کیہی دے آن مسلم لیگ نواز لمیٹڈ ڈیمانڈ کننگ ئس کہ این آر او دیر خواہسنے، آ دادو نما خواست آک، سینیٹر شبلی فراز

اسلام آباد(آن لائن) بنجائی وزیر حوالکاری سینیٹر شبلی فراز نیب آرڈیننس ترمیمی بل آ مسلم لیگ ن او پیپلزپارٹی نا سفارش آتے  شیئر کرے۔ راجی رابطہ غاتا سائٹ ٹوئٹر آ اسہ  ٹویٹ اسے ٹی شبلی فراز احتساب آرڈیننس 1999 اٹ ترمیم کن پیپلز پارٹی او مسلم لیگ (ن) نا مجوزہ ترامیم نا صفحہ غاتے  شیئر کرسا نوشتہ کرے کہ کیہی دے تیان مسلم لیگ نواز لمیٹڈ ڈیمانڈ کننگ اٹی ئس کہ این آراو دیر خواہسنے، کنا خواجہ غاک داد ءُُ  وڑک و دستاویز آک ہرافتا کمک اٹ این آر او خواہسنو۔ او پارینے کہ  تاریخ گواہ ءِ کہ ہر وار مسلم لیگ ن نا کماش آک ملک او کانود آن فرار نا کسر ءِ دوئی کرینے۔ سینیٹر شبلی فراز نا کنڈآن شیئر کروک آ دستاویز آتا رداٹ پاکستان پیپلزپارٹی او مسلم لیگ (ن) نا کنڈآن قومی احتساب آرڈیننس 1999 نا سیکشن 18 ٹی مجوزہ ترمیم نا مسودہ ٹی پاننگانے کہ نیب دوبہ نا ارتکاب یا پیسہ غاتا راہی کننگ ءِ 5 سال گدرینگ انگ آن پد ہم مروک آ دوبہ نا جاست و پاست، تفتیش یا ریفرنس دائر کپک۔ دستاویز آتے ٹی درج ئس کہ آرڈیننس نا ذیلی شقb اٹ پُوسکن آ ذیلی شق (bb) ءِ مون آ اتنگ آن پد  قومی احتساب بیورو (نیب) شیفکو حالیت آتے ٹی دوبہ غاتے ٹی ہچ ُ ایکشن اس ہلپک۔ (i) ہندن ءُُُ غاو ہرا نادرست یا فرضی پن اٹ کننگانو۔ (ii) ہراٹی اُلس نا پیسہ اوار مف۔ (iii) ہراٹی اوار انگا پیسہ غاک ارب روپئی آن کم مرے۔ نیب آرڈیننس نا سیکشن 25 ٹی ترمیم نا بابت اٹ پاننگانے کہ تروک آ شق اے ءِ چٹفنگے او تروک آ  شق بی نا رداٹ پاننگاسُس کہ جاست و پاست انا پارت تننگ آن پد یا انکوائری نا وخت، ٹرائل بنا مننگ آن مُست یا پد آن یا اپیل نا وخت اٹ سرکاری عہدہ تخوک آ یا پین بندغ اس اسہ دوبہ سے نا نتیجہ ٹی جوڑ کروک آ اثاثہ یا دوئی کروک آ فائدہ غاتے پدی کننگ نا سلاہ ایتے تو دا آرڈیننس نا رداٹ چیئرمین نیب، کیس انا راستکی او ایلو گڑاتیا سجفسا اوفتا شڑت و ضوابط آتے اوفک المی سمجر اوفتے مون آ تخسا دا وڑ نا پیشکش ءِ امنا کننگ کینہ۔داڑان بیدس داٹی داہم پارے کہ اگہ سرکاری عہدہ تخوک ءُُُ پین بندغ اس چیئرمین نیب نا متعین کروک آ پیسہ غاتے پدی تننگ آ راضی مرے تو دا کیس ءِ سرکاری عہدہ تخوک یا پین کس اس یا دوبہ ٹی شریک نا یلہ کننگ نا بابت کیس ءِ منظوری کن عدالت یا اپیلیٹ کورٹ اٹ راہی کننگک۔ دستاویز اٹ نوشتہ کننگا کہ اگہ چیئرمین نیب دا وڑ نا سلاہ تیان نمن مرے تو سرکاری کمامدار یا پین بندغ اس دا سلاہ غا غور یا منظوری کن ڈائریکٹ عدالت تون مون تننگ کیرہ۔