جانجوڑی ہند آتیٹی دارو تا ساڑی گری ءِ امر کہ مرے پک کننگے،سیدرحمت اللہ شاہ
جانجوڑی نا بشخ اٹی الس ءِ گچین و وخت آ طبی آسراتی تا فراوانی ضلعی انتظامیہ نا اولیکو اولیت آتیٹی اوار ءِ
جھل مگسی، ڈپٹی کمشنر جھل مگسی سید رحمت اللہ شاہ نا کماشی ٹی ڈسٹرکٹ ہیلتھ کمیٹی نا توئی جاچ دیوان اڈ ہلک، ہراٹی ضلع نا کل سرکاری جانجوڑی ہند آتے ٹی طبی آسراتی، کارندہ غاتا حاضری و ایلو انتظامی باندات آتا جم جاچ ءِ ہلنگا۔ دیوان اٹی غیر حاضر کارندہ غاتا برخلاف کارروائی، غیر حاضری آ تنخواہ تیان کٹوتی یا تنخواہ تا بند کننگ و قاعدہ و ضابطہ نا رِد اٹ محکمہ ئی کارروائی کننگ نا بابت فیصلہ کننگا۔ دیوان اٹی کنٹریکٹ آ کاریم کروک ڈاکٹر آتا کنٹریکٹ آتے ٹی ودکی‘ میڈیکو لیگل کیسز (MLC) تون تعلقدار ویل، ایمبولینس آتا دوئی مننگ و مون تروک ویل، وخت اس کہ جانجوڑی بنداوی ہند آتا اسٹاف نا حاضری و ایلو انتظامی و طبی ویل آتا ہم جم جاچ ءِ ہلنگا۔ دا وخت آ دارو تا ساڑی گری‘ فراوانی و اسٹاک نا بابت باندات آتیا ہم سجفنگا۔ ڈپٹی کمشنر تعلقدار کمامدار آتے پارت کرے کہ جانجوڑی ہند آتے ٹی دارو تا ساڑی گری ءِ پک کننگے و الس ءِ جانجوڑی نا بنداوی آسراتی تا فراوانی ٹی ہچ وڑ انا ڈیوالئی سگنگ مفک۔ ڈپٹی کمشنر سید رحمت اللہ شاہ پارے کہ جانجوڑی نا بشخ اٹی الس ءِ گچین و وخت آ طبی آسراتی تا فراوانی ضلعی انتظامیہ نا اولیکو اولیت آتیٹی اوار ءِ۔ او تعلقدار افسر آتے پارت کرے کہ غیر حاضر کارندہ غاتا برخلاف بے فرق کارروائی کننگے و کل جانجوڑی ہند آتے ٹی کارندہ غااتا حاضری، دارو و ضروری آسراتی تا پدریسہ چاروکی ءِ پک کننگے۔