ننا کس فیورٹ اف، آخبت نا فیصلہ ءِ اوغان تا جند ءِ کروئی ءِ، قریشی

ملتان :  وزیر خارجہ شاہ محمود قریشی پارینے کہ ننے اوغانستان نا گچینی تون کاریم ءِ، ننا ہچ ءُ ایجنڈا اس اف، و الس نا رکھ ننا ایجنڈا ءِ، نن کشت و خون آن بچنگ خوانہ، اوغانستان نا ویل آ دنیا تون اوار سلوک اُن، ویل ءِ مذاکرات اٹ ایسر کننگے۔ اوغانستان نا ویل جنگ اٹ چٹپننگ نا موقف ءِ مچ آ دنیا امنا کرینے، برطانوی وزیر خارجہ تون ٹیلفون آ ہیت کیوہ، ننا کس فیورٹ اف، آخبت نا فیصلہ ءِ اوغان تا جند ءِ کروئی ءِ، یک شنبے نا دے ملتان اٹی پریس کانفرنس کرسا وزیر خارجہ پارے کہ پاکستان وار وار پارینے کہ اوغانستان نا ویل جنگ اٹ ایسر مفک، وپاکستان نا دا موقف ءِ مچ آ دنیا اؤ کرینے، خاص وڑ اٹ وزیر اعظم عمران خان نا کیہی سال مست انا ہندا موقف ئس، نن دا پانہ کہ اوغانستان نا ویل ہیت و گپ اٹ مذاکرات نا کمک اٹ ایسر کننگے و پر امن وڑ اٹ اقتدار ءِ مونی گدریفنگ نا وڑ اس مونی اتنگے، ہرا جامع مننگ تون اوار بھلو وخت اس اسکان چکنگ ہم کے، کہ اوغانستان نا کل ٹولی تے داٹی نمائندگی ملنگ کے و اوفک پر امن وڑ اٹ اوغانستان نا آخبت نا ایسر اس کشنگ کیر۔ داسہ دا اوغانستان نا سرکڑدہ غاتا آزمائشت نا ساہت ءِ، اوغانستان نا الس امن خواہک، و اوفک سوگوی نا خواہندار ءُ۔ اوفک خوارہ کہ اوفک تینا اُرا تیٹی رکھوک مریر و اوفتے امپنگ نا گرج مف، و ہڑدے ئی کاروبار ہم چلینگسا کے۔ او پارے کہ ننا است خواہک کہ باندات آک ہندا وڑ مونی کار و ہیت و گپ اٹ ویل ایسر مرے۔ ننا کوشست آک برجا ءُ۔ نن کل عمل اٹ بشخندار مسنن، دوحہ ٹی توڷ بش اٹ اوار ئسن، ٹرائیکا پلس اٹی ہم اوار ئسن، استنبول و ماسکو نا دیوان تیٹی ہمب شخ ہلکن۔ شاہ محمود قریشی پارے کہ عاشورہ غان پد وزیر اعظم نا موکل اٹ اوغانستان نا کل ہمسائے ملک آتتون رابطہ کیوہ و اوفتتون ہیت وگپ کیوہ۔ کہ نن پر امن ایسر اسے نا کنڈآ گام کننگ کین، و ایلو ہمسائے تتون تولسا اسہ پیج اسے آ برین۔ ننے اوغانستان نا گچینی تون کاریم ءِ، او پارے کہ کن تون حوال ارے کہ برطانیہ نا وزیر خارجہ کن تون رابطہ کننگ خواہک، ان شااللہ کنا اوڑتون ٹیلفون آ ہیت مریک، وخت اس کہ اوغانستان نا اہم انگا راہشونک پاکستان آ بننگ اٹی ءُ، مننگ کیک اوفتتون ہم اسہ دیوان اس زُو مرے۔

(آن لائن)