صدر زرداری نا پامداری آن ملک شون ہلیک، جمال رئیسانی

اسلام آباد (اے پی پی) پاکستان پیپلز پارٹی نا کوئٹہ غان قومی اسمبلی نا باسک نوابزادہ جمال خان رئیسانی صدر مملکت آصف علی زرداری ءِ عہدہ ءِ سنبھالنگ آ مبارکبادی ترسا پارینے کہ آصف علی زرداری نا سیاسی چاہنداری، پامدار آ پالیسی و فیصلہ غاتیان ملک شونداری و الس شونہالی نا کنڈ آ کارہ، بلوچستان نا شونداری و شونہالی کنا اولیت ءِ، بنداوی آسراتی بلوچستان ناالس نا اولی حق ءِ، ہراڑکن دے و نن خواری کیوہ، ای تینا شہید باوہ نا مشن ءِ برجا تخوہ۔ او شنبے نا دے آ ایوان صدر اٹی سوغندی دود آن پد صحافی تتون گپ وتران کریکہ۔ ایم این اے جمال خان رئیسانی اومیت درشان کرے کہ صدر مملکت آصف علی زرداری غٹ بنجائی اکائی تتون اوار کاہک، و بریبر شونداری نا تینا ویژن ءِ مون آ دیک۔ اوپارے کہ بلوچستان اٹی جان جوڑی، تعلیم، بنداوی پنجر، لس مخلوق ءِ روزگار نا فراوانی و زہمی مروک تپہ غاتیکن دے و نن کاریم کیوہ، قومی اسمبلی آن بلوچستان نا اسہ سوگو ءُ توار اس مریوہ۔ اوپارے کہ جھل مگسی اسہ پدسلوک ءُ علاقہ اسے، کنا شہید باوہ نا مشن ئس کہ دا علاقہ ٹی ہروڑنا آسراتی تا فراوانی اتون اوار اوار مچ آ بلوچستان نا شونداری ٹی تینا بشخ ءِ شاغیو۔ دا مشن ءِ مون آ دننگ کنکن شرفمندی نا ہیت اسے۔ اوپارے کہ بلوچستان نا شونداری و شونہالی کن حکومت، الس و نجی بشخ انا نیام اٹ کمکاری المی ءِ، ننے غٹ ءِ اواری اٹ کاریم کروئی مریک تانکہ بلوچستان ءِ اسہ شونہال و شون ہلوک صوبہ اس جوڑ کننگ کین۔