تاریخ صحافت                         15

حفیظ ساحل

0

Get real time updates directly on you device, subscribe now.

ہفت روزہ ”نیئر اعظم“ مراد آباد:

جنوری 1877ءاٹی مولوی امجد علی مراد آباد آن ”نیئر اعظم“ نا پن اٹ ہفت روزہ اسے نا بنا ءِ کرے، دانا شونکاری ءِ صاحب طرز شاعر قاسم علی ذکاءدوئی کرے ”نیئر اعظم“ ہندوستانی مسلمان تا حق اکن بھاز توار خلککہ، او ہندا بابت یکا مضمون تے شینک کریکہ، مسلمان تے ذلت نا زند آن کشسا اوفتے آسراتی بشخنگ نا است خواہی تخاکہ، اونا اسہ ہم خیال اسے نا رد اٹ او اخس کہ الس نا، غمخوار ئس، ایلو کنڈ آ نظر شاغس تو ہموخس حکومت برطانیہ و والیان ریاست نا خیر خواہ ہم ئس۔

ہفت روزہ ”اودھ پنج“ لکھنو

منشی سجاد حسین 16 جنوری 1877ءآن ”اودھ پنج“ نا پن اٹ ہفت روزہ اس شینک کرے، 8 پنّہ غاتیا جوڑ دا پرچہ ٹی اخس کہ بوگ شوگی ءُ نوشتانک مسرہ، ہندن داکان بیدس ملک انا سیاسی و راجی حالیت آتے ہم گچین وڑ اٹ پاش کننگاکہ۔ بخال و مسلمان سیوت نا گچین ءُ داعی اس ئس، ولے دیکی تہذیب نا زوراک ءُ مخالف اس ئس، اوکان بیدس حکمران تپہ غا بھاز گچین و بے خلیس آن تنقید کننگ دانا شعار ئس، دا پرچہ ءِ 32 سال مسوسس کہ باقاعدہ شینک مرسا ہناکہ، او بے کچ است خواہی دوئی کرے، جہالت و پد تمنگ نا دور اٹ ہم دانا شینک کچ 12 ہزار آن گدرینگاسس۔

ہفت روزہ ”مہرنیم روز“ بجنور:

1877ءاٹی حافظ کریم اللہ 12 پنہ غاتیا اسہ ہفت روزہ اس ”مہرنیم روز“ بجنور نا پن اٹ شینک کرے، دا پرچہ نا لس تب سنجیدہ ئس، ولے بھاز وخت دا سنسنی خیز حوال ہم شینک کریکہ، ساڑی حالیت آتیا معلومداری و علمی ءُ نوشتانک بھاز زیات شینک کریکہ، سرکاری پالیسی تا برخلاف کل انا مون آ بھلو جیرت اسے ٹی خیال آتا درشانی ءِ کریکہ۔ ”مہرنیم روز“ علی گڑھ نا بانی سرسید احمد خان نا نظریہ غاتا پبی ءُ مخ تف اس ئسکہ۔ ہندا سوب آن تینا پرچہ ٹی سر سید احمد خان کن بھاز نوشتانک شینک کریکہ۔

توئی ”حافظ صحت“ لاہور:

یکم جنوری 1878ءآن زبدة الحکماءحکیم غلام نبی مسلمان تیٹ طبی علم انا شونداری کن لاہور آن توئی ”حافظ صحت“ نا بنا ءِ کرے۔ 8 پنّہ غاتیا شینک مروک دا گونڈ انگا توئی رسالہ ٹی گیشتری ناجوڑی و اونا درمان نا بارو اٹ نوشت آک مسرہ، داڑان بیدس موسمی ناجوڑی تیان بچنگ کن بھاز جوان وڑ اٹ پہہ کننگاکہ۔

ہفتئی تلار،

تاک25

27 June 2020

پنہ، 7

Get real time updates directly on you device, subscribe now.

Leave A Reply

Your email address will not be published.