الس و ادب نا خڑکی نا گرج(شونگال)

براہوئی ادب نا بابت ایلو بھاز انگا راستکی تیانبار اسہ راستکی اس دا ہم ارے کہ او الس ءِ تینائی کننگ کتّنے، دانا بھاز آ سوب آک پاننگرہ۔ اسٹ دا کہ براہوئی ادب اٹ نوشت نا بناء دُن تو ہُرے آ مس، ولے ہراتم اونا بنائی ردوم نا دیک ئسر، او وخت آ براہوئی ادب ءِ ماحول ہم رسینگا، و اودے ہور تیا حساب مروک ولے السی نوشتوک ہم دوئی مس۔ ہراڑان ادب نا شونداری نا اومیت اس ودی مس۔ ولے بھاز زوت ادب ءِ سیاست آن جِتا کننگا، و ہراتم ادب سیاست آن جتا مس تو او السی سلپک۔ داڑے ”سیاست“ نا اصطلاح ءِ اونا اصل معنہ اٹ ہُننگ نا گرج ئس۔ ولے گیشتری نوشتکار آک ہرافک بیرہ ”ادب برائے ادب“ نا قائل ئسر، اوفک ادب نا شونداری نا کسر اٹ اڑاند مسر، و سیاست و ادب ءِ جتا گوندسا اوفتا تعلقداری ءِ کشکار۔ ہندن بلوچ فکری تنظیم بلوچ اسٹوڈنٹس آرگنائزیشن نا اولیکو پروشت آن پد سیاسی پِڑ آ ہم ادب تون است خواہی تا چرجوئی کرار کرار آ کم مرسا ہنا،و اینو حالیت دادے کہ براہوئی ادب نا پڑ آ سیاست و ادب جتا جتا غا سَند آتیا سلوک ءُ۔ ہراڑان ہڑتوم آک سرسہبی آن بھاز مُر و السی است خواہی تیان چَپ خننگرہ۔ ایلو ویل دادے کہ ہراتم السی ادب نا ہیت مریک، تو نوشتکار آتا اسہ بھلو کچ اس ”نعرہ بازی“ نا بناءِ کیک، و وَلدا قومی، السی، راجی، فکری و کیہی ’لقب‘ آک بشخ و پانٹ کننگرہ۔ و سِفت و ثناء تا اسہ چرجوئی اس بناء کیک، یخین اٹ دا نوشت آتا تعلقداری الس تون مفک، و ہندن دافتیان پد مونی بروک آ ثناء سِفت آک ہم الس نا فائدہ نا افس، ہراڑان ادب و اونا نوشت آتے کن الس اٹ است خواہی ودی مفک۔ و براہوئی ادب اینو ہندن ءُ حالیت اسے آن تدینگ اٹی ءِ کہ او دے پہ دے آ الس آن مُر تمنگ اٹی ءِ۔دا ویل آتے مون آ تخسا اوفتا ایسری کن سیاسی پڑ آ شعور تالان کننگ نا گرج ءِ، و سیاسی کارندہ غاتسکان ہمو تخلیق آتے سرکننگ نا گرج ءِ، ہرافک الس کن، راج اکن نوشتہ مریرہ۔

ہفتئی تلار
تاک: 30
20-14 اگست 2021ء
پنہ: 01