بلوچ ورنا انسانی روبوٹ نا خالق

دا جہان اٹ شیف مروک آ ہر بندغ ءِ خدا اسہ لائخی، کسب و اِسکل (skill) اس بشخانے کہ انسان دادے پٹ وپول کے، نت دو خلے و دادے پیشن کشے و ہندا کسب نا چاہنداری ءِ کے۔ تینا تہہ اٹ تخوک ہندا لائخی تے چاہنداری آن پد بندغ داڑا کاریم کے تو او دنیا نا ایلو بندغ آتیان اسہ جتا و بے مٹ ءُ بندغ اس پاننگک۔

ہندا وڑ اٹ عزیز احمد شاہوانی اسہ بھاز کچین ءُ سنگت و ہم کوپہ اس تینا زند ءِ خواری و کتاب آتتون تدیفسا اینو بلوچستان نا ورنا تا شرف نا سوب جوڑ مرسا تینا فیلڈ اٹ اسہ ہندن ءُ کاریم اس اڈ تس ہرانا مٹ ودی مفک۔ عزیز شاہوانی نا بنداوی تعلقداری اسکلکو قلات آن ءِ، ولے تعلیم تون میر مریبت نا سوب آن 2005 ء اٹ او قلات اٹی ہندی مسر۔ تینا بنداوی تعلیم ءِ قلات نا گچین آ اسکول پولیس لائن اسکول قلات آن ہنین و خواری کش آ استاد آتا سیخا ٹی بنا کرے، میٹرک اسکان او ہمو ادارہ نا بے مٹ انگا اسٹوڈنٹ آتیا چر اٹ سلوک ئسکہ۔ میٹرک آن پد مدام اونا وخت لائبریری ٹی گدرینگاکہ۔ او میٹرک آن پد تینا تعلیم ءِ مونی روان تخنگ کن کوئٹہ نا شار آ ہنا، و ہموڑے کالج تون اوار اوار ٹیوشن ہم خوانفیکہ۔ او ہاسٹل اٹ رہینگاکہ۔ او خواری کرسا تینا علم دوستی نا شاہدی ءِ تس۔ اینو جہان چاہک کہ اونا خواریک پوک متوس، اینو بلوچستان یونیورسٹی تون اوار اوار او بلوچ قوم اکن ہم اسہ تاریخ اس پن کرے و دا پک کرے کہ دا قوم انا ورنا تیٹی ہم خدا بھاز بھلو لائخی تخانے، ہرافک بیرہ اسہ کسر اس امن و سلامتی نا خوارہ۔

یات سلے دا اولیکو ورنا فا، کیہی ہندن ءُ پین ورنا ہم بلوچستان آن پیشن مسنو ہرا جہانی کہول آ تینا لائخی و ہنر نا سوب آن تین کن پن الانو۔ دن کہ یار جان بلوچ ہرا نا تعلق مکران آن ئس او خلائی ریسرچ نظریہ اس پیش کرے۔

ہندن عزیز شاہوانی و اونا سنگت مختیار احمد نا جوڑ کروک انسانی روبوٹ ہم اسہ بے مٹ، پنی ءُ گڑا سے ہرا کہ انسان نا وڑ اٹ تینا خن، بوز و دو تے ہم سرفِک و چرینگ ہم کیک۔ دا روبوٹ شوپیس نا خاطر شاپنگ مال، کلب و پین سرکاری و پرائیویٹ ادارہ غاتیٹی تخنگ کڑزک، و اونا خواجہ، اونا زی آ خواری کروک و جوڑ کروک عزیز جان ننا مبارکبادی، است بڈی و دعا تا لائخ ءِ کہ او تینا زند اٹ مونی ہنسا سرسہب مرے۔

یات سلے کہ قوم آتیٹی ہر اسہ بندغ آن قوم آتا پن و ناموس، قوم آتا بھلنی چنکی، لائخی و نا لائخی نا چاہنداری مریک، و دا قوم (بلوچ) وخت اسے آن اسل پد تموک ءُ قوم اس متنے، دا قوم جنگ آتیٹی فتح نا، تعلیم اٹی شونداری و خواری کروک، کسب اٹی لائخی و ہمت اٹی سوگو ءُ قوم اس مسنے۔ ولے دا قوم ءِ راشونی و حوصلہ افزائی نا گرج ءِ، تانکہ دا مچ آ ملک اکن تینا چاہنداری تے کاریم اٹی اتسا پن و بھلنی نا سوب جوڑ مرے۔

ہندن قلات آن تعلق تخوک عزیز احمد شاہوانی نا پروجیکٹ ءِ حکومت نا چکار و اہمیت نا گرج ءِ انتئے کہ خبر والا چینل آتے او انٹرویو ترسا تینا پروجیکٹ نا بارو اٹ پاہک کہ داٹی پین ہم چندی کاریمک اریر ہرافتا مننگ آن دا بھاز حیران کروک ءُ گڑاس جوڑ مرو، ولے ہمو کاریم تیکن و پروجیکٹ ءِ مونی دننگ کن اودے حکومت و حکومتی کارندہ غاتا کمک نا گرج ءِ۔ بایدے دا وڑ انگا خواری کروک و مخلص آ بندغ آتا کنڈ آ ننا کل انا کمک و حوصلہ نا مون مرے کہ آخبت اٹی دا توبے آنبار قوم اکن گروشک ایتر۔ و تینا روشنائی آن کل ءِ روشنا کرسا، فائدہ ترسا کار۔

ہفتئی تلار
تاک: 18
14-08 مئی 2021ء
پنہ: 02