئی ءِ۔

ہفتئی تلار 

تاک: 38

03-09 Oct, 2020

پنہ: 01