بلوچستان، و ٹریفک شکست آک 

بلوچستان اٹی اسہ شاہراہ اس ہندن ارے ہرا کہ 1973ء اٹی جوڑ کننگاسس، و اودے اینو پگہ نن ”خونی شاہراہ“ پاننگ کینہ۔ اسہ اندازہ اسے نا رد اٹ ہر سال دا کسر آ کم و وَد شش ہزار بندغ تینا زند آن دُو سلرہ۔ و ہژدہ ہزار بندغ ٹھپی مریرہ۔ ہندا اندازہ نا رد اٹ اسہ تُو اٹ پنچ سد بندغ و اسہ دے اٹ شانزدہ بندغ ہندا کسر آ مرک انا گواچی مریرہ۔

ہندا کسر نا ہیت ءِ سردار اختر مینگل قومی اسمبلی نا بجٹ دیوان اٹی کرسا پارے کہ نن حکومت آن شش لائن نا موٹر وے اس خواپنہ بلکن اسہ ڈبل روڈ اسے نا خواست ءِ کننگ اُن۔ انتئے کہ نن تینا پیر و ورنا، نیاڑی نرینہ و چنا تا میت آتے ہرفنگ آن دم درینگانن۔ دا کسر نا سوب آن چندی خاہوت آک بھس مسنو۔

دا ہیت مننگ ءِ کوئٹہ کراچی شاہراہ نا، ہڑدے نا ایکسیڈنٹ آک ننا مخلوق ءِ استو کرینو۔ اگہ ننے آن کس اس دا کسر آ سفر کننگ نا ارادہ ءِ کے تو اونا مچ آ خاہوت اوڑتون ہمو وخت اسکان رابطہ ٹی مریک تانکہ او تینا مزل آ سر مف۔ سفر کننگ نا خواری تو بیرہ مسافر تون مریک، ولے اونا مزل اسکان سر مننگ نا گڑتی مچ آ خاہوت آ مریک۔ 

ہر شکست آن گڈ ہندا مریک کہ داسہ داڑکن توار بڑز کروئی ءِ، ولے منہ دے آن گڈ غٹ انا است آن کاہک۔ دا کسر ءِ ڈبل کننگ کن منہ سنگت لانگ مارچ اسے کن ہم پیش تمار۔ ولے ننا شوم بختی کہ کورونا ہر کسر ءِ بند کرے۔ کراچی آن پیش تموک آ دا ”واک“ ءِ 334 کلو میٹر آن گڈ وڈھ انا ہند آ ایسر کننگا۔ ہندن لورالائی آن ہم سنگت آک کوئٹہ چمن شاہراہ ءِ ڈبل کننگ کن کوئٹہ اسکان لانگ مارچ کریر، ولے ہچ متو۔

1973ء اٹی دا کسر جوڑ کننگا تو او وخت آ آبادی ہم تینا کچ اٹی ئسکہ۔ و گاڈی تا اسپیڈ ہم کنٹرول اٹی ئسکہ۔ ہمو وخت آ دا کسر آ سفر کروک آ مخلوق نا کچ اینو نا آبادی نا رد اٹ چٹ کم ئسکہ۔ ولے دیک گدرینگسا ہنار، آبادی اول آن زیات مرسا ہنا۔ گاڈی تا کچ و اسپیڈ ہم ودسا ہنا۔ ہراڑے تُو تا سفر ئس، داسہ او دے تیٹی مننگ ءِ۔

سیکرٹری ریجنل ٹرانسپورٹ اتھارٹی عائشہ زہری پاہک کہ ننا المیہ دادے کہ ننے سما ہم ارے کہ دا کسر آ شکست آک ملک اٹی مروک آ ایلو کل شکست آتا مون اٹ بھاز زیات ءُ۔ قومی اسمبلی نا باسک آغا محمود شاہ ہم ہندا کسر نا بارو اٹ پارینے کہ دا غٹ آن زیات بے انصافی نا ہیت اسے کہ اسہ ملک اٹی ہراڑے صوبہ غاتیٹی کسرک اسہ ایلوڑتون ملرہ، او غٹ ڈبل ءُ، و اسہ صوبہ اس ہرا کہ ڈغاری کچ انا رد اٹ کل آن ودّ ءِ، اوڑا ٹریفک نا ہن بر ہم زیات ءِ، او کسر آ گورنمنٹ نا ہچ ءُ چکار اس ہم اف۔ صوبہ بلوچستان نا دا کسر صوبہ سندھ اسکان کاہک، و ہندن ایلو کنڈ آن ایران اسکان و اسہ کنڈ آن اوغانستان اسکان کاہک۔ دا شاہراہ بین الصوبائی و جہانی کسر اسے، ولے ولدا ہم داڑا بنجائی حکومت نا کنڈ آن ہچ ءُ چکار اس کننگپک۔ مسہ سال مست صوبائی حکومت پارے کہ دا بابت گام گیج مسنے، و سڑک ءِ بھلن کننگ نا منظوری مسنے، ولے داسکان دانا کچ ءِ ہم ہلتنو، گڑتی نا ہیت دادے کہ دا روڈ انا جوڑ کننگ نا بابت اخس کہ ہُرے کننگا، نن دے پہ دے آ نہادی آ جان تیان ہندن دُو سلسا کرون۔

ہفتئی تلار 

تاک: 11

19-13 فروری 2021ء

پنہ: 06