مارکسی تنقید Marxist Criticism

مارکسی تنقید ادب و فن و راجی و ربیدگی رِد و بند انا جاچ ءِ مارکسزم نا نظریہ غاتا رِد اٹ ہلوک آ تنقیدی وڑ ءِ پارہ۔

دا تنقید ادب ءِ راجی، تاریخی، زرگزرانی نا پژدر اٹ ہُرک۔ و دانا جاچ اکن تپہ ئی جہد، سرمایہ دار آتا پلویڑ اٹ زوراکی و لُٹ پُل کروک آ گمان آتے بنداو جوڑ کرسا ادب نا تنقیدی جاچ ءِ ہلیک۔ مارکسی تنقید نا کل آن گچین آ پالو دادے کہ او ادب و راج انا تعلقداری آ شرہ کیک۔ مارکسی تنقید ادب ءِ راج انا آدینک سرپند مریک، و دادے اسہ ہندُن ءُ سلہہ اس پاہک کہ ہرا راجی پنجر، تپہ و تاریخی بدلی تا دروشم سازی ءِ کیک۔ ہراڑان ادب تپہ ئی جہد انا کُنڈ آ راج ءِ خنی کرسا اوڑتون مروک آ ظلم زوراکی تے پیدوار کرسا راج اٹ شعوری وڑ اٹ تینا اثر ءِ تالان کیک۔دا تنقید ادب اٹ ساڑی تپہ ئی جھیڑہ و راجی بے انصافی تے پاش کننگ نا کوشست کیک۔

ایلو پارہ غا دا تنقید اٹ نوشتوک نا جند انا تپہ ئی پژدر اونا نظریہ و راجی حیثیت نا جاچ ءِ ہلیک تاکہ دا سرپند مننگ اٹ آسانی مرے کہ او ہرا نظریاتی نقطہ نظر اٹ نوشتہ کیک۔ مارکسی تنقید نا بابت ادب نا تعلقداری راجی، زرگزرانی پنجر تون گنڈوک مریک۔ مطلب ادبی تخلیق آک ہمو دورباری نا راجی پیداواری سیالی، سرمایہ دار نا حالیت، و راجی تاڑواڑ نا نتیجہ مریک۔

مارکسی تنقید کروک آتا خڑک آ ادب نظریہ غاتا ٹہیفنگ و اوفتا گُشاد اٹ ودُکی اتسا اوفتیٹی مزاحمت نا جوزہ غاتے وگائفک دا سرمایہ دار نا یا حق اٹ مریک یا اونا خلاف۔

ہیجیمونی Hegemony

مارکسی تنقید دا گڑا نا جاچ ءِ ہلیک کہ ہرا وڑ ادب و دود ربیدہ نا دروشم اٹ حکمران تپہ نا بالادستی ءِ سوگو کننگک۔

مارکسی نقاد آتا اسہ بھلو چِر اس دو بریک ہرا ادب نا بابت تینا خیال آتا درشانی ءِ بھاز زبر وڑ اٹ کرینو۔ اوفتیٹی جارج لوکاچ پنی آ نقاد ہرا حقیقت نگاری realism ءِ ادب نا کل آن اہم انگا پالو گوندا و ادب ءِ راجی گواچنی تے پاش کننگ نا اسہ اہم ءُ ٹول اس پارے۔

ہمو انتونیو گرامشی دود ربیدئی ہیجیمونی نا تصور ءِ تِس ہرا ادب آ ہم بیٹ مریک Hegemony ہمو حالیت ءِ پارہ کہ ہراڑے تپہ یا ٹولی اس تینا زوراکی و تعلقداری اٹ زوراوری اٹ تینا خیال و نظریہ غاتا کمک اٹ ایلو ءِ تینا وڑو ڈول اٹ چلیفنگ نا کوشست کے یا اودے مجبور کے۔ دُن پاننگ کینہ کہ اسہ قوم اسے نا یا اسہ ریاست اس تینا زورغُتی ٹی اسہ قوم یا تپہ اسے آ تینا منشا یا مرضی ءِ زور اٹ ٹپے اودے تینا منشا ٹی چلیفنگ نا کوشست کے ہندُن ہستی دار آتا مزدور تپہ غا زورارکی یا دود ربیدہ وڑ اسہ قوم اسے آ تینا دود ربیدہ ءِ ٹپنگ ءِ نن ہیجیمونی پاننگ کینہ۔

مارکسی نقاد ٹیری ایگلٹن ادب ءِ نظریہ و راجی آدینک اٹ ہُرک۔ ادب اٹ مارکسی تنقید نا چندی وڑک ننے دو بریرہ۔ چارلس ڈکنر نا ناول

Oliver twist, Hard Time

ہراٹی سرمایہ داری نا منفی انگا پالو تے پاش کننگانے۔

فیودر دستوئیفسکی نا و لیو ٹالسٹائی نا نوشت آک ہرافتیٹی تپہ ئی چِک وتاڑ و راجی بے انصافی تا دروشم پاش خننگک۔

ہندن اردو ادب اٹ مارکسی تنقید ترقی پسند تحریک نا رِد اٹ مُستی بس ہرافتیٹی سجاد ظہیر، علی سردار جعفری، فیض احمد فیض، ڈاکٹر وزیر آغا، گوپی چند نارنگ، شمیم حنفی، احتشام حسین اسک اوار ءُ، ہرافک مارکسی تنقید ءِ بخیر کرسا تپہ ئی جہد راجی و سیاسی بے انصافی تتون اوار ادب ءِ راج اتون گنڈنگ و لُٹ پل کروک آ نظام تون مزاحمت نا کسر تے پاش کرسا الس اٹ شعور ودی کننگ نا کسر تے پاش کریر، و ادب ءِ لس راجی و السی نقطہ نظر اٹ ہرار۔

ہندُن براہوئی ادب اٹ تنقید نا خاص ءُ پیرا میٹر متنے، ولے براہوئی شاعری مرے یا افسانہ نگاری اوفتیٹی تپہ ئی چِک و تاڑ لُٹ پل و استحصالی واکدار آتا برخلاف ننے مزاحمتی رنگ دو بریک، ولے شعوری وڑ اٹ براہوئی ادب نا نوشت آتے مارکسی تنقید نا اصول آتیا اوفتا جاچ یا اوفتے شننگتنے۔۔ ننا ادب اٹ تپہ ئی جہد، سیاسی و راجی چک وتاڑ سرداری تپہ نا خلاف توار چِست کننگ تون اوار لُٹ و پل کروک آتا خلاف مزاحمت نا رنگ آک پبی خننگرہ۔ ہرافتے تنقیدی اصول آتیا پرکنگ نا گرج ارے۔