محرم الحرام، بلوچستان اٹ 6 ہزار سیکورٹی کارندہ تعینات

کوئٹہ: حکومت بلوچستان نا ترجمان لیاقت شاہوانی پارینے محرم الحرام نا دے تیٹی سیکورٹی کن پبی گام گیج کننگانے، 6ہزار سیکورٹی کارندہ رکھ اکن سلوک مریرہ، وخت اس کہ پاک فوج و ایف سی نا دستہ غاک اسٹینڈبائی مریرہ، بلوچستان اٹی 7 لکھ آن زیات بندغ ٹُکہ خلفینو، 2017-18ء نا رپورٹ نا رد اٹ چنا نیاڑیک غذائی کاختی نا گواچی ءُ، بلوچستان حکومت کنوئی گڑا تیٹی وٹامن اوار کننگ نا فیصلہ کرینے، نُت، میدہ و سی دائے تیٹی مشین تا کمک اٹ وٹامن شاغنگک، دا ہیت آتا درشانی ءِ او تدوک آ دے کوئٹہ ٹی پریس کانفرنس کرسا کرے۔ لیاقت شاہوانی پارے کہ تدوک آ دے یوم آزادی14 اگست سرکاری کہول آ و الس نا کنڈ آن پبی وڑ اٹ اڈ تننگا۔ 14 اگست یوم آزادی امن اٹ گدرینگا، حکومت بلوچستان محرام الحرام اٹی سیکورٹی کن پبی گام گیج کننگ اٹی ءِ، مچ آ بلوچستان اٹی محرم الحرام نا بابت6 ہزار سیکورٹی کارندہ تعینات کننگک، 10 محرم الحرام نا دے کوئٹہ شار اٹی 6 ہزار سیکورٹی کارندہ تعینات کننگک، محرم الحرام نا دے تیٹی پاک فوج و ایف سی نا دستہ غاک اسٹینڈ بائی مریرہ۔ محرم الحرام اٹی حساس علاقہ غاتیٹی کنٹرول رول جوڑ کننگک، لوڈ اسپیکر کاریم اٹ اتنگ و ڈبل سواری آ رکھ خلنگانے۔ محرم الحرام نا مجلس و جلوس آتیٹی ایس او پی تیا عملدرآمد کن پبی کوشست کننگک، او پارے کہ تدوک آ دے اسہ وار ولدا کورونا نا کیس آتیٹی ودکی مس۔ 14اگست آن پد اینو کیس آتیٹی ودکی مسنے، محرم الحرام نا دے تیٹی اگہ عزا دار آک ایس او پی تیا عمل کریر تو کیس آتیٹی کمتی بننگ کیک۔ بلوچستان اٹی 7 لکھ آن زیات بندغ ٹُکہ خلفینو، 2017-18ء نا رپورٹ نا رد اٹ چنا نیاڑیک غذائی کاختی نا گواچی ءُ۔ بلوچستان حکومت کنوئی گڑا تیٹی وٹامن اوار کننگ نا فیصلہ کرینے، داکان بیدس بے اٹ آئیوڈین ہم اوار کننگک۔

(آن لائن)