ننا قوم انا بخت

اینو نا پوسکن آ کرن ءِ ہرِن تو بھاز مستی ہنانے۔ بیست و یکمی کرن پوسکن آ ٹیکنالوجی تا دور یا کرن پاننگک۔

ٹیکنالوجی نا سوب آن ہر پِڑ آ بھلو شونداری اس بسنے۔ دنیا نا ہر پڑ ءِ ہُرِن تو اوڑے بندغ آتا گام رسینگانے، او تینا پٹ و پول آتے کننگ ءُ۔ شوندار آ ملک آتیٹ تعلیم، علم و رژن بھاز بڑزا ہنانے۔ دا غُٹ پوسکن آ ایجاد آک ہم ہمو قوم آتا خواری تا دو آن مسنو۔ اینو نا کرن اٹی ناسا (NASA) تُوبے و مریخ نا زی آ مخلوق کن جاگہ پٹنگ ءِ کہ نن ہموڑے بندغ آتے جاگہ رہینگ انگ نا لائخ جوڑ کین۔ ایلو سائنسی ایجاد آک مریر یا بائیولوجی، اکنامکس، سوشیالوجی، کیمسٹری، کشت و کشار، ادب، انفارمیشن ٹیکنالوجی، او غُٹ بشخ آتیٹ بھاز شون ہلکنو۔ مچ آ دنیا منہ شوندار ملک انا مے جوڑ ءِ۔

انتئے کہ دا شوندار آ قوم آک بھلو خواری کریر خید و خواری کریر دنیا ءِ شون تسُر۔ اینو نا دنیا داخس زیبا ءِ و مونی ءِ دانا سوب ہمو قوم تا خید و خواریک ءُ۔

او قومک گمراہ، جاہل، بے علم الوس۔ نن تعلیم ءِ اسہ روزگار اس جوڑ کرینن۔ ہراڑے چناتے بیرہ دا سوب آن نن تعلیم تنِنگ اُن نوکری اس ہلیر یا پرائیویٹ ءُ اسکول اس ملر، پیسہ کٹسا کیر۔ و چناتا مچ آ زند ءِ تینا کاروبار کن تباہ کیر۔ ہمو چنا پگہ نا دے ریڑی اس سڑک نا رہی آ کشے، دکان اسے ٹی کاریم کے۔ مستری اسے تون مُزوری کے یا اسہ راج اسے کن بلہ اس جوڑ مرے۔ کس انا ایڑھ انا گُد آ دو شاغے۔ کس انا کاٹم نا سودا ءِ چار گولی ٹی خلے۔یا غریب اسے نا دو آن موبائل، موٹر سائیکل اس پلے۔

نن دا پوسکن آ دور اٹ شونداری نا گند اسے کن سکنہ تو دانا سوب خوانِنگ آن مُری ءِ۔ چنا تے آخبت تروک ءُ بندغ نا کمبوتی ءِ۔ لمہ، باوہ بیرہ چناتا پڈ انا غم اٹ ڈُب ہلوک ءُ۔ تعلیم نا پارہ غا ہچ چکار اف، چنا تے تینا پانہ کہ اسکول آ ہنبو ولے ہچ تربیت نا پن ءِ ہلپسہ۔ گڑا سوج دا ودی مریک کہ نن امر تینا کلّی ءِ شون ہلوک آ ولایت آتیٹ درنجنگ کینہ یا درنجون؟

اینو نا دور اٹ ننا ورنا تا چکار علم آن بھاز چَپ ءِ۔ بے غرض و گمراہ کروک آ سوچ و گڑا تا کُنڈ آ روان ءِ۔ سریاب آن ہلیس تے حب چوکی اسکان ننا ورناک نشہ، چڑس، ہیروئن، شراب یا پین ہندن انگا گڑا تے ٹی تینا سینہ و اُست ءِ موڷ و زراب اٹ ہُشِنگ ءُ۔

ایلو کُنڈ آ نن ہُرن کہ ہندا علاقہ غاتیٹی ادبی سوسائٹی، ادبی تحریک، یا پین ترقی پسند قوم و ملک دوست ٹولی اس جوڑ مننگ نا جاگہ غا ہندن انگا بے مسکت آ ٹولیک جوڑ مننگ ءُ کہ ہرافتا مسخت بیرہ ورنا تے گمراہ کننگ، تعلیم و کتاب خواننگ آن مُر کننگ، موٹر سائیکل آتا گمراہی، ریلی، اسہ ٹیر آ موٹر ءِ چرخ تننگ (ون ویلنگ)، نشہ، چڑس و گندہ کاری ہرافتا بھلا مسخت ءِ۔ ایلو کُنڈ آ ہُرن تو ننا شئیرجن و گشندہ غاک ہم داٹی اوار ءُ۔ او ہم ساز و زیمل یا محفل آتے ٹی دافتا کردار ءِ نازیفرہ۔ ادیب و گشندہ راج انا آدینک مریک او راج انا کل گمراہی و سٹی آ گڑاتے نشان ایترہ۔ پہہ کیرہ ولے اینو اُست ہسونی ناہیت اسے کہ ننا راج انا ادیب ہم تینا کاریم ءِ اُست آن درینے۔ گشندہ تینا باٹی مُنگ شاغانے، اُستاد ہم تینا چناتے سبخ ہیل تِننگ اٹ بے سہب مسنے داسہ زوال نا کسرک ہر کُنڈ آن یلہ ءُ۔ ہر کس تینا گوازی ٹی اختہ مرے تینا زوال نا کسر آ ادیب آک تولوک مریر۔ دانشور آتے کافر نا پن اٹ گُٹو کین کسفن۔ جاہل آتا چوٹ آتے سدھا کین۔

دن انگا قومک تینٹ غریبی لنگڑی نا مون آ گُوڈ خلیرہ۔دافتا کردار دنیا ٹی ہچ مفک۔ دن انگا قوم آتے تاریخ بشخپک۔ دن اننگا قوم آتے بروک آ نسل آک لعنت کیرہ۔

اگہ ننے دا راج اٹ زندہ مروئی ءِ تو نن لائخ مرین تینے و تینا بروک آ زنک و زیزاد ءِ کتاب و قلم نا خواجہ جوڑ کین۔ تاکہ ڈیہک اوفتیا گمر کیر۔ دن کہ مُلّا مزار کون ءُ لائخ ودی مرسا کاہے۔ ہندُن برو ملا مزار اس، مزاری ءُ پدا تاریخ اس لکھو کہ کنے ریکی و ملا مزار نا وڑ ءُ ادیب بکار ءِ۔ نوری نصیرخانی ءُ جوزہ، ہمت و کڑدار اس بکار ءِ۔

ہفتئی تلار
تاک: 12
26-20 مارچ 2021ء
پنہ: 4