فیڈل کاسترو (11)

کنا سیل آن پدی ہِننگ آن گڈ اوفک سرٹیفکیٹ آ دستخط کریر کہ چاوہ کہ اوفک دن جوان ءُ نیت اسے تون کرور کہ او بیرہ ہندا کسر اٹ کنا زندگی ءِ بچفنگ کریرہ ہرا کہ اوفتا خیال اٹ سخت گڑتی تا باٹی ئس۔ ای تینا ہیت و گپ ءِ اودیم تخنگ آ بیوس الوٹہ۔ ہندا سوب آن کہ ای بیرہ راست اتون تفوک اٹ۔ دا وخت آ کنا راست پاننگ آن مننگ کیک کہ او جوان انگا ڈاکٹر آتا مادی فائدہ غاتے نسخان رسینگے، ولے ای او فتا شرفمندی نا بارو اٹ کل شکبری تے مُر کننگ اٹی اٹ۔ ہرا کہ بھاز گچین مرو۔ ہمو نن ای عدالت ءِ چٹھی اس لکھسا دا ڈٹ ڈَول آتے شیف خلکٹ۔ و خواست کریٹ کہ عدالت تینا اِرا فزیشن راہی کرسا کنا جاندراخی نا سرٹیفکیٹ ایتے۔ و یات سلے کہ اگہ زندگی بچفنگ کن کنے دا وڑ انا درو ٹی بشخ ہلوئی تمے تو ای ہزاروار دادے زیان کننگ ءِ اولیت ایتوہ۔ دا کل سڑوک آ ڈَٹ ڈول آتا برخلاف یکتنا جنگ کننگ نا تینا پکا ارادہ ءِ نشان تننگ کن استاد مارٹی نا اسہ جملہ اسے آن تینا ہیت ءِ مونی دیوہ۔

”اسہ انصاف والو کاز اسے کہ غار اسے آن فوج اسے آن ہم زیات گڑا کننگ مریک۔“

دن کہ عدالت ءِ سما ءِ کہ 26 ستمبر آ مقدمہ نا مسٹمیکو پیشی آ ڈاکٹر میلباہر نانڈز نا چٹھی ءِ پیش کننگا۔ ای دا چٹھی ءِ بھلا گارڈ اٹی مننگ آن پد ہم اوڑا سر کریٹ۔ بیدس شک آن دا چٹھی دم دستی وڑ اٹ بیر ہلنگ نا جوزہ ءِ ودفے۔ ڈاکٹر ہرنانڈز ءِ تنیابند کننگا۔ و ای، کہ مہالو تنیابند اٹی ئسٹہ، داسہ کنے جیل انا کل آن اسُل بے رسینگ گیگ آ علاقہ ٹی راہی کننگا۔ اوکان گڈ کل دوبہ دار آتے عدالت اٹی اتنگ آن مہالو نت تیان کاٹم اسکان مُچّ آ تلاشی ہلنگک۔ 

27 ستمبر آ اِرا عدالتی ڈاکٹر لکھار کہ ای اصل اٹ اسُل دراخ جوڑ اُٹ۔ ولدا ہم عدالت نا وار وار نا پرمان آتیان پد ہم کنے دوارہ وخت اس ہم عدالت آ اتنگتو۔ داڑان ایڑتر دا پاننگ کہ ہڑدے نا درست بندغ آک سد آتا کچ اٹی نقلی ءُ پمفلٹ بشخرہ، ہراٹی او جیل آن کنا نرنگ نا پڑو ءِ کریرہ۔ دن انگا وخت آ کنا ساڑی مفننگ آ دا ہیلہ ءِ دا سوب آن جوڑ کننگا کہ او کنے کسفر۔ و دا نشان ایتر۔ کہ ای جیل آن نرنگ نا کوشست ءِ کریسُٹ۔ دن کہ کنا سنبرینگوک سنگت آک وخت انا زی آ دا ڈٹ ءِ بے پڑدہ کرسا بے سہب کریسر۔ و ہرا وخت آ اولیکو بیان حلفی نقلی پک مس تو رجیم عدالت نا پاش آن پاش و بے شرمی اٹ توہین ءِ کرسا کنے پیشی آن مُر تخا۔

شرف دار آ جج آک! دا اسہ باور کننگپروک ءُ حالیت اسے، داڑے اسہ ہندن ءُ رجیم اس ئسکہ ہرا کہ جائی اسہ دوبہ دار اسے عدالت اٹی پیش کننگ آن خلیسکہ۔ خلیس و بھیم انارجیم ہراکہ اسہ بے رکھ ءُ بندغ اسے بے سلہ، ڈنڈور مروک، و تنیائی ٹی شاغوک آ بندغ نا اخلاقی سزا ترفنگ نا خلیس آن اوار توسنے، او بیرہ کنے ہر گڑا تیان مر تخنگ تون اوار نیٹ آ کنے مقدمہ غان محروم کرے۔ ہراٹی کہ ای کل آن خاص انگا دوبہ دار ئسٹہ۔ یات سلے کہ دا اسہ ہندن ءُ دور اسے ٹی مس ہراٹی بنداوی حق آتے معطل کننگانسس، و پبلک آرڈر ایکٹ، ریڈیو و اخبار آتا سنسر شپ پورو واکداری اٹ نافذ کننگاسُس۔ اسٹ انگا دوبہ دار نا توارآن داخہ در خلوک آ رجیم انت انت بے باور و خننگپروک ءُ ڈوہ کرو ءِ۔

ای دا بے ادبی و بے شرفی ءِ کیوہ ہرادے کہ فوجی کماش آک ہر وخت ننا خلاف نشان ترسا کریر۔ ہرا غیر انسانی تنیائی ٹی کنے تخنگا اخہ وار عدالت دادے ایسر کننگ نا پرمان کرے۔ اخہ وار دا عدالت کنا بھازانگا بنداوی حق آتا شرف تننگ نا پرمان کرے۔ اخہ وار او کنے تینا مون آ پیش کننگ نا پرمان کرے۔ دا عدالت نا پرمان آتے وخت اس ہم پورو کننگتو۔ داڑان ہم خراب انگا ہیت دادے کہ عدالت تون مون پہ مون اولیکو و ارٹمیکو پیشی تیٹی کن تون اسہ مجسٹریٹی گارڈ اس جِک سلفیر تاکہ ای پین کس اتون ہچ ءُ ہیت اس کننگ کپر۔ داڑسکان کہ چنکو وخت اسے کن ہم دن کننگ کن الیتوس۔ ایلو لوز آتیٹی، نئے بیرہ جیل اٹی بلکن عدالت اٹی ہم اونا مون آ و پرمان آتے گوجالار۔ ای ایلو سیشن اٹی عدالت کن بنداوی شرف انا باندات اونا یاتی ءِ کننگ نا ارادہ ءِ کریسٹ، ولے کنے دوارہ اسُل اتنگتو۔ داخہ در بے شرفی نا بدل اٹی ننے نما مون آ اتنگک کہ کانود نا پن آ ننے جیل کننگے ہرانا کہ او دہ مارچ آن خلاف ورزی ءِ کرسا ہننگ اٹی ءُ۔ یخین اٹ دا ڈکھیائی ءُ ہیت اسے۔ و دا کاریم ءِ نے آ بیٹ کننگ خوارہ۔ دا مقدمہ نا نیام اٹ لاطینی متل Cedant arma Togae”ملٹری اقتدار سول اقتدار ءِ کسر ایتے“۔ نا یخین اٹ اسہ وارخواہی اسے آ ہم دانا پوروی ءِ کننگتنے۔ ای نے آن خواست کیوہ کہ دا حالیت ءِ مون آ تخنگے۔

ایلو دا کہ‘ دا وڑو ڈول آک ہر وڑ اٹ بے کار ئسرہ۔ کنا بہادر انگا کامریڈ آک بے مٹ حب الوطنی اٹ بے سگ آ بیداد آتیٹی ہم ہر وڑ اٹ تینا زمواری تے سر تسر

ہفتئی تلار
تاک: 45
21-27 November, 2020
پنہ: 02