آئی پی یو نا جمہوریت کن ہرفوک آ گام گیج آک ستا کڑزرہ، چیئرمین سینیٹ

اسلام آباد(آن لائن)چیئرمین سینیٹ محمد صادق سنجرانی پارینے کہ انٹرا پارلیمانی یونین عالمی پارلیمانی کمک او اقوام عالم نا نیام اٹ ڈائیلاگ نا اُست بڈی ءِ کننگ ءِ۔ آئی پی یو نا جمہوریت کن ہرفوک آ گام گیج آک ستا کڑزرہ، دا بابت اٹ 130 سال پورو مننگ آ جاری مروک آ رپورٹ بھاز بھلو سرسہبی اسے۔ انٹرا پارلیمانی یونین نا سفر کثیر الجہتی پارلیمانی تنظیم نا وڑ اٹ بنا مس۔ آئی پی یو جہانی پارلیمان آتا اسہ بھاز بھلو تنظیم اس جوڑ مسنے، اینو اقوام عالم ءِ راجی و اقتصادی امن، انسانی شونداری تون اوار ایلو ویل آک مون تروک ءُُُ، ولے دا ہیت اٹل ءِ کہ امن و شونداری نا اسہ ایلو تون بھلو تعلقداری اسے۔ وخت اس کہ  صدر آئی پی یو گبریلا کویس بیرن پارینے کہ امن شونداری و سلامتی کن ننے گام گیج آتے ٹی پین ترندی اتوئی مریک۔ پارلیمان اُلس نا اُست خواہی تا مظہر ءِ او دا ہر سال انا کارکڑد رپورٹ ءِ اہم ءُُُ وخت اسے آ جاری کننگانے۔ نن دا وخت آ سخت ءُُُ وخت اسے آن گدرینگ انگ اٹی اُن۔ کورونا دَین ننکن پُوسکن ءُُُ ویل ودی کرینے، جانجوڑی، اقتصادی او ایلو کہول آ اقوام عالم ءِ ویل آک مون تروک ءُُُ، موسمیاتی بدلیک، صنفی عدم مساوات،انسانی حق آک او ایلو ویل آک اینو ہم سجفنگ کن ہروک ءُُُ۔ صدر آئی پی یو مستی پارے کہ ننا ویل آک کل انا ءُُُ، ویل ہچ ءُُُ پاسپورٹ اسے آ سفر کننگ کپک۔ کورونا دَین اسہ ملک آن ایلو ملک اٹ پترینگ انگ کن کس اسے آن موکل خواپک ننے کل ءِ دا ویل آ کنٹرول کننگ کن اواری ٹی کاریم کروئی مریک۔ کثیر الجہتی کمک ویل آتا ایسری نا اسٹ انگا کسر ءِ، دین آ کنٹرول کننگ کن حکومت او پارلیمان ءِ ملسا حکمت عملی جوڑ کروئی مریک، پارلیمان نا کاریم انسانی حق او جمہوریت نا رکھ ءِ، کثیر الجہتی کمک پائیدار شونداری کن المی ءِ۔ پارلیمان بین الاقوامی معاہدہ غاتے قومی حقائق آتا روشنائی ٹی عملدرآمد ءِ پک کننگ کن گام گیج ہرفک، او وخت آ ایگزیکٹو ڈائریکٹر پپس محمد انوار پارینے کہ آئی پی یو بین ادارہ جاتی کمک ءِ اہم تکک او پپس ہم ادارہ جاتی کمک ءِ جوان کننگ نا خواہندار ءِ، آئی پی یو پارلیمان آتے خڑک اتنگ اٹ اہم ءُُُ کڑد اس ادا کننگ اٹی ءِ۔ پپس ادارہ جاتی کمک کن کوشست آتے قدر انا نگاہ ٹی ہرک، کورونا دَین نا سوب آن ودی مروک آ حالیت ادارہ جاتی کمک نا اہمیت ءِ پین ودفینے۔