نا و کنا لگپک

اگہ اِرا بندغ اسٹ ایلوڑتون بریبر تمپسہ، تو دانا دا مطلب اف کہ او ہڑتوم آ بندغ آتے خاہوت وقوم اسے کن مثال جوڑ کننگے، اوفتا گناہ و ثواب آتے مچ آ خاہوت و قوم انا معیار جوڑ کننگے۔ ننا دامون ایمون ہندن ءُ چاگڑد اس جوڑ مسنے، ہرانا سوب آن اسہ بندغ اس اگہ ایلوڑان خر کرے تو اونا مچ آ خاہوت و قوم ایلوڑان خر کیک، بندغ بھلن مرے یا چنک، اوڑان خطا مننگ کیک، و زمانہ نا معیار آ شیف مننگ کیک۔ یا بندغ اس تینا تہٹی لائخی اس تخک، عقلندہ ئی اس تخک، باید تو دادے کہ خطا کروک آنا خطا ءِ کل تینا کاٹم آ ہرفپس، و نئے اسٹ اسے نا لائخی آ نابود آک درِکرسِٹر۔ اگہ اسٹ نا خطا غا اودے کل ملامت کریر، مننگ کیک کہ ایلوفتے کن خطا نا کسر چٹے۔ ہندن لائخ آ بندغ ءِ مثال جوڑ کرسا ایلوفک ہم لائخی نا کسر آ راہی روان مننگ کیرہ۔ ولے ننے ٹی بھاز انگا تا عادت ءِ کہ اوفک اسٹ اسے نا غزہ و کٹیا غا ہندن چاپ خلیرہ کہ کس پاہے او کٹیا ٹی ہمو کل انا دُو ءِ۔ ہندن خطا نا مخ تفی ءِ ہندن کیرہ کس پاہے ہمو خطا ءِ ہمو کل کرینو۔ اگہ قومک خاہوت آک شون ہلکنو، اوفتیان ہر اسٹ تینے کٹیا نا لائخ جوڑ کرینے، و اگہ اوفتیان کس اسے آن خطا اس مسنے ایلوفک شکی مسنو۔ ہمو بندغ ءِ تینا نیام آن کشانو۔ اودے خطا نا زموار جوڑ کرینو، دن ہم مسنے کہ اوڑان تعلقداری ءِ چٹفینو۔ تاکہ نن زند انا دا اِرا معاملہ غا است انا ہُب اٹ ٹک خلتنن نئے ننا دامون ایمون نابودی نا کسر چٹو ءِ، نئے لائخی شون انا کسر آ راہی روان مرو ءِ۔ ننا قبائلی جھیڑہ غاک مچ آ زند چٹپرور۔ ننا لائخ آتا لائخی ہچ ءُ جاگہ اس پاش مفرو ءِ۔ نئے دنیا اوفتا لائخی ءِ منو ءِ۔ و نئے بروک آ نسل آک دا لائخی ءِ مستی درور۔ دا ہیت آتے مون آ تخسا ننے سوچوئی ءِ کہ ننے ٹی میر یوسف عزیز مگسی وڑ ءُ بندغ انتئے ودی مننگ اٹی اف۔ میر غوث بخش بانجو وڑ انا سیاستدان انتئے جوڑ مننگ اٹی اف۔ احمد بخش لہڑی کون ءُ خواری کش ایماندار منسبدار اسٹ آن ارٹ انتئے متنو۔ اگہ ہر زمانہ ٹی اسٹ اِرٹ دن ءُ بندغ ودی مسنو ہم تو اوفتا رند اٹ کس انتئے ہنتنے۔ رند اٹ ہننگ تینا جاگہ غا دن انگا بندغ آتے اوفک یات ہم کپسہ۔ اوفتا سنگتی آ ناز کروک ءُ ہم اف۔ مننگ کیک کہ اوفک اسہ نہ اسہ جاگہ اسے ٹی منہ ساہت اکن یات مریر۔ ولے ہرا کہ قومی فخر ءِ اونا جوزہ انتئے پدین پدین خننگک۔ دا عجیب ءُ ہیت اسے کہ اگہ وخت اس کس اس دن ءُ قوم اسے نا ہیرو اسے نا ہیت ءِ کرے یا اوفتا جوانی تیا روشنائی شاغا تو یار آک پارہ نن مڑدہ پرست ءُ قوم اسے اُن۔ حالانکہ دنیا نا بھاز انگا بھلا بندغ آتا جوانیک، کٹیاک اوفتا دنیا ءِ اِلنگ آن گڈ پاش مسنو۔ اوفتا حقی آ جہد و کوشست آک پد آن راہشونی نا سوب جوڑ مسنو۔ قومک زیات و مچے نف انا گڑا تے پاش کیرہ، نن مچے و بے نف گڑا تے زیات یات کینہ۔ ہزار آ لائخی تے اسہ چنکو نابودی سے آ قربان کینہ۔ اگہ ہمو اسہ نابودی نا پد و رند ءِ خلین مننگ کیک کہ او نابودی اس مف۔ مجبوری اس مرے۔ دروغ و دوبہ اس مرے، ایہن ہم باید اف کہ نن کل کس اسے نا چنکو نابودی اسے زند انا ایلو کٹیا تیا قربان کین یا وخت ءِ برباد کین۔ حالانکہ وخت تینٹ اسہ بھلو چانڑی اسے، جوان و بد ءِ تینٹ چانڑد کیک۔ دن ءُ صبر خدا ایتے کہ بندغ وخت انا انتظار ءِ کے، ہرا خاہوت و قوم اٹی کہ وخت اس ہر بندغ نا دوٹی فیصلہ نا چھڑی مریک، اوڑے فیصلہ غاک غانڈ کنیرہ۔ ننے آن ہر بندغ قاضی جوڑ مریک، سیانڑا مریک۔ فیصلہ کننگ نا خواجہ ءِ۔ دنیا نا اصول ءِ ہر شار انا اسہ قاضی اس مریک۔ اگہ او نابود مرے تو ایلو جوان انگا بندغ اونا جاگہ ءِ ہلنگ کیک۔ دا مننگ کپک کہ فیصلہ غاک گلی کوچہ و تھڑہ غاتیا مریر۔ دنیا نا ویل آک خواہنداری اٹ چٹپسہ، ویل آتے چٹفنگ کن تینا لائخی تے گیشتر کروئی مریک۔ اِرا بندغ نا اسٹ ایلوڑتون لگپک، دانا سوب ءِ ایلوفتیا پاش کروئی ءِ، و خیر انا کسر ءِ پٹوئی ءِ۔ بس گونڈ انگا ہیت دادے کہ ببو آمخ آتا مخ تفی ءِ اِلن۔

ہفتئی تلار

تاک: 34

05 September 2020

پنہ، 1