مجبوری ءِ پین پن تننگپ

دا ننا لس تب جوڑ مسنے، کس اسے کس اتون کاریم اس تما، اسہ دم شغان اس خلیک۔ اخر نے کن تون کاریم اس تما۔ بھلو مطلبی ءُ بندغ اسے اُس۔ اخر بندغ ءِ بندغ تون کاریم تمک۔ مدام بندغ تینا بندغ اسے آ مون کیک۔ باقی کس ءِ کس انا ہڑ و جنجال آتا سما اف۔ کس نادراخ ہم مننگ کیک۔ مجبوری سے ٹی گٹ مریک۔ مجال ءِ کس کس آن ہندن ءُ سوج اس کے کہ ایلم خیر مسن؟ بھاز وخت آن گڈ خننگانس؟ لس بندغ اس تو دا سوال ءِ کننگ کیک۔ منصبدار اسے آن دا گمان ءِ بندغ تخپ۔ منصبدار تینا منصب نا گمر اٹ مریک۔ بیرہ سلام دعا کن بروک آ ءِ ہم مجبور تکک۔ مطلبی خیال کیک۔ حالانکہ منصب اسے آ تولوک آ نا کاریم ءِ کہ او ہمو منصب آن مخلوق ءِ فائدہ ایتے۔ تینا زمواری تے پورو کے۔ تینا بے روزگاری نا دے تے است آن دیک۔ تینٹ اسٹ اسٹ ءِ منت کروک آ تینا مجبوری ءِ گیرام دیک۔ حالانکہ بھاز انگاک ورنائی نا دھکہ غاتے خنسا تین تون قول کیرہ کہ اگہ ای دن ءُ منصب اسے آ بسٹ، کنا دوٹی خیر انا کاریم اس بس، کس کنا درگہ غان نا اومیت ہنپرو ءِ۔ ولے ہراتم تینٹ ہمو منصب آ توس، ہر گڑا ءِ است آن دیک۔ دا سوب آن کہ او ہمو نظام نا گواچی مریک۔ ہرا بندغ ءِ بندغ الیپک۔ بندغ ءِ بندغی آن بٹک۔ اودے ہمو منصب آ ہر کاریم کن تنخواہ غان بیدس گڑاس ملک۔ چاپلوس آک اونا دامون ایمون چرینگرہ۔ مٹھائی نا پن اٹ اونا خذمت مریک۔ گڑا او وخت آ او ایلمی، سیالداری تے کل ءِ گیرام کیک۔ گڑا ہندن بروک آ مون انا بندغ ءِ شغان اس خلیک، نرفک، تانکہ اونا دھندہ خراب مف۔ اینو نن دن انگا منصب دار آتیان گلہ کینہ تو ننے اوفتا جند انا مجبوری تا سما مرے۔ اوفتا پڈ انا خل/ آن ننے خبر مرے۔ اونا بندغی نا کہوک آ جوزہ ءِ چان۔ اونا عیاشی نا غلامی تا گواچی مننگ ءِ پہہ مرین۔ اسہ غلام اس ہمودے ہرادے بھلو غلامی اس مون تمانے، اسہ غلام اس ہمودے ہرا تینا غرَز و عیاشی تا غلام مسنے۔ دا غلامی ایلو غلامی آن زیات لعنتی ءِ۔ انتئے کہ دن انگا غلام تینے تینٹ غلام کیک۔ مطلب دا کہ بھلا، چنکا غلام اسٹ ایلو آ ڈری خلیر تو عجب ءُ ہیت اسے، پیشن زمانہ نا غلام اگہ تینا اُراٹی ہم غلام ءِ یا تینا اُرا نا باتی تے غلام کرینے، داڑان بھلو عذاب پین انت مرو ءِ؟ ہچ مف نن بھلا غلامی آن آجوئی خننگ کن اسٹ مرین۔ ہمو نظام ءِ کٹفن، ہرا کل ءِ غلام جوڑ کیک۔ اسٹ ایلو ءِ تینا غلام کننگ بھلو آمخی اسے۔ بھلو دڑد اسے۔ ڈکھ اسے۔ بندغ نا بندغ آن غاو کننگ انت اس معلومدار کیک؟ ہندا کہ بندغ بندغ تون جوان اف۔ بندغ بندغ آن بیزار ءِ۔ بندغ بندغ نا فائدہ نا اف۔ ہچ ءُ بندغ اس تینا مون انا بندغ نا سرسہبی آ خوش اف۔ ہچ ءُ سرسہب ءُ بندغ اس ایلوفتا سرسہبی ءِ سگنگ کپک۔ سرسہب آ بندغ سرسہب آ بندغ کن اپوک اس جوڑ مرے، گڑا دا پاننگے کہ سرسہبی نا کسر ایلوفتے کن امر ملنگو۔ بایدے پین ہچ مف بندغ بندغ تون ملوک آ مون اتون ملے۔ ملوک آک اسٹ ایلو نا بارو اٹ بدگمانی تخپس۔ مست حال حوال کننگ نا فائدہ ئس کہ اول اوار تموک آک اسٹ ایلو ءِ حوال تسرہ۔ اسٹ ایلو نا گدرینگوک آ دے تیان معلومدار مسرہ۔ گڑا ملنگ نا سوب معلوم مسکہ۔ داسہ تو ملنگ تون یا تو گلہ شونیک بنا کیرہ۔ یا گڑا است اٹی تخوک آ ہیت آتے کننگ نا اسٹ ایلو ءِ وار تننگپک۔ ہند اسوب آن بندغ بندغ آن مر مننگ اٹی ءِ۔ بندغ بندغ آن گلہ ئی ءِ۔ بندغ بندغ نا خوامخواہ دشمن ءِ۔

ہفتئی تلار

تاک: 45

21-27 November, 2020

پنہ: 01