رمضان صاحب نا اظہار مگہ شاعرانہ ءِ؟ (2)

غمخوارحیات

0

Get real time updates directly on you device, subscribe now.

’’ نقشہِ فردوس‘‘ تنقیدی جاچ

ببو اونا داخلی اظہار نا کیفیت اَٹ نوشت وشاعری نا پڑ آ چَٹ ہلوک ءُ منہ شعر اس ہرن۔ ہراڑے اوتینا جند انا ذات اتون اوار ایلو دنیاداری آن ہم سخت خفا، سخت خار، بھاز غاوی ءِ:

’’اگہ کس مُستند ءِ ہم ننے افک ضرورت

ننا شعر آک توڑائی نما وا وا کہ تمانو

……

ننے کس دا وجہ غان دوست توپک

کہ نن ہچ کس انا تابع مفنہ

……

خدا رمضان تو نا ہچ واسطہ ءِ شاپ

دُن ءُ بدخو اسے کہ دُنیا ٹی ہچ مف

……

نما دامن ائے کیر فرشتک وضو

ننا دامن ائے مف نماز پانے مف

……

نا بلک تمار تقدیر آ ننا

مِش تے شابو تغ تا تعبیر آ ننا

……

نقشہ فردوس نا مون آ

ایلو نقش آک چلینگتور

نن تون رِند آک چلینگار

نن تون شیخ آک چلینگتور

بھاز ءِ متو شاعر لیکن

نن تون فنکار چلینگتور‘‘

رمضان نا خارجی اظہار اونا کتاب نا زیبا انگا انتساب آن بنا کیک:

’’دیار ءِ لمہ وطن شادمان بلوچستان

ننا زمین ننا آسمان بلوچستان

جہانِ مشرق و مغرب نا خن نمے آ سخت

روان آ وخت انا اے روح روان بلوچستان‘‘

……

شاعری تخلیل، آرٹ، جمالیات، چیدگی، ندارگی اظہار آن شُپ انگا داوڑ انا شاعری تا خواست کیک ہرافتیان اسٹ اس نقشہِ فردوس اٹی ساڑی ارے:

اگہ نی مسنس تُوبے نا چَٹ جند

نن ہم تو مسنُن ماگیر انا وڑ

ننا اِلاس دو ءِ موقع غا نی

نی ہم نن تون کریس تقدیر انا وڑ

خنگپیرے نُم ہم دارو کن￿ خن نا

نن ہم نا پیدا اُنک انجیر انا وڑ

متونہ نن گڑا رانجھا امر پا

مروسس نی اگہ کہ ہیر انا وڑ

زیارتی برینہ سیل اکن نا

دکہ نی مسونس کشمیر انا وڑ

ننے ایلو سبخ آک یاد متور ہچ

ورخ ءِ خن تا خوانان دیر انا وڑ

سخن فہمی ننے میراث مِلا

ننا ہم تَب روان ءِ میر انا وڑ‘‘

شاعر نا مَر یعنی ایگو ءِ داخس زیات مروئی اف، ہرا ڈول کہ رمضان تینا داخلی اظہار اٹی تخانے تے، انتئے کہ شاعر شعوری پڑ آ قوم آتا راہبلدی ءِ کیک، اودے نرم گو، نرم مزاج مروئی ءِ:

ننا ہم شان ءِ صاااحب مُرشدانہ

ننے ہم منّرہ کل پیر انا وڑ

اصل اٹ دا ساقی جیؔ نا اسلوب ءِ دا ساقیؔ نا بیانیہ ءِ، رمضان بایدے ساقی نا اسلوب ءِ تینائی کپ او تین کن جتا ءُ کسر اس کشے۔ جتا ءُ سمت اس پیدوار کے، انتئے کہ ساقی ساقی ءِ، رمضان رمضان ءِ، مطلب داکہ رمضان نا مجموعہِ کلام اٹی دن ءُ شاعری چَٹ بھاز ءِ ہرافتا مقطع ٹی اگہ صاااحب نا جاگہ غا ساقی لکھن تو کس اس جج کننگ کپک تا کہ دا ساقی نا شاعری اسے یا رمضان نا، اصل اٹ بھلا شاعر نا اسہ نشانی دامریک اونا اسلوب منفرد مریک، بنوک چاہوک نقاد سرپد مریک کہ دا دنا شاعری ءِ۔ رمضان ساقی نا اثر ءِ ہرفینے دا فطری ءُ عمل اسے کہ اوڑان خڑک ءِ، ساقی ءِ رمضان دوست ءِ، و رمضان ءِ ساقی دوست ءِ۔ ولے رمضان نا اسلوب ءِ جتا مروئی ارے۔

داسہ داشاعری ءِ ہُرن ہراٹی رمضان و ساقی نا ہیت آتے ٹی ہچ فرق اف:

خدائی ٹی خدا نا، نا خدا اُن

مرض ءِ لا علاج اٹ مبتلا اُن

ترند اُن بد مزاج اُن بے دماغ اُن

بدر آوارہ شاعر سریلہ اُن

ننا ذہن موقع غا کاریم کپک

حقیقت آن پد نن پین بلہ اُن

فرعونی دوشہ تے کن فطرتاً نن

عصا اُن معجزاتی اژدھا اُن

برینہ نن دیچہ صاااحب ہراکا

شپاد اُن خچ ءِ زی ہم سردار اُن

بہرحال دُن ہم اف کہ رمضان نا تیویٰ شاعری تے ای ریجیکٹ کیو۔ نہ، رمضان نا دا مجموعہ ٹی دن ءُ شعر ہم ارے ہرافک کنے دوست بریرہ، دُنکہ مستزاد نا ساخت اَٹ نوشتہ مروک آ اونا دا شاعری ہراڑان او تینا کتاب نا پن ’’نقشہِ فردوس‘‘ ءِ ہم ہلکُنے:

نقشہ ءِ فردوس انا موسم ءِ کشمیر انا

پھل اسے انجیر انا پھل اسے انجیر انا

لیلیٰ و شیرین نا عکس مٹ و بدل ہیر انا

پھل اسے انجیر انا پھل اسے انجیر انا

نَت تا کیرغ آن اونا اُست تِخِن

خن تخن گل تخن گلشن تخن

او اگہ راضی مرے گُرج ءِ انت تقدیر انا

پھُل اسے انجیر انا پھل اسے انجیر انا

……

سہہ بندی

خاک انا پیرس و نا لندن مریر

اخہ کہ زیبا مریر گوادر مفسہ

مغرب و یورپ نا کوچہ شار شار

پانے کہ ہیرا مریر گوادر مفسہ

دا چمن نا زرّہ زرّہ خیسُن ءُ

کل وطنک یکجا مریر گوادر مفسہ

لازم ءِ شاعر ہرا کیفیت آن کرب آن یا خوشی نا ساہت آن گدرینگک تو او ہمو وڑ انا خیال نوشتہ کیک۔ ولے دُن ہم مف کہ شاعر ءِ امر ءُ خیال اس برے او ہرفے نوشتہ کے تے، ولدا شینک ہم کے تے۔ ای دا ہیت آن ہچ نمن افٹ کہ تخلیق کار نا تینا خیال آک مریرہ ونقاد نا تینا خیال آک، براہوئی زبان اٹی اینو نا دورباری ٹی بھلو کچ اسے ٹی شاعری مننگ ءِ، ولے دا شاعریک بروے تو خوارہ، ہر شاعر یا شاعری تینا دور انا نمائندہ شاعر ہمو وخت پاننگک کہ اونا شاعری ٹی پوسکن ءُ اظہار اس، فکر اس، خیال اس دُن ہمگرنچ مرے کہ اوشاعری عمر اس خلنگ کے۔

پارہ کہ پنی آ نقاد ڈاکٹر وزیرآغا ءِ سوج کریر کہ ’’فیض احمد فیض جائی نا خڑک آ اُردو ادب نا بھلا شاعر ءِ؟‘‘

گُڑا ڈاکٹر وزیر آغا ورندی ترسا پارے کہ ’’اگہ فیض احمد فیض نا شاعری سد سال عمر کرے گڑا جائی فیض بھلو شاعر اسے۔‘‘

داسہ اگہ نن ہندا ہیت ءِ براہوئی شاعری آ بیٹ کین تو انت نن داپاننگ کینہ کہ فلانی داخس ءُ بھلو شاعر اسے کہ اونا شاعری سد سال عمر کیک۔ تو ہیت انا مطلب دادے کہ کنا صاحبِ کتاب کن دا لازمی ءِ کہ او بایدے ہر ہمو شعر ءِ تینا کتاب اٹی اوار شاپ ہرا نزور ءُ خیال اسے ، بلکہ شاعری تے شینک کننگ آن مُست اسیکا پرکھے ہُرے تا۔۔۔۔

ہفتئی تلار

تاک:06

11-05 فروری 2022ء

پنہ: 02

Get real time updates directly on you device, subscribe now.

Leave A Reply

Your email address will not be published.