ریاست نا کنڈ آن داتم اسکان گوجالنگوک آتے اولیت ایتوہ، عمران خان

اسلام آباد: وزیر اعظم عمران خان پارینے کہ ریاست نا کنڈ آن داتم اسکان گوجالنگوک پاکستانی تے اولیت ایتوہ، وزیراعظم راجی رابطہ غاتا ویب سائٹ ٹوئٹر آ سائیکل اسے آ کچرا ہرفوک چنا سے نا فوٹو ءِ شیئر کرے، ہرانا سرحال اٹی او نوشتہ کرے کہ ان شاء اللہ دا وڑ انا پاکستانی تے اولیت ایتوہ، ہرافک ننا ریاست اٹ داتم اسکان گوجالنگسا ہنانو، داکان مست وزیر اعظم عمران خان صوبہ خیبر پختونخوا ءِ خرسی اٹ خرن کننگ نا کوشست آتیا انتظامیہ ءِ مبارکبادی تس، تینا ٹویٹ اٹی او نوشتہ کرے کہ ایبٹ آباد نا علاقہ جدکر بانڈہ بدلینڈ سائٹ ءِ پاکستان گرین مہم نا بشخ اس جوڑ کننگانے، وزیراعظم خیبر پختونخوا حکومت ءِ 10 بلین ٹری سونامی ہدف انا دوئی کننگ نا رُم اٹی کل آن مونی مننگ آ مبارکبادی تس۔ دا وخت آ عمران خان بانڈہ بدلینڈ سائٹ نا اسُل بھاز متکن ءُ، و پوسکن ءُ فوٹو اس ہم شیئر کرے، ہرافتیٹی پوٹَو خننگوک آ جاگہ اوکان پد خرسی و نہال آتیان پر خننگک۔