۔’’اخوت‘‘ ویژن جہانی کہول آ نیزگاری نا چٹفنگ کن گچین ءُ ماڈل اسے، برطانوی اخبار

اسلام آباد۔: چنکا وام تا کمک اٹ زند ءِ بدل کننگ نا ڈاکٹر امجد ثاقب نا ’’اخوت‘‘ ویژن جہانی کہول آ نیزگاری نا چٹفنگ کن گچین ءُ ماڈل ، مخلوق نا قسمت ءِ بدل کننگ نا ذریعہ و نیزگاری نا برخلاف اسہ واکدار ءُ سلہہ سے۔ برطانوی اخبار’’انڈیپنڈنٹ‘‘ تینا ایشیاء ایڈیشن اٹی تدوک آ دے ڈاکٹر امجد ثاقب نا ’’اخوت فاؤنڈیشن ‘‘ نا جہد نا جوان انگا لوز آتیٹی ستاءِ کرسا دنیا ءِ واکدار کننگ و جہانی کہول آ نیزگاری نا چٹفنگ کن ڈاکٹر امجد ثاقب نا مائیکرو فنانس ویژن ءِ گچین ءُ ماڈل اسے نا وڑاٹ تالان کرینے۔ برطانوی اخبار ناآرٹیکل اٹی پاننگانے کہ جہانی ایوارڈ ہلوک ڈاکٹر امجد ثاقب چنکو کچ اسے آ وام تا کمک اٹ نیزگار و پدسلوک مخلوق نا زند ءِ بدل کننگ اٹ اہم ءُ کڑد اس ادا کرے۔ مضمون اٹی پاننگانے کہ جہانی نیزگاری نا مقابلہ ءِ کننگ کن میدان اٹ ڈاکٹر امجد ثاقب اومیت و جدت نا نشانی مرسا بس۔ اوتینا سنگت آتون اواری اٹ اسہ ہندن ءُ ماڈل اسے نا بنداو ءِ تخا ہرانئے بیرہ نیزگارمخلوق بلکن اوفتا خاہوت آتا زندء ِ بدل کرے و راج اٹ اسہ پوسکن ءُ نظام اس درستی راستی کرفے۔ اخبار نا رداٹ مائیکرو فنانس نا بشخ اٹی ڈاکٹر امجد ثاقب اسہ چیمپیئن اسے و اونا درستی راستی کرفوک آ ماڈل بیرہ اسہ مالیاتی نظام اس اف بلکن راجی بدلی نا اسہ واکدار ءُ ذریعہ اسے۔ پروگرام نا رداٹ ہمو تپہ غاتے چنکو کچ اسے آ بے سود چنکو وام تننگا ہرا روایتی بینکنگ نا نظام اسکان رسینگ تخپسہ و نئے بینک اوفتے وام ایتک۔ اخوت نا چنکا وام تیان کاروبار بناکرے، تعلیم ءِ برجاتخنگ و زند انا وارخواہی دُوبس۔ دا ماڈلءِ نئے بیرہ ملکی کہول آ جوان پذیرائی ملا بلکن داسہ دا مچ آ دنیا کن اسہ ماڈل اسےنا وڑاٹ  اہمیت اختیار کرینے۔ اخبار نوشتہ کیک کہ ڈاکٹر امجد ثاقب نیزگاری نابرخلاف ننا جنگ اتون مون تننگ کن انسان دوستی و چنکو مالی کمکاری اسے اسہ واکدار سلہہ اس تکک۔ اوپاہک کہ ، اونا مسخت تین پہ تینی کمکاری نا اسہ نظام اس جوڑ کرسا مخلوق ءِ بے سود وام فراوان کرسا واکدار کننگ ءِ۔ اخوت نا بانی چیئرمین ڈاکٹر امجد ثاقب 2001اٹی 100 ڈالر آن سود آن پاک مائیکرو فنانس ادارہ نا بنداو ءِتخا و داتم اسکان اسہ ارب ڈالر روپئی نا چنکو وام فراوان کرینے ہراڑآن 60 لکھ آن زیات خاہوت آتا زند ءِ بدل کننگ اٹ کمک ملانے۔ اخبار ڈاکٹر امجد و اونا سنگت آتا وژن ءِ مخلوق ءِ خودکفیل جوڑ کرسا نیزگاری نا چٹفنگ ءِ پک کننگ کن اسہ سرسہب ءُ ماڈل اس گوندانے۔ اخبار نوشتہ کرینے کہ بھاز انگا پدتموک ملک آتیٹی آبادی نا اسہ بھلو بشخ اس بینک و مالیاتی ادارہ غاتسکان رسینگ آن محروم ءِ ، ہرانا سوب آن او نیزگاری نا مین اٹ کارہ، ڈاکٹر امجد ثاقب نا دا ماڈل دامخلوق کن اومیت نا اسہ روشنائی اسے۔ بے سود چنکا وام تا جاری کننگ آن پدسلوک علاقہ غاتا زالبول آتے واکدار کننگ ہم ممکن ءِ۔ مضمون اٹی پاننگانے کہ مچ آ دنیاٹی داماڈل ءِ پذیرائی ملنگ ءِ۔ ہرانا اعتراف ڈاکٹر امجد ثاقب ءِ 2021اٹی رامون میگسیسے ایوارڈ (ایشیاء نا نوبل انعام نا مساوی) ، 2018ٹی اسلامی اقتصادیات ایوارڈ، 2022اٹی نوبل امن انعام کن پنداری، 2023اٹی گلوبل مین آف دی ڈیکیڈ ایوارڈ، ورلڈ اکنامک فورم، شواب فاؤنڈیشن، و مرحوم ملکہ الزبتھ دوم نا ’پوائنٹس آف لائٹ‘ ایوارڈآتا دروشم اٹ کننگانے۔ مضمون اٹی پاننگانے کہ ڈاکٹر ثاقب و اخوت نا ماڈل غیرروایتی ءِ و دا پسماندہ تپہ غاتے ہرفنگ کن اسہ نیٹ ورک اس جوڑ کیک، بندغ و کمیونٹی اسہ ایلو نا کمک ءِ کرسا مون آ کارہ۔ مضمون اٹی پاننگانے کہ ڈاکٹر امجد نامائیکرو فنانس ماڈل نا سرسہبی حیران ومتاثرکن ءِ، و راج آ دانا اثر بھاز گہرا و دورس ءِ۔ سرسہبی نا داماڈل نیزگاری نا برخلاف جہانی جنگ اٹی اسہ واکدار سلہہ اس جوڑ مننگ کیک۔مضمون اٹی پاننگانے کہ داوڑاٹی وخت اس کہ دنیا زرگزرانی بے بریبری و جہانی دین تتون اوار پیچیدہ زرگزرانی چیلنج آتون مون تننگ ءِ۔ ڈاکٹر امجد ثاقب نادا وژن پائیدار راجی و زرگزرانی شونداری نا بنداو جوڑ مننگ کیک۔

(اے پی پی)