السلام جل جلالہء

خدا پاک نا زیبا غا پن تیان اسہ پن اس ”السلام جل جلالہء ارے۔ دا اسم مبارک نا معنہ دادے کہ ”ہمو ذات ہراڑان سلامتی نا اومیت تخنگے“۔ دا اسم قرآن پاک اٹ بیرہ اسہ وار بسنے۔ علامہ خطابیؒ فرمائفک حضرت سفیان بن عُیَینہؒ آن روایت ءِ کہ مسہ جاگہ ہمودو کہ انسان آ سخت گدرینگرہ۔

.i ہرا وخت آکہ چنا ودی مریک، یعنی چنا لمہ نا پڈ اٹ نہہ تو گدریفنگ آن گڈ کہ دنیا ٹی بریک، دا اوڑکن بھاز سخت ءُ وخت اسے۔

.iiہرادے آ کہ انسان دا دنیا غان کزیت کیک۔ او دے آ ہندن ءُ مخلوق اس (فرشتہ غاتے) خنک کہ داکان مست او دافتے خنتویسس، دا ہم اسہ بھلو فریشانی نا وخت اسے۔

-iii ہرا وخت آ انسان ارٹمیکو وار زندہ کننگک، و تینے بھاز بھلو مچی سیٹی خنک دا مسٹمیکو فریشانی نا جاگہ ءِ۔

دن انگا سخت انگا جاگہ غا عافیت و سلامتی ٹی تخوک آ ذات ”السلام جل جلالہء نا ذات ءِ۔ امن و سلامتی بیرہ ہمو ذات ”السلام جل جلالہء نا کنڈ آن ءِ، نہ تو نن و ننا حفاظت و رکھ انت مرو ءِ ہرا وخت آ او سلامت تخپ، انسان نا کل انتظام آک بے کار مریر؟

حضرت عبداللہ بن مسعودؓ آن روایت ءِ کہ اللہ نا رسول ارشاد فرمائفے ”السلام جل جلالہء اللہ تعالیٰ نا پن تیان اسہ پن اسے، اودے اللہ تعالیٰ زمین آ شیف کرینے، گڑا دا پن ءِ بھاز پنی کبو، و جوان تالان کبو۔ ہرا وخت اس کہ اسہ بندغ اس اسٹ اسے نا ماس آن گدرینگک، اوڑا سلام بٹک (اللہ نا دا پن ءِ پاہک) ایلو بندغ اونا ورندی ءِ ایتک، تو اولیکو بندغ نا خدا نا پن انا یات ترفنگ نا سوب آن ارٹمیکو بندغ آن اسہ درجہ اس فضیلت اٹ زیات مریک۔ اگہ ایلو بندغ ورندی تتو تو فرشتہ غاک ورندی ایترہ۔

دا حدیث پاک اٹ اِرا گڑا نا تذکرہ مسنے، اسٹ دا کہ ”السلام جل جلالہء اللہ نا کنڈ آن شیف مروک ءُ پن اسے، ارٹمیکو دا کہ داٹی سلام شاغنگ نا ترغیب ارے۔

از:ابن الحسن ابابکی

ہفتئی تلار،

تاک25

27 June 2020

پنہ، 1